رواية #ذئاب_الحنين
الفصل السادس والاربعون
بقلمي : Jawhara
********************
إذا كنت تحب بصدق فتوكل على الله . .
ولا تفقد الأمل . . .
وإذا كنت كاذباً فارحل . . .
وتحدث عن القضاء والقدر.
*******************
صفوان ..
وصلت السماوة تا أعزي اخوي وصاحبي ساهر والله فاجعه لاحول ولا قوة الا بالله العلي العظيم كلش متأثرين اهلة ماكول الا الله يصبرهم ويعينهم حسبنا الله ونعم الوكيل على كلمن جان سبب باستشهادهم
بقيت وية ساهر وانا حركة گلبي مثل حركة گلبو وأكثر إخوته بعمر داود واكبر وانا اتذكرت اخوي بيهم اوف شلون قهر الله يصبرك يساهر والله انو قهرة داود باقية بگلبي مايوم نسيتو
ورى ثلث ايام رجعت لبغداد مايدرون بية اليوم اوصل اتصلت بيهم اول يوم خابرت أبوية وطمنته وصلت السماوة وثاني يوم اتصلت على ازور حجيت وياه هو وامي ،، ملك ما خابرتها ولا هية اتصلت ،، جان وكت الظهر من وصلت البيت وانا الدنيا مقفلة بعيني تلكتني امي سلمت عليها ورحت سلمت على أبوية سالت عالولد كالت بعدهم ماراجعين
تلفتت بالبيت ملك مالها حس ،، صعدت لغرفتي فتت اشوفها منسدحه عالفراش من انتبهت علية كعدت ونزلت من الجرباية وعينها علية
سلمت عليها ورحت اخذت ملابس ومنشفه طلعت أسبح حتى ما انتظرتها ترد على سلامي أو اطلب منها تحضر ملابسي أو حمامي
طلعت من الحمام جان وكت صلاة توضيت ورجعت لغرفتي تا اصلي هي مموجودة صليت ونزلت جوة يم اهلي جانو بالمطبخ يحضرون الغدا واخوتي موجودين سلمو علية ازور وعادل وكعدنا كلنا بالمطبخ
فرشت ملك السفرة وامي تنطيها مواعين الغدا ،، نبهت عادل يفرش السفرة بدل ملك الي تشتغل وهي منزلة رأسها جنها ضايجة
من رتبت السفرة طلعت وامي صاحت عليها تجي تتغدى اسمعها تكول ما أشتهي
تغدينا وشربنا جاي امي خدرته حتى المواعين ادحك عليها واكفه عالسنك وغسلتهن عجل شنهو شغلج تردين امي تخدمج وهي ماصدكت يوم تزوجت تريد وحدة وياها تونسها وتعينها بشغل البيت ،، طلعت لغرفتي
صارت بوجهي تريد تنزل جوة سحبتها من ذراعها ودخلنا الغرفه وسديت الباب
صحت بيها ..
_ شلووون تعوفين امي لوحدها تغسل مواعين وتخدر جاي !!!!!
_ عبالي عندك سالفه !!!
_ احجي عدل لا اعدل حلكج
نترت بيها ماعجبني ردها علية ،،عينها بعيني ماكسرتها وهذا خلاني اعصب أكثر كضيتها من حنجها ..
_ من احجي ماتراددين هيج علموج اهلج
_ ما اسمحلك اجيب طاري اهلي وبعدين سالفه ماتعجبني ارد عليها
_ اخر مرة تردين حجاية بحجاية و تنزلين جوة تساعدين امي بشغل البيت وماعيد بعد كلامي
عفتها ورحت مددت بفراشي ماطايق حتى نفسي مو عاد ملك
،،،،
ملك ..
نزلت جوة بعد ماصعدت الغرفه هاي زواج عشر ايام وهيج يتصرف وياي عجل إذا عدى جم شهر شيسوي بية يربي شكثر ايدو توجع اخ شلع حنجي ،، شبي هذا ولا عبالك عريس والله اليشوفنا يكول صارلهم سنين متزوجين ومالين من بعضهم ،، غمضت عيوني مقهورة وانا اخمن انو زواجو مني فاشل وهو مجبور بية والا ليش هيج يتصرف حتى مايتقربلي والله لوما أخذني بليلة العرس جان كلت الرجال هذا بي شي مو طبيعي جريت حسرة وذبيتها وبقيت كاعدة بالمطبخ اجتي عمتي سالتني ..
