رواية #ذئاب_الحنين
بقلمي: Jawhara
****************
احداث ل صفوان وملك
باجر ماكو بارت على اليوم البعده
_حظري غدا وياي ربعي
حجيت واني ادخل مسواك ذبيته بالمطبخ
ملك واكفه بصف السنك تحضر باللبن التفتت علية
رفعت تك حاجب تناظرني عفتها وطلعت من البارحه بالليل توترت علاقتنا تريد تروح للسوك ومنعتها وهي من امنعها تكلب وجها عبالها اتوددلها لا هذا الطبع مو عندي
رجعت يم جماعتي واحد منهم اخوها عاهد بس ماجبتلها طاري ،، دقايق ودخل أبوية سلم ورحب بيهم وكعد عالقنفه سبحته بيده يسبح وعينه على عاهد
_ عاهد يبوي شخباركم اخييك سلطان شلونو
_ نحمدلله عمي
_ الله يحفظكم يبوي
_ يحفظك الله عمي انت شلونها صحتك
_ مانكول الا الحمدلله يوليدي هاي أنا عالعلاجات والله كريم
_ اجر وعافية يارب
عفتهم وطلعت اريد اشوف ملك كملت لا دخلت جانت مخبوصه ترتب بالمواعين وامي وياها تساعدها
_ خفي ايدج فاهية شبيج
سكتت ماردت بس اراقبها كالبة الخلقة وتتأفف وية روحها وكفت يم الميز مخلية كاسات زلاطه اخذت خاشوكه واكلت منها وعقجت وجهي وذبيت البيدي
_ شدعوة مالحه تردين ترفعين ضغطنا انتي
اجت اخذت الكاسة وخلتها على جهة
_ بالخطأ هاي الية اشتهيتها والله
صفنت عليها ماحجيت وهي كملت وشلت الصينية وطلعت
ورى ماراحو جماعتي عاهد طلب يشوف أخته يسلم عليها اتصلت عليها تطلع يم باب المطبخ ماردت علية
_ اختك نايمة ماترد علية
_ ها خلها عجل ترتاح وسلملي عليها
_ الله يسلمك
صعدت للغرفة جانت صدك نايمه رحت توضيت وصليت ودخلت بفراشي عاينت عليها الغرفة ظلمه ضوة خفيف يدخل من الشباك ويعكس على ملامحها تنهدت واني افكر اسحبها بحظني اشتهيت ابوسها والله دنكت راسي ثواني وسحبت روحي مالمستها خلها تنام
عدلت مخدتي وبقيت فترة صاحي وأفكاري مزدحمة بملك وتصرفها وياية هالبنت هاي مجموعه غريبة من الكبرياء والبرود صارلنا ثلث اشهر متزوجين ولهاي اللحظه ماحس اكو بيناتنا أي تقارب دومها بعيدة عني مرات انطيها عذرها معرفتها بية قليلة واحتمال تخاف تحجي بموضوع واصدمها بردة فعلي واحنا من كبل وبسبب رسالتها الية عاملتها بإهمال ونبذتها متعمد ،،و ليلة البارحه حجت بعفوية كالت اريد اروح سوك واني كبيت بيها جنت ضايج من سالفة بالشغل مدوختني ودخلتها بالكلام مو وكتها ابد عصبت عليها كلتلها ماكو طلعه هي ماردت علية ولا ناقشتني اكتفت بالسكوت بس تصرفها البارد وياي ابلغ من اي كلام جان
الي اعرفه النسوان لغاويهن جثيرة خاصة إذا شغلة سوك ومحلات يكرعن راس الزلمة وهاي العندي عكس الي اسمعه واشوفه بقت ساكته ماحجت
غفيت واني بسالفه ملك ماحسيت الا الصبح ايدي خدرانه لفيت راسي شفت ملك نايمه عليها قريب رأسها لصدري بقيت ادحج عليها ملامحها هادئة ومبينه غاطسة بنومتها
هالمرة دنكت وبوستها بخدها بوسة خفيفة وسحبت ايدي منها ونزلت من الفراش اريد اتوضى واصلي
