رواية #ذئاب_الحنين
احداث لاحقة
حبايبي هذا بارت يعرفكم بالصار وية رحمه وتتوضح عدكم الأحداث
قراءة ممتعه 🌹♥️
*************
كلّ يوم حين أستيقظ أقول سإنساك اليوم أيضاً، كلّ يوم منذ أيام لم يحدث أني نسيت أن إنساك
*************
صفوان ...
غركان بنص ذكرياتي افكر من اول ما طلعوا اهلي واخوتي الي غصبتهم يطلعون لبغداد خفت عليهم وبقيت أنا وحدي بالبيت وعيني على حلالنا ايام مرت وبدت المدن تسقط وحدة ورى الثانية الانبار شبه فرغت من أهلها وذاتا الرمادي الي صفت ضواحيها خراب حلالي الي حافظت عليه كل هالفترة راح وانهب مابقالي الا الشاحنات اتصلت عالسواق وخبرتهم يبقونهن لا يدخلون الانبار اثنين منهم بالاردن والباقي ثلاثه داخل الجنوب اتصلت مرة ثانية على صاحبي عندي من أهل البصرة وكف وكفة زلم وياي وفهمته يبقي الشاحنات عنده لما الله يفرجها
تطمنت على أهلي استقروا أجروا بيت قريب عالعاصمه بس بالاطراف وكعدوا وراد ازور يرجع ماقبلت وين يرجع خل يحافظون على أرواحهم الحياة هنا جحيم والليل كله حراسة لازم ونوم ماكو
اخر شي انظميت وية جماعتنا شباب العشاير شلون ابقى متفرج لا والله مو صفوان الي ينهزم
جنت قبل يومين متعارك وية جماعة هددوني يردون ادفعلهم وعدهم علاقة بد ا ع ش يدرون بية الأمور طاكه وياية سالوني عالشاحنات والسيارات العندي كتلهم ما ادري يمكن تصادرن ماصدكوني وصلت بيهم يغلطون علية ماتحملت نسيت أنا وحدي هينا تضاربنا وتاليها عافوني راسي مجروح وهمة يهددون ينتقمون مني
كعدت الصبح بعدما كضيتها حراسة للفجر صليت ومددت بفراشي اخذتني نومة جنت حيل تعبان وراسي يوجعني من الضربة الي تركو بيها ثلاث خياطات
اليوم اطلع لجماعتنا لازم اكون وياهم لبست بنطروني كابوي وبلوزه سودة وحضرت سلاحي مسدس وياه شاجورين ورشاشة بمخازنها الاربعه لفيت شماغي على راسي وفتت للمطبخ خدرت جاي ويادوب اني واكف شربت كمعين وطلعت بسيارتي دبل قمارة موديل حديث جنت مشتريها قبل شهرين
طلعت بعدما قفلت الباب وبعدني بالشارع مو بعيد واهتزت سيارتي بقوة تلفتت اشوف شكو واني متاكد لو وكع هاون لوهية عبوة بس ماجنت اعرف على بيتنا إلا بعدما نزلت بقيت فاتح عيوني برهبه واشوف بيتنا حياطينه واكعة والباقي متصدع ،، احساس مميت واني اشوف بيتنا هيج والدخان والغبار غطاني وغطى الشارع
صرخت صرخه قوية واني اسحب اقسام من الرشاشة وارمي بيها عشوائي ولساني ما تعب من الغلط القوي والتهديد والوعيد
ناس قليل باقين اجو تجمعوا علية يواسوني واني مو يمهم عقلي طار من الي شفته بيتنا الي أنولدت وربيت بي الي بناه أبوية بتعبه صار خراب لا حول ولا قوة الا بالله
رن موبايلي وانكطع الاتصال لأن شبكه شبه معدومة
شفته المتصل أبوية عبالك گلبه يعلمه ماحبيت اتصل ولا اجيب طاري الصار ماريد اقهرهم
صعدت سيارتي وطلعت للحراسات الي بطرف المدينه شباب لازميها
تلكوني يرحبون بية من شافوني مغبر ومترب سالوني عالصار وحجيتلهم ساندوني وبقوا يسولفون وياي وهالشي خلانا نتمسك بكاعنا وندافع عنها مهما يكون
صاحني واحد منهم صاحبي من ولد آل صايل
_ صفوان يخوي لاتكدر خاطرك العوض على الله وبيوتنا حالها حال بيتكم وشوفنا واكفين ومتحضرين وماننهزم بعون الله
_ لا وحق الله بعد الصار يا اسحاق ما عوف ديرتي والكاتبه الله مرحبا بي
_ كفو يالعضيد حياك الله بين اخوتك