_ وينو صفوان ؟! وليش انتي هينة وحدج ؟!!!
_ بالغرفه يمكنو نام
_ وانتي هينة لا بنيتي مكانج وين يكون رجالج يلة الله يرضى عليج لاتبقين كاعدة بالمطبخ
سكتت مارديت عليها شوف البخت حتى بالمطبخ ماتريدني اكعد والله مالي نفس اروح اكابلو واكعد
طلعت من المطبخ وصعدت الغرفه بهدوء تا لايحس علية إذا غافي
اول مادخلت عيني اجت بعينو كاعد حاط ايديه جوة راسو رحت كعدت على طرف الجرباية وأخذت موبايلي فتحتة التهي بي شسويلو هو مايريد اي تواصل وياية أنا على شنهو ارخص روحي هسة لو ينطيني إشارة تلميح انو يريدني تا اتقربلو والله ولا يمه السالفة ولا عبالك وياه شابة وعروس خرب شككني بروحي والله معقولة ينفر مني احتمال يشوفني محلوة !!!!!! عند هاي الفكرة تنهدت بصوت واضح يمكن انتبه لأن تحرك لجهتي من حسيت الفراش انضغط يعني صار قريب علية ،، ما اهتميت كعدت اراسل بيداء شفتها نشط تا سولف وياها رسائل ماحسيت الا موبايلي انخاذ من بين ايدية شهكت متفاجئة ولقيت رأسي تا شوف صفوان منتجي على ذراعو وعينه بموبايلي سده وذبه على مكتبة السرير ،، كورت شفايفي بس ماحجيت بقيت انتظره يعلق يكول شي ،، ولا حرف بقى ساكت ويدحك علية نزلت راسي ونزل شعري يغطي وجهي رجف گلبي من أيده سحبت خصلات ناعمة من شعري وذبها ورى متني
كعد وتقريبا صرت بحظنه منطيته ظهري بكعدتي نزلت ايدو تمسد ركبتي وظهري تقرب أكثر وباس ركبتي جوة اذني بالضبط مكان شامه صغيرة لونها جوزي حسيته صافن بيها من رفع شفايفه بس نفسه قريب احس بي على بشرتي ،، بداخلي حبيت يتقربلي يكون هو البادي تا يحسسني انو مهتم بية عندو مشاعر الي جفلت أكثر وبين علية من حصرني بحظنو وايدو على صدري
شفايفه طبعت بخدي باسني بقوة ودفعني بهدوء عالفراش وهو يتقرب أكثر ساند جسمه على ذراعه وأيده على خدي نزلت تلامس طول ركبتي. وبقاها أعلى صدري ،، ما انكر خدرت وانا أتلقى هاي المشاعر والايحاءات من صفوان لكن فجأة ابتسم تك خد ..
_ هذا الي تردينو تا تصيرين هادئة مو ،، عجل وينو لسانج من تراددين كبل شوي
عضيت شفتي مقهورة وانا احس نسف كلشي حلو حسيتو لحظات ،، نفضت ايدو من صدري ودفعته اريد انزل هذا الظاهر يريد يلعب باعصابي وبمشاعري تا يريد يذلني بس والله ولا انطي مجال يمكن عبالو أنا ضعيفه حال واستجدي مشاعر هه هين يا صفوان مو ملك الي ينلعب بيها أنا تربية سلطان مو حي الله بنت
وكفت ورفعت حاجبي وانا احاول اسيطر على اعصابي ..
_ تريد شي مني !!
رمش بعيونو ونزل من الفراش اجى علية حط عينه بعيني والله ولا نزلتها تاشوف وين يوصل
_ وشنهو برأيج الي اريدو منج
نظراتو على كل جسمي استفزني هسة وانا الي احاول اسيطر على اعصابي ،، يربي هذا حال اثنين عرسان بزون وفارة شهنو ،، والله كرهني بالزواج
رديت بصوت ناصي كلش ..
_ مدري عنك كلت أسألك كبل ما انزل جوة
