بقلمي : Jawhara
***************
** لا شيء أوجع من بكاء الروح
على فراق الأحبة . . .
وشوقها إلى من رحلوا
***************
بيت حجية بدوة ..
اسلم وهو يمسح ايدو بقطعه قماش بعدما فحص محرك سيارتو التفت للحجية الي كاعدة على كرسي كبالو بالطرمه وساندة ايديها على عوجيتها ..
_ يمة اندار عليج چثير لحيتي بهاي السالفة من يوم الي رجعنا من الرمادي وانتي تسولفين بيها
_ انت بس طاوعني ولا تعاند والله ترتاح بحياتك عجل عاجبك هذا الحال
انتجى بظهره على محرك السيارة ..
_ نحمدلله حالي ماشي
ضيكت عيونها عليه ورجعت لنفس سالفتها ..
_ بس عوزك المرة الي تسر خاطرك وناظرك والبنت الي كلتلك عليها خوش اختيار بنت عاقلة وتحجي بالمثاقيل والله من شفتها كلت ماتلوك الا لأسلم يوليدي فكر زين انت عمرك راح يصير بالخمسة وثلاثين ولا تكول مابحال مرة ترى الرجال يضيع بدونها هاي سنة الحياة وانا مادايمتلك عاد تجيك مرية تعينك عالدنيا ونيس الك تكون ،، اقلها بيتك نظيف هدمتك نظيفة ومكوية تحضرلك اكل وچثير أمور تحتاجها لا تكابر وتكول مامحتاج مرة
سكت اسلم وهو يعرف قصدها بالچثير أمور بس مارادت تحجي لا تحرجه
التفت على سيارته سد البنيد وراح يغسل ايديه عالمغسلة وبدت حجاية أمه بدوة تنخر بدماغه ، نفض أيدو من المي وهو يستغفر ربه وراح دخل البيت محتاج كوب چاي ضروري باقي چاي الظهر ماعليه شي حطو عالنار وحظر كوب ذب خاشوكة وحدة شكر ميحب شكر چثير انتظر يحمى وباقي صافن عالقوري ورجع يفكر أكثر جر حسرة وذبها وهو ينتبه لرنين موبايلة موجود برا على حافة شباك المطبخ
عكد حاجبو من شاف اسم المتصل فتح خط ورد السلام ..
_ وعليكم السلام ورحمة الله ،، هذا ثالث اتصال منك وانا اغلس لاحظت لا
_ ههههه اي بالله كلت اطفر روحك اليوم تا ترد علية
_ حجينا وانطيتك عذر اتركني الله يسعدك
_ والله يا ابو حمزة انت خويي وابن عمي وما الكى مثل امانتك الله يشهد
_ بطلت ماصير ابن عمك غربلتني يرجال بسوالفك الله يرحم عم ابوي الي هو جدك
_ هههههه ظنك ابعد من اسمع هالكلمتين انت ابن عمي غصبا على شاربك
_ تخسى يول تخسى كون جدامي لا امرعك مرع وحق الله
_ هههههاااي خلص هدي حالك وعوفنا من هالسوالف بس صدك محتاجك تكدر تجي لبغداد باجر
_ اي عادي بس كون ماعندي شغل باقي بخانقين خل اتصل عالجماعه تا شوفهم خلصو باقي الشغل اليوم ما رحت
_ ابو حمزة اثكل عليك يخوي اعذرني
_ طايح برگبتي شسويلك ،، بس اريد غدا زين
_ تبشر واحلى قوزي لاحلى اسلم
_ والله انك حيال ههههه
_ انتظرك اول ما تصل بغداد خابرني
_ أن شاء الله
سديته ورحت عالطباخ طفيت جوة القوري وصبيت چاي وطلعت برا يم امي بدوة
_ منهو متصل ابن عمك ؟!
_ اي يريدني ابغداد
_ وشعندو !!!؟
_ مدري يمة باجر اعرف
_ لا يكون يريدك توكف وياه بسالفة جايدة ويلوحك طشار
_ لا ما ظنتي يعرف يتصرف مو انا الي اعلموه
_ خل ادش البيت الجو برد ،، شتحب اسويلك عالعشا ؟!
_ لا تعبين روحج باقي من الغدا احمي واكل إذا جعت
_ عجل ردت اسلك بتيته واسوي شوربة
_ ما يحتاج أندار عليج
حجية بدوة دخلت وهي متقصدة تحجيهن ..
_ أنا همين تعيبانه اروح اتوضى واتحضر لصلاه المغرب وامدد بفراشي
بقت عينو عليها إلى أن راحت جوة بالبيت تنهد وهو يذب كوب الجاي عالسنك ويطلع برا فتح الباب وبقى واكف ايديه بجيوب بجامة التراكسود فكر بكلامها. ويا ويلو من هالافكار باليومين هذول
