رواية #ذئاب_الحنين
الفصل الرابع والثلاثون
بقلمي: Jawhara
******************
الحياة رواية جميلة . .
عليك قراءتها حتى النهاية . . .
لا تتوقف أبدا عند سطر حزين . .
قد تكون النهاية جميلة.
******************
شيخ شديد ..
دخل البيت سلم عليهن كاعدات يسون الغدا
وسأل على وردة
_ وينها بنيتي !؟ صيحنها تجي
كامت سالي صاحت عليها ورجعت
_ هلة يابة شلونك
باست ابوها ودنجت على ايدو تبوسها ،، حظنها وطلع من جيبو فلوس ..
_ هلة يبوي هلة بنيتي مبروك نجاحج وهاي هديتج شتردين اشتري بيهم
أخذتهم وردة دحكت بيهن وكالت لابوها ..
_ مشكور يابة بس هذن چثيرات
_ مو چثيرات على بنيتي خل اسحاق لو تيمور ياخذوج للسوك والتحبينه اشتري
ام اسحاق بفرحه ردت ..
_ الله يطول بعمرك ويزيد خيرك
_ هاي بنيتي الصغيرة تستاهل
كعد يمهن وسأل ام اسحاق ..
_ شنهو غداجن !!
_ الوليدات رادو كبة ونواشف وياها وسويت شوربة هرطمان
_ اي طيبة كلها نعمه من الله ،،عجل اروح للمضيف وارجع اتغدى هينة
_ أن شاء الله ورى اذان الظهر السفرة محضرة
طلع ابو فاتك التفتت على سالي ..
_ خفي ايدج يمه تا نكمل من وكت
_ أن شاء الله عمة مابقى شي
_ عجل اكوم اشوف الشوربة ،، تعاي وردة سوي زلاطه
ورى ساعة جهز الغدا والكبة كلتها سالي وقسمتها بمواعين
طلعت ام اسحاق ماعون وعزلت بي قسم
_ وردة من تكملين الزلاطه أخذي هذا الماعون لبيت ابوج
_ عمة افرش السفرة واروح أسبح
_ روحي بنيتي أنا افرشها هسة زلمتج على وصول
بسرعه سبحت ورتبت روحي ونزلت إذن الظهر صليت بغرفه وردة ،، بعدها التمينا بالهول مدينا السفرة وكعدنا نتغدى أنا دوم كعدتي بصف اسحاق ما اغيرها الا إذا كعد واحد من أهله اضطر اكعد باس مكان من السفرة ،، احب حتفه وذراعه من يطخ بجتفي ومن يداريني بدون ما أهله يحسون عليه يقسم من الخبزة ويحط جدامي لو يقرب الماعون من جهتي يأخذ كلاص الماي لو اللبن قبل ما اشرب يشربه ومن يبقي شوية اشربه أنا. اووف تفاصيل صغيرة واحتمال البعض يشوفها مو مهمه بس انا غير أنا احساسي يتضخم وانتمائي لاسحاق يزيد يربي اعشك عالرجال بكل تفاصيله
سحبت كباية جنت مسويتها جبيرة ومليتها حشوة خليتها جدامه وندسته بزنده شالها وقسمها اثنين نطاني حصة منها اعترضت وبصوت ناصي ..
_ سويتها الك
شالها وبقى مادها بيده اخذتها وانا انزل راسي مبتسمه
من كملنا الغدا عمتي كالت وردة تلم السفرة وتغسل المواعين وانتي جيبي الچاي إذا خدر
_ عمة بس اساعدها
_ هي تلمها بنيتي ذيبة
رد تيمور الي كاعد بصف أمه ..
_ وانا اشهد وانا اشهد ،، سويتيها ذيبة وهية من خيالها تخاف وتشرد ههههههه
_ تيمور لاتضحك على اخيتك هاي حبيبة ابوها
_ اي بعد وردة ما تنجرع شيخ شديد بظهرها
_ يابة تيمور يغار مني
_ ههههه ولج اكوملج امردغج ترى
_ لاتحجي علية بعد
_ اداهرج يولي عود جيبي فليساتج الي حصلتيهن مالات نجاحج شكد صارن
_ ما انطيك منهن بعدين انت وينها هديتك كل اخوتي انطوني حتى رحمه وسحاب بس انت مطنش بخيل
_ هي مصكوعه كلها موجبتج وتردين مني هو انا مصروفي أخذه من ابوي لو فاتك
_ اي صدكتك طلع منهن مليان فلوس انت
_ منين جبتي هالحجي ولج
_ وشغلك انت واسحاق مو ينطيك مرات
_ اي حطي عينج علية تا يطيرن
_ هههههه والله انت بخيل بس ما اعوفك يلة لاعب ايدك وجيب هديتي كلها انطتني فلوس بقيت بس انت
_ من تنجحين للكلية احسن هدية اجيبلج
_ يبوو بطلت ماريد منك والله بس أبوية واسحاق وفاتك هداياهم تبيض الوجه ابقى انت جمعهم على گلبك
شالت السفرة وطلعت ،، وأبوها وامها مبتسمين على سوالفها هي وأخوها
