السلام عليكم ورحمه الله وبركاته
حبيباتي هذا بارت نزلته حتى تطلعون عالاحداث تخص الرواية وارجوا أن تصبرون لأن ما انزلها الا بعد أن اكمل كم بارت هذا فقط للتشويق
******
الساعة ٣٠ :٢ بعد منتصف الليل
مدينة الرمادي
التاريخ. ١٧ / ٢ / ٢٠١٤
دخلت البيت جنت راجع من المضيف مستعجل بعدما جاني اتصال جنت منتظره
لفيت شماغي تلثمت بي وسحبت الفروة جانت على جتافي شمرتها اول ما دخلت المطبخ ،، بسرعه دخلت غرفة وليد هزيتة من جتفه فز من نومته طمنته بسرعه
_ هذا اني فاتك فز كوم ماعاد النا ظلة هينا انده امي والبنات خلهن يطلعن الجنط وحطهم بالسيارة بينما اجيب اهلي
عفته وطلعت فوك دفعت الباب وفتحت الضوة سحاب جانت صاحية تنتظرني مثل كل مرة اتاخر متلفلفة باللحاف من شافتني نزلت من فراشها
_ ابو رعد خير تاخرت
_ ساعديني نزلي الجنط وينهن ماشوفهن
تلفتت بالغرفه ادور عليهن اريد انزلهن
_ بغرفه خالتي المغرب نزلتهن
_ ليش تعبتي حالج وانتي مابيج حيل
_ لاتخاف علية مابية الا العافية
_ عجل نزلي انتي ورعد وانتظري يم امي الحجية والبنات بينما اشوف رحمه
شهكت بخوف
_ فاتك بس لاصارت صدك
_ اي عز الله صدك ،، يلة يبوي همي حالج لاتبقين تتصفنين عينيني
_ أن شاء الله
عفتها واني ادري بيها راح تتحضر ماتخلي شي ينكص رغم حملها المتعبها بس ماتكدر الا تساعد
طلعت لغرفة رحمه فتحت الباب جان الضوة مفتوح والغرفه فارغه لاهية ولا ابني وين راحت هاي طلعت ادور عليها لاكتني سحاب شايلة رعد ولابسة مكملة
_ وينها ام محمد ماشوفها بغرفتها
_ مدري عنها صعدت من المغرب كالت تنوم محمد
عفتها وفتت ادور بالغرف الباقية والحمامات ورجعت للغرفه التفتت عالكنتور بسرعه فتحت البيبان باقية ملابسها بس الذهب ماكو
طلعت بسرعه واني افكر وين راحت يجوز يم امي واني مانتبهت
نزلت الدرج اسمع أصواتهم بالمطبخ وبرا طلعت ادور بالوجوه الكل موجود بس رحمه ومحمد ماكو سالت امي جانت متلفلفة بعابتها
_ يمه وينها ام محمد !!؟؟
_ وينها بغرفتها فوك
رد أبوية الي جان صافن وخاطرة متكدر مايريد يعوف البيت والمضيف صار يومين اقنع بي لحد ماقبل يجي ويانه
_طول خلجك لاتوج بسرعه خل البنيات يشوفنها
حسيت شي غلط التفتت عالبنات خواتي عنود ومهرة وبعصبية .. وحدة منجن تشوفها وين ولت بسرعة ماظل علينا وكت
ركضن لداخل واني أشرت للبقية يصعدون السيارات لأن جماعتنا متحضرين نطلع سوية
وليد التفت علية وحجى ..
_ ابو رعد جنطتك بسيارتك حطيتها
_ خوش عجل اصعدوا والبنات وياكم وأبوي وامي بسيارتي هم واهلي
( شيخ فاتك يقصد اهله نسوانه سحاب ورحمه )
_ خالتي ام اسحاق يرحون بسيارة تيمور
_ وينو اسحاق مارجع
_ كال ينتظرنا يم مدخل المدينه يوصلنا ويرجع للمقر
_ بعده مصمم مايروح ويانا
_ تعرفه راسو يابس وابوية كال خلو براحتو الكاتبه الله مامنه مفر
_ لاحول ولاقوة الا بالله
