رواية #ذئاب_الحنين
الفصل الثالث والثلاثون
بقلمي : Jawhara
Neren alobeidy
*******************
مساء العافية عليجن حبايبي 🌹 حبيت أنوه للمرة مدري شكد 🙂 القصة أحداثها طويلة لاتجيني يومية وحدة وتعلق احداث بطيئة أو شوكت تنتهي ملينة سرعي الأحداث عزيزتي احب انطي كل شخصية حقها بالسرد القصصي وانا اكتب براحتي اتفنن بالحوارات بين الابطال ،، وشي اخر أنا من انزل احداث لاحقه وتغشيشة ترى مقطع صغير يادوب ٤٠٠ كلمه مو بارت حتى تكولين ليش البارت قصير
بعدين بالنسبة للتنزيل دا تشوفوني انزل يوميا وحتى استراحه مماخذة بعد شوكت كل اربع ايام انزل بارت هاي شلون حجي يابة
ختامها مسك أن شاء الله ،، اتمنالجن قراءة ممتعه ..
صدوك قبل ما اروح الي ممتابعتني تابعيني وردة 🌹
♥️♥️♥️
*****************
صاحت ام اسحاق على ابنها الي صعد سطح الطابق الثاني وسلاحو بيده ..
_ دير بالك يمه اسحاق
_ ارجعي يمه وين لاحكتني ،، طفي الضوة من يمج
بقت واكفه بسد باب السطح بعدما طفت الضوة الي يشرف عالسطح تا لاينكشف اسحاق
التفت من سمع صوت سحب اقسام رشاشة وبعدها بدأ صوت الرصاص وصوت فاتك صاح ..
_ منهووو اسحاق لو تيمور
_ بظهرك يخوي
_ كفوو
من سطح البيت تسيطر أكثر ،،فاتك جان اول من صعد وبدأ يرمي ومن فزيتا عالصوت ركضنا عالاسلحه أنا وتيمور ومندري شنهو السالفة الا صاح وليد وكال حرامية الظاهر
علكناها بالرمي من فوك كلمن لزم جهة من السطح بعد ما صعدو وليد وتيمور
انهزموا الحرامية وهالشي شفنا من صورت السيارة الي شخطوها بسرعه بدون ميشغلون لايتات السيارة
والرمي تركز عليها يمكن صارت غربيل والله تورطوا ونزلوا يحوفون بيتنا ويامن اندكو
نزلت بسرعه وراية تيمور ركضنا عالدرج بوجهي صارت امي والبنات الي الخوف واضح عليهن
_ لاتطلعن مفهوم
عفناهن بالبيت وطلعنا لبرا
************
بيداء ..
شفت المرة واكفه بسد الباب فكرت اطلع عليها مدري ،، أنا ما اعرف احد هينة
انتبهت على امين طلع من المطبخ ..
_ حبيبي ماكملت غداك !؟؟
_ اروح تواليت
_ عجل من تطلع غسل ايديك زين
طبيت للمطبخ ياسين وينو تلفتت وصحتو ..
_ ياسين ياسين ،، وين راح دحكت من باب المطبخ فاتح الباب ويحجي وية المرة طلعت بسرعه وصحته ..
_ يااسسسسين. ارجع للبيت
رجع ياسين مدنج راسو ماحجى والمرة من شافتني كالت ..
_ يمكن غلطانه بالعنوان هذا مو بيت ابو محمد
_ لا خيتي ماعدنا ابو محمد
_ اعذريني سببتلكم ازعاج
_ ماكو ازعاج
راحت المرة وانا سديت الباب ورجعت شفت امين كعد يكمل اكلو ..
_ وينو اخوك !؟
_ بالغرفه
رحت عليه منطيني ظهره ويلعب بالايباد
_ ياسين ماما بعد لاتطلع عالباب معليك انت شلون تفتحو افرض حرامية
رد علية بهدوء ..
_ ما اطلع
_ عجل تعال اكل ليش ماكملت اكلك
_ شبعت
رحت كملت غدا أنا وأمين
ورى ماكملنا وغسلت المواعين قفلت باب المطبخ ودخلت لغرفتي سحبت موبايلي من الشحن واتصلت على اهلي اتطمن عليهم وبقيت اسولف وية امي قريب نص ساعة سديته منها وكمت اشوف الوليدات بغرفتهم
_ حبيبي متنام تا تكعد العصر انت وأمين
رد ياسين ..
_ وانتي ؟!
_ أنا هيمن راح امدد شوية بغرفتي
طلعت وعفتهم كلمن منسدح على سريرة
