رواية #ذئاب_الحنين
الفصل الثالث والخمسون
بقلمي : Jawhara
**********************
** أريدكَ ولا أعلم كيف أجذبكَ لي . .
أبحثُ عن تفاصيلك . . وأرتبُ الكلمات لكَ . . علها تأتي بكَ . . .
** كل شيء يسقط من عيني إلا أنتَ . . حين سقطت من عيني حملكَ قلبي . .
** لا شيء أجملُ للأنثى . . .
من وطنٍ كالرّجل . .
تأوي إليهِ وينتمي إليها
*********************
فاتك الي كور شفايفو ورفع حاجبو لقتادة
_ انت مو طلبت تحجي وياها وكلتلك موافق
شوكت هاي كبل جم شهر يمكن !!؟
_ يخوي لهذا يومنا لا متصل عليها ولا سامع صوتها بموبايل
التفت فاتك على مكان مهرة الي اختفت مدري وينها عكد حاجبو ..
_ اسمع يول تحجي وياها وكبال العين تكونون واختصر لاتبقى تحجي قصة حياتك
_ والله غربلتوني الله يغربل عدوينكم انت من جهة وأبوي من جهة
_ اسمع دير بالك على اخيتي تحجي كلمة ورد غطاها وتجي تنزرع هينة بسدي تا تهفي للحمات لا يعطبن
_ والله انت بطران أنا بيا حال ترى من اتصلت علية جنت بسد الشط اتابع شغل الشفلات للحين ماكملو وعفن قهار يمهم
_ عجل شوكت تذبون سبيس للشارع وتبلطون ؟!!!
_ على بداية الأسبوع يمكن الاحد
_ أنا خابرتك كلت تجي تغير جو هينة بما انك نسيبي
ابتسم قتادة تك خد ..
_ نسيب بالاسم شوكت اعرس واخلص صار سنين انتظر بنت عمي تكبر كافي طفرتو روحي
_ هانت هالشهر تعرس ونخلص منك ومن هاي ملحتك اكلت راسي
اسحاق الي يكلب باصياخ اللحم خزر قتادة بس بداخلو مبتسم عليه يدري بي مسكين صارلو شكثر منتظر حب يمنجده ..
_ وين رايح دك ثكل ليوم العرس
_ يول صكعك الله خليني اتنفس ترى كتمتوني
عافهم وراح يتمشى للمكان الي لمح مهرة بي
سلم عالبنوات الي رجعن وعافن مهرة لوحدها
،، المكان قريب مو بعيد مزروعه أشجار نخل وتفاح والمزرعه بيها چثير من الخضرة
عدل شماغه لونو جوزي واسود لافه على راسو ودحك عليها بسد النخله واكفه منزله راسها
_ السلام عليكم ،، يول يمهرة شلونج يول تغربلت من وراج !!!!
شهكت والخجل يقرأ الف خدودها احمرت وهي تتذكر انو عارف وعندو علم بسالفتها من أجلت العرس گلبها يدك سريع يربي والله خجلانه خرب حظي انت اجابك اليوم لا والمصيبة عندو علم أنا أول يوم موعد شهريتي حاسبها اكيد لأن كال راس الشهر العرس يعني بعد خمس ايام وانا اجلتو لأن موعدها وفاتو يومين على السالفه وهاي أنا أول يوم
مسحت وجهي واستعدلت بوكفتي ..
_ وعليكم السلام هلة قتادة
_ شبيج وجهج اصفر ؟!!!
بلعت ريك ونزلت راسي ..
_ مابية مجرد تعب بسيط
_ اها لايكون الي على بالي ؟!!!!
فكيت عيني ورفعت راسي وانا اردو بسرعه دون تفكير ..
_ عزة بعينك !!!!!!!!!!
تلفتت اريد أنهزم والله ولا ابقى وياه لحظه شلون فشلني متت خجل وربي
مشيت عنو تا اخلص سحبني من ايدي وهو يلتفت على جهة اهلي الي ملتهين بيناتهم
ممنتبهين علينا
سحبت ايدي بسرعه وحطيتها ورى ظهري
_ شبيج يولي راح تموتين ترى متزوجين بيناتنا عقد شرع الله وجم يوم وتصيرين عندي ،،، أن شاء الله تبقين بهاي سوالفج !!! ؟؟
ردت مهرة مرتبكه ..
_ ماريد افكر خلها لوكتها
_ عجل ارتاحي شبيج متوترة
_ قتادة انت تحرجني مدري متعمد مدري لا
_ لا ترى من حرصي عليج والله لو اريد أخلي كلشي بموعدو والعرس باقي بوكتو بس ماحبيت اشوفج تعبانه ومرتبكه اريدج تهلين علية بكامل نشاطج
غمزلها بعينه شهكت مهرة وبعدت خطوات راح يمشي وياها لمكان كعدتهم ..
_ ليش متردين على اتصالاتي تالي وياج !؟
بصوت ناصي عاتبتو ..
_ هذا بحث آخر تستاهل ما احجي وياك
التفت عليها وكف وهي تلقائيا وكفت وعينها نزلت بمستوى صدرو ..
_ عقوبة مسويتلي مو ،، طيب تجين عندي ساعتها ما ارحمج
رفع حاجبو وهز راسو يتوعدها
_ تهدد ،، مامليت من زمان هذا طبعك وياي
_ لأن ماتجين للدرب الا بهاي الطريقة
_ ما اقبل تحجي هيج وياي كبرت ومابقيت مهرة الي جانت بالاعداية
حك طرف خشمو ..
_ سبب واحد مايخليج تردين علية من اتصل ؟!!!
_ تهددني ما أقدم اوراقي تا اتوظف هذا سبب كافي
_ والله !!! وترديني أحيد عن رأيي لا بالله ماحزرتي يمهرة
عافها وراح يمشي بخطوات ثابته ومهرة عينها عليه صافنه بكلامه
