روايه #ذئاب_الحنين
احداث لاحقه بعد سنوات
بقلمي: Jawhara
********************
حبايبي 🌹 هاي احداث صارت وية صفوان وملك
انتظروني باجر انزل البارت
*******************
صفوان ..
كاعد بظل ألأشجار وعيني على ابني الي عمره ما يتجاوز الست سنوات كاعد يلعب وية الكلب البوليسي بالحديقة التابعه للمضيف جريت حسرة وذبيتها وعيوني محاوطه وليدي استشعر بكل تفصيلة تخصه وبكل حركه يتحركها قتيبة ،، انتبهت موبايلي يرن فتح خط بدون مايحجي لأن منتظر هالاتصال هذا من اسبوع
.
.
.
.
سده بعدما تطمن مبدئيا انو اليريده قارب يصير وكف وصاح قتيبة الي ترك رافي مثلما مسمي واجى يركض لابوه
_ حضر روحك راح نطلع هسة شوف جدتك خل تحضرلك ملابسك
_ وين نروح !؟
_ لاتسال اني شنو علمتك
_ صار يابة
رد على أبوه ونزل رأسه مستحي لأن أكثر من مرة يكله هاي الكلمه ترك أبوه وراح يركض للبيت
_ جده ،، جده
_شبيك بعد جدتك واهلها ليش تركض وتصيح
_ تعاي حضري ملابسي للطلعه ابوي ياخذني وياه
_ وين تروحون
_ ماكال ،، يلة جدة بسرعه لا يعصب ابوي
دخلت لغرفة قتيبة وفتحت كنتوره الي من ثلث ابواب طلعت بنطرون وتي شيرت وذبتهم عالجرباية
_ البس بينما احضر حذائك والجواريب
لبس قتيبة بسرعه ومشط شعره الي نازل لمستوى حاجبه بقصه مرتبه وبعدها أخذ يلبس جواريبه والحذاء
من طلع صاحته ..
_ حبيبي تعطر شعجب نسيت
رجع وهو يضحك
_ يوه والله من الاستعجال هسة ابوي يعصب علية
بخت جدته من العطر وباست خده
_ الله يحفظك بحفظه ويبعد عنك شر الحاسدين
طلع وجدته طلعت وراه تطمن متعودة على هالشي وهم تريد تسال ابنها سبب هالطلعه من الصبح ،، صاح عليها ابو صفوان
_ شعنده قتيبة مخبوص
_ مو تدري من يطلع هو وأبوه ينخبص
_ وينها مرية ازور ماكملت خبز تا تسويلي فتيتة ( خبز حار بالدهون الحر )
_ برجال مو زين عليك ضغطك يرتفع
_ ماعلية شي بس خل تستعجل
دخلت مرة ازور بيدها صفطه الخبز ..
_ تدلل عمي هسة اسويلك
_ الله يرضى عليج يبوي
،،،،،،
صفوان
التفت على ابنه واشرله يصعد وبقى ينتظر أمه طلعت من جهة المطبخ يعرفها تريد تعرف وين وجتهم
_ قبل متسالين طالعين لمشوار من ارجع احجيلج عنه
_ بحفظ الله يمه ردت اتطمن عليكم
تقرب دنك باس راسها
_ تطمني امي أن شاء الله خير
_ أن شاء الله
صعد سيارته البيضا احدث موديل وأشر لامه بيده
يم البوابة الي يتصل بيها سياج عالي يحيط البيت الجبير تقرب واحد من زلمه الي يشتغلون وياه ،، نزل الجامه وحجى وياه
_ عينك عالبيت وبلغ جماعتك احتمال نتأخر ما ارجع لليل
_ تامرني حجي
سلم عليه وطلع بسيارته ثواني وحركت سيارة ثانية تتبعهم من سيارات جماعته
اتصل عليهم
_ ريكان ارجعوا ماريد أحد يتبعني
_
سد موبايله والتفت على قتيبه الي عينه عالطريق وابتسم تك خد وهو يشم العطر
_ ها بابا قتيبة شنو هالعطر الطيب
التفت على أبوه الي رجع يركز بالطريق
_ جدتي غركتني بي شسويلها
_ ههههه بس طيب عجبني
_ من ارجع انطي الك
_ كفو
