رواية #حنين_الذئاب
الفصل التاسع والأربعون
بقلمي: Jawhara
******************
مساؤ فل لعيونكم 🌹 هاي وانا مقررة ما أنزل اليوم بارت دا ارتاح لأن مشغولة وماكدرت مدري شبيها هاي الرواية سحر يمكن
******************
** هذا الصباح ليس ككُلّ صباح . .
فعبق طيفك يلوّح بحضورك . .
في كلّ أركان خيالي . .
*******************
ملك ..
أخذني سلطان وعاهد للبيت ،، ماريد اشوفو بعد السواه بية اويلي كسرني احس جسمي مرضوض من الطيحه ،، كسر ذراعي يرادلو شهرين تا يطيب وهذا مر شهر عالصار الحمدلله الجرح الي براسي طاب ،،طلعت من الهول وحاظنه ايدي لصدري بربطه طبية كعدت بالمطبخ جانت بيداء وفادية كاعدات يلفن دولمة جريت حسرة وذبيتها من شفت امي حاضنه غزوان ابن سلطان وبيداء وتوكلو
تذكرت وليدي قتيبة يعمري هسة اكيد يبجي علية اخر مرة زارتني عمتي وصفوان من اسبوعين اجى تا يرجعني وسلطان ماقبل لأن يدري بية ماريد ارجع تعارك وية صفوان وصار مضارب بيناتهم صفوان الي بدى مد ايدو ونكت سلطان من ياخة قميصه ودفعه واخوية تخبل هاي يعتبرها إهانة تعاركو إلى أن عاطت امي بسلطان يكف الشر ماتريد فضايح حلف سلطان مايخليني أخطي خطوة وياهم وصفوان تا يحرك گلوبنا حلف مايخلي قتيبة عندي ولا اشوفو
يمه غربلوني اثنينهم غير متت بوكتها صريخ وعياطي ملى البيت وانا اشوف صفوان يأخذ قتيبة الي جان كاعد بسدي دحك علية بنظرة افهمها والله افهمها زين لحظتها كال ..( ورب العزة تا اخليج تتحصرين على شوفة ابني)
رجعت لحاضري من امي حجت وياي ..
_ لاتبقين تقهرين بروحج غصبا عليه وليدج يرجعلج شنهو ماكو محاكم تأخذ حقج
مسحت دمعه نزلت على خدي ..
_ سلطان مايقبل عالمحاكم يكول يسويلنا سالفة يأخذ ابنو ويسافر وما نحظى بشي
_ خل يرفع دعوى عليه شنهو قابل هيتة ابنج هذا وبعدو صغير ماكمل سنتين يحقلح رعايته
_ خل يرجع سلطان واحجي وياه
ردت بيداء اطمنها ..
_ أن شاء الله يرجع وليدج ترى ماكو قانون يحرم الام من ابنها
_ بيداء اخاف حجي سلطان يطلع صدك وماشوف وليدي
وفعلا اول ما وكلت محامية ووصل بلاغ لصفوان متصل على عاهد ومامخلي مامهدد اذا احد يتجرأ ويأخذ قتيبة
بعدها ماسمعنا اي خبر وعاهد راح لبيت صفوان مالاكيهم من سائل الجيران طلعو تاركين البيت ومنتقلين لغير منطقه ،، جان يوم نحس علية كعدت لليل ابجي سلطان تخبل وبقى هو وعاهد يدورون مالكوله أثر رغم سلطان معارفه وعلاقاته ماخلى ما سأل إلى أن سمعنا طالعين للسماوة ،،
اتصلت على صفوان وعلى عمتي موبايلاتهم مغلقه زاد قهري ولوعتي على وليدي ليش هيج صفوان تقسى علية ادري بسبب الصار اخر مرة تعارك هو وسلطان وتضاربو شدعوة عليك هالكبرياء والراس اليابس
حالتي الجسدية تحسنت وكسري جبر بس كسر روحي مالو جبر وانا باقية محتارة بوضعي هذا ،، طاري الطلاك جان موضوع حجى بي سلطان وردته امي ماقبلت صارت عصبية وماخلت ماحجت تكول المرة سنين تزعل ما اجيب طاري طلاك وانتم مر ثلاث شهور تردونها تطلك والله يسلطان أن جبت طاري السالفة هاي لساني مايخاطب لسانك
