رواية #ذئاب_الحنين
الفصل الخامس والخمسون
بقلمي: Jawhara
*******************
** بداخلي عقل لا يجيد إلاّ التفكير بِك،
وقلب لا يتقن سوى اشتياقك.
******************
بيت شيخ شديد ..
وصل اسلم وحجية بدوة ساعة ١١الصبح ،، فاتك الي عزم بيت عمه يعقوب والولد كلهم موجودين بالمضيف رحبوا بأبو حمزة چثير وعرفو فاتك عليهم ،،
كعد اسلم وهو يعدل شماغو ويرتب طياته انتبه على دخلة محمد وهو يمد ايدو ويكلو السلام عليكم
سلم عليه واخذو بحظنو يبوس بي
_ يا هلة بالذيب هلة باحميد شلونك عمو مدرستك شلونها
محمد وهو يكعد بسدو ويبدي يسولف وياه
_ زينة بس ماعندي اصدقاء چثير مثل هناك بس نمر ابن جدي يعقوب وصقوري ابن عمي اسحاق
اشر عليهم كاعدين على جهة من المضيف
رد اسلم وهو يبتسم ..
_ اي والنعم ذول الكفو ،، ماحاجة لصديق ذول حزام ظهرك
فاتك انتبه على نظرة اسلم وهو يناظر محمد مسحه حزن واضحه عليه الله يعينو صعبه يفقد اهلو غدر واكيد لكى بمحمد ونيس يهون عليه حزنو بس ليش ماتزوج باقي وحيد
وقت الاذان الكل تحضر للصلاه وعمهم ابو علي صلى بيهم جماعه ،،
فاتك..
طلعت بعدما كملت صلاه تا شوف الغدا جهز مادخلت البيت فتت من الممر بين البيتين وبالخلف مخزن ومظلل بطرمه هناك منصبة الجدورة دحكت الطباخات طافية كشفت واحد من الجدورة زين مستوي التمن وجاهز
،، وينهن عنو عايفات الطبخ التفتت طلعت رحمه على جتفها خاولي من شافتني مضيك حاجبي ابتسمت ..
_ كلشي جهزنا أنا وام صقر ،، وخالتي كلثوم ساعدتنا وباقي النمنمات بالمطبخ البنوات وردة ومهرة قايمات بيهن
_ كفو ام محمد يلة حبيبة حضري الصياني تا نقدم الغدا
_ هاي موجودة بسدك يلة ابدي هسة لو انتظر خالتي ام اسحاق
حبيت اشجعها تعتمد على نفسها ومبينه ماتقصر الله ينطيها العافية
_ انتي كدها يلة يبوي همي حالج اروح اودي السفرة واصيح وليد وقهار ياخذون الاكل
،،، دققت بيها كعدت على تخته وسحبت صينية تا تحط بيها التمن
_ اسحبي الحجاب على صدرج وذبي ردان ثوبج لاتخليهن مبرمات
ابتسمت وانا اعضلو شفتي ،، تقرب علية وهو يتلفت وبصوت ناصي ..
_ حسابج بعدين بالغرفه
كورت شفايفي مارديت عليه ،، ابتعد من سمع صوت خالتي صاحتني ورديت عليها تجي تا نجهز الصياني
عافني ودخل للبيت من جهة الباب الخارجي
_ ها يمه رحمه بديتي !؟
_ اي خالة ابو رعد كال حضرن لما يصيح الوليدات يأخذون الاكل
وصلو وليد وقهار الي سلم عليهن وردت سلامه ورحمه ما رفعت راسها ملتهية تسكب التمن عالخبز الي خالتها تسكب تشريب اللحم عليه وزعت خلطه الشعرية واللوز والكشمش والبزاليا واخر شي رصت اللحم
،،،،،،
بالمطبخ وردة وزعت كاسات الزلاطه بالصينية ومهرة كملت مواعين المرگ
العنود وكفت وبيدها صحن فواكه مشكل حطتو عالميز وأخذت النجانه فرغت ميها بالسنك بعدما غسلت الفواكه
_ يولي وردة الزلاطه يمكن قليلة
_ ها مو وياها خضرة جم ماعون
التفتت مهرة ..
_ كافية منهو ياكل زلاطه كلها تشغل أصابعها بالهبيط
ضحكت العنود على حركات مهرة وهي تقلد بيدها طريقة الزلم بالاكل وردت عليها
_ حافظه حركاتهم يولي !!
_ اي واولهم قتادة ههههه
