الفصل العاشر
بقلمي: Jawhara
*******
( احيآناً ..نحتآج ان نُدون أحلامنآ ع أورآق الانتظار ونجمعها فِي تراكمـات ” الوقت ” !صحيح لا نقدر ان نعلم مكانتنا بقلوب بعض النآس ، لكن نستطيع ان نشعر بها من تصرفاتھم )
********
_ الحمدلله تطمنتي وان شاء الله ربنا يرزقج اخي لوليدج
_ الله كريم خالة
_ اكلج شوكت يعرس اخوج صدك شهر الجاي
_ لا عبدالله يلح على أبوية الا هالاسبوع
_ مستعجل عبيد خل يصبر شبي مصركع عالزواج
_ ههههه يحب البنت يخالة وماصدك أهلها قبلو
_ الله يسعده عبيد خوش عبيد
_ اي اخوية يستاهل كل خير
_ خالة احجي وية فاتك يخليني اروح يومين ثلاث أرتب وياهن تدرين بميساء مو هلكثر تنطي نفسها للشغل وصابرين صغيرة ماعليها اعتماد
_ من يجي اكلو تا ترحين عجل شوكت توكفين لاهلج إذا مو بعرس اخييج الله يحفظه هو هالوحيد
_ هسة على جية واحجي وياه فدوة خالة
_ السلام عليكم
_ وعليكم السلام هلة يمة وليد عجل الشيخ وينو
_ راح للمضيف هو وفاتك واسحاق واجى قتادة يلة غداجن حاضر
_ اي اخذ السفرة والخبز وياك بينما اصب الغدا كومي سحاب حضري دولكات اللبن والكلاصات
_ أخذ وليد السفرة والخبز وسأل على مهرة
_ رجعت مهرة من المدرسة لو بعدها
_ شو بعدهي عجل اسحاق ماراح عليهن هي ووردة
_ هسة اساله يلة صبن بينما اودي البيدي
بالمضيف أخذ اسحاق السفرة وفرشها ووزع الخبز
ساله وليد ..
_ مارحت تجيب البنوات هسة وكت رجعتهن
_ اي والله بس وصيت تيمور هو يرجعهن
_ لحد هسة مارجعن اتصل من يمك عليه
طلع وليد يجيب الغدا واسحاق اتصل على اخوه
قتادة يسمع وساكت وباله يم مهرة بداخله عتب على اهمال تيمور المفروض اخوك وصاك تروح وترجعهن مو يبقن مزروعات اباب المدرسة فرجة للرايح الراد
طلع من المضيف للحمامات الملحقه بي تا يغسل
سمع اسحاق يخابر اخوه يحجي عليه ..
_ وينك عجل انا شوصيتك الصبح
سده وضم موبايله التفت على أبوه ..
_ تيمور مارايح عليهن يكول نسيت ويتاخر بالرجعه
_ يبوي واحد منكم يجيبهن هاي وردة خوافه من تتاخرون عليها تبقى تبجي
_ مو وحدها وياها مهرة هسة اروح عليهن
طلع اسحاق وبالباب صادفنه البنوات مهرة صايرة عصبية وشمرت جنطتها بدون ما تسلم على اخوها ..
_ كولو ذني نعجات اثنين تا نروح نرجعهن واكفين اباب المدرسة وننتظر شنهو ماكلتو اخياتنا تا نرجعهن
خزرها اسحاق وأشر لأخته وردة تروح للبيت
ماحجت وردة راحت بسرعه لان تعرفه راح يعصب خصوص إذا مهرة تلاسنو
_ صوتج معثورة شعندج طابة تلعلعين
_ عجل تعوفونا ما بحالنا اهم شي عدكم شغلاتكم وينو أبوية الشيخ الا اعترض واسولفو عليكم خل يرزلكم
توجهت للمضيف بعصبية ماحست الا ايد اسحاق كبست رأسها تلها من حجابها وكفخها على ضهرها وزمخ بيها ..
_ والله انتي يراد واحد يكص لسانج كلو صوج أبوية مطيج عين
سحبها للبيت جدام قتادة الي جان صافن عليهم صح ضاج من شاف اسحاق كفخها بس ماحب طولة لسانها على اخوها الجبير
لاكاهم وليد شايل الغدا ماحجى راح للمضيف يعرف باسحاق من يتصرف هيج يعني قلة ادبها عجل خلو يادبها هالمصركعه
