ذئاب الحنين

الفصل السابع والثلاثون

رواية #ذئاب_الحنين
الفصل السابع والثلاثون
بقلمي: Jawhara
Neren alobeidy
*******************

ملاحظه : عزيزاتي أنا تنزيل يوميا انزل البارت رغم مشاغلي لكن ملتزمة وياجن والبارت اكتبه من ٣٠٠٠كلمه وأكثر ومرات يصل ٣٥٠٠ كلمه أما من يكون بارت قصير حسبما تكولون فأنا انزله مضطرة لأن كثير يدخلولي يردون تنزيل حتى يعرفون الأحداث فاضطر انزله قصير لخاطرهم ،،انتم ماتعذرون الكاتبة تردون فقط تقرون مايهمكم إذا كانت الكاتبة عدها ظروف والتزامات ((( لذا بعدما كان التنزيل يوميا انزل بارت بين يوم ويوم ))) .نقطه راس سطر لأن الظاهر الكاتبة لو حتى تلتزم وياكم ماتخلص من الانتقاد
احترامي للجميع واتشرف بجميع متابعاتي ومن يقرأ رواياتي 🌹
البارت اليوم ٣٣٢٣ كلمه

**************

** احبّك . . .
وبداخلي ألف نبضة تخاف فقدانك

** أكره نفسي عندما تبعد عني . .
ويصبح مرور الوقت طويلاً بالنسبة لي . .
ولا يجول برأسي سوى التفكير بك . .
ولا أفعل شيئاً سوى القلق عليك . .
كم أشتاق لحديثي الطويل معك بالساعات
وكم أشتاق لضحكتك التي ترسم على ثغري الابتسامات.

****************

سلطان ..
من يوم الي زارتني بيداء وأبوها بقيت انتظر تعيدها طولت توقعتها ترجع وانا عيني على باب الغرفه كلما ينفتح اتوقع دخلتها علية وانا بخاطري هالشي طول الايام الي كضيتها بالمستشفى كل اقربائي واصدقائي ومعارفي زاروني الا بيداء كانو زيارتها جانت حلم يمكن اتخيل تنهدت وانا اتذكر وكفتها بسدي ونظرتها الخايفة وهي تقرأ أدعية وترقيني ..
نزلت رجلية من السرير الي حطه عاهد بالاستقبال تا ابقى مرتاح خاطر من يجي ضيف ابقى بفراشي بدال ما أنزل من غرفتي وهذا شي صعب علية فاستقريت بالاستقبال حتى بالمضيف ما رحت
وكفت ونزلت ايدي المربطه بشاش وضمادات على طولها لمستوى الرقبة وراسي بعدو مضمد بس شاش خفيف ولصقات
طلعت برا تا اتمشى شوي مليت من النومه بالسرير ،، جريت نفس قوي وانا اناظر للحديقه منظرها يفتح النفس بهيج ساعه جان الوقت ساعه سبعه الصبح الكل نايمين
مشيت رجلية بيها وانا احاول اكتم احساس داهمني بسماع صوت بيداء كعدت على اقرب كرسي بالحديقة وحطيت ذراعي بحظني تلمست الشاش يرادلو تغيير
رفعت راسي لصوت عاهد صبح علية ورديتلو واجى يتمشى وكف كبالي وسألني بقلق
_ خوما تعبت ليش كاعد من الصبح !!؟
_ مليت من السرير كلت امشي رجلية
_ شنو رايك نتريك هينة بالحديقة الجو حلو بس خل اشغل البنكة ( المروحه) الأرضية

شغلها عاهد ودخل البيت جانت زوجته فادية تحضر الريوك لأن متعودة تكعد من الصبح تحضره تا يتريك ويطلع للدوام وبهاي الفترة كضاها اجازات لخاطر سلطان من طلع من المستشفى رجعوا الرمادي كلهم مابقو ابغداد
وصاها تحضره واجيبه بالحديقة تا يتريك هو وأخوه

من تريكو عاهد ساعده يسويلة لفات ويحط جدامو لأن مايكدر أيده مضمده ومايرتاح بيد وحده
كمل سلطان وشرب اخر قطرة من الجاي رفع رأسه لأخوه الي سأله ..
_ ماناوي تحجي وية شيخ يعقوب تا يرجع مريتك
_ لا
رفع حاجبو متفاجىء من كلامو هو يعرفو مشتاك بس يكابر لأن متاكد لو حتى حاول ينكر ،،هالشي سمعو منو جان يهذي باسمها من ارتفعت حرارتو بوكتها ماحب يحرج اخوه وبقى ساكت مو وكتها يداهرو
_ متاكد !!!
ميل سلطان راسو من شاف نظرة عاهد وابتسامه تتلاعب بشفايفه رد بهدوء ..
_ وليش ماكون متاكد ؟!!
_ عجل الي يسمعك قبل أيام بالمستشفى وانت تهذري باسمها يكول ياويل حالو هالسلطان شلون عشكان
ضيك نظرة عينو يحاول يفهم ويتذكر شوكت صار وياه هالشي ماحزر
_ انت تبالغ وتريد تروزني ( تروزني معناها تختبرني ) تا تشوفني شأكول
_ هههههه والله حجيت الصدك ماجاي اروزك
_ ترى وريتني أنا شوكت حاجي
_ من جنت بالمستشفى مصخن متدري بروحك كمت تهذي وانا سمعتك
سلطان خزرة بطرف عينو ..
_ وبعد شنهو سمعت !!!؟
_ ما اتذكر بس هالكلام لزك بدماغي هههههههه تطمن اسرار دولة ما اطلعها
_ اي وهذا العشم بيك
_ صدك بمناسبة سلامتك عكب باجر العزيمه نسوي غدا واليوم أمر عالكصاب يحضرلنا ذ ب ا ي ح
_ ليش تكلف روحك يخوي
_ افا شعندي غيرك يخوي الله يحفظك
_ مشكور يبو عزوز كفو منك
_ كفاك الطيب ،، يلة اتوكل للدوام محتاج شي مني
_ سلامتك يخوي
طلع عاهد بسيارته وسلطان دخل البيت يأخذ علاجه ويمدد شوي بالفراش