رواية : ذئاب الحنين
الفصل الخامس
بقلمي : jawhara
روحي تكول عدله ما ني ميته
وعجب زرع الزرعته ما نميته
وهذا الليل كله ما نميته
فراك وحرمو وصلك عليه
******
منسدحه بفراشي من البارحه ورى مارجعت من المستشفى فحوصات وتحاليل تا يتأكد فاتك ويتطمن على حالتي مثلما يكول وهاي أنا طلعت حامل وكارهة روحي وكارهة الدنيا تمنيت لو ميته مثل أهلي الله يرحمهم ،، فدوة يربي ليش عفتني وحيدة يربي ماكلت رحمه لحالها تبقى تا ارحمها يربي كرهت نفسي واسمي الي ماصابني من معناه بس القهر
لايعة نفسي وماطايقتها نزلت رجلية من فراشي يادوب وصلت الحمام ذبيت من راسي لما كلت بس وكله سائل مر علكم غسلت وفرچت سنوني ورجعت امشي بخطوات ثكيلة جسمي بي نحول مو طبيعي معقولة الحمل هيج يسوي
لميت شعري وعكدته من ورى متضايكه منو
صاحتني سحاب طالعه من غرفتها وابنها يركض جدامها
_ شلون صرتي
_ مو زينة
_ تعاي عجل ارتاحي واروح اجيبلج لكمة تاكليها صار الظهر وانتي على لحم بطنج
_ مشكورة سحاب بس ما اكدر والله حتى حيل ماباقي بية ونفسي لاعبة كلش
_ هاي وحامج ثجيل الله يعينج بس مايصير ماتاكلين عجل الجاهل شلون يتغذى انتي روحي ارتاحي وانا اجيبلج هينا
_ شنو طابخين غدا
_ تشريب لحم وتمن عنبر الولد يحبون الهبيط
_ اوف لا دخيلج ما اتحمل بس اذا اكو دبس حطي شوية وياه راشي
_ أن شاء الله ،، يلة ماما رعودي تعا ننزل وينك ،، شوفي الحيال يلعب بغرفتج
_ خل يلعب عليج الله لا تصيحين بي
_ انتي تعبانه ويضوجج
_ لا خل بونسني شوي
نزلت سحاب وانا دخلت لغرفتي ابتسمت بدون خلك لرعد صاعد عالجرباية يكمز
كعدت وعيني عليه شافني كام يضحك وسحب المخده ضم راسو جواها
_ ههه شنو نعامة انت تعال خل احبك تعال
( رعد عمره سنتين وكلش حلو شكله عيونه وسيعه يشابهن عيون أبوه بس بياضو على امو لأن فاتك بشرته حنطية )
،،،،،
داخل المطبخ ..
_ وين ماخذه الصينية !؟
_ لرحمه تا تاكل خطية
_ تاكل دبس يمعودة صبيلها غدا زين
_ والله ماتقبل وهي طلبت هذا يمكن مشتهيته تتوحم عليه
_ وينها !؟
_ بغرفتها ورعد يمها
رن موبايله جا اتصال عافني وطلع يخابر وانا رحت وديت الاكل لرحمه ورجعت نزلت وية وليدي
،،،،،،
اتصال شغلني عنها ردت اسالها شلون صارت رحمه من طلعت الصبح جانت نايمة
رجعت للبيت تلكوني نازلين من الدرج رعد من شافني ضحك ويريد يطفر من الدرجات الثلاثه الباقية
تلكيتو اخذتو بحظني .. هلة بشيخ رعد هلة بحبيب أبوه بقيت ابوس بخدودو وفتنا للهول سلمت على امي وكعدت بسدها
_ ابوك ماجا وياك
_ راح وية عمي يعكوب لبيتو عازمهم على غدا بمناسبة رجوع مرتو
_ صار اسبوع من رجعها شيسوي بالعزيمة وانت ليش مارحت
_ جان عندي شغلة وهسة أسبح واتحضر للروحه ماتجين وياي هناك اكعدي يم عمتي ام علي
_ ياه وشعندي رايحه ،، عنود البارحه من خابرتني تكول عمتي ما تحجي ويانا مقاطعه الكل كاعدة بغرفتها سادة بابها
_ وعليش ترى عمي ما مسوي حرام ولا عيب المرة جانت بذمتو وهسة رجعها يعني مو غريب عليها هذا الشي
_ كلمن وحالتو ونفسيتو
_ يلة اروح اتحضر لا يزعل عمي علية
ذبيت رعد من حظني وصعدت فوك ،، الهدوء هنا يريحني فتت لغرفه رحمه سلمت عليها بيدها خبزة ذبتها من شافتني
ردت سلامي وأخذت كلاص مي شربتو
تقربت عليها .. شلونج اليوم
_ مو زينه
_ يوجعج شي احجي تا ارجعج للطبيب
صفنت بوجهي وردت كالت ..
_ كلشي يوجعني روحي وچسمي كلهن التمن علية
،،،،،،،
((يلتمن علية مشتتات البال ..
وانفضهن نفض وانهض ولا چني ))
# عريان _ السيد _ خلف
،،،،،،،،،
عصرت قبضة ايدي بقوة من سمعتها تكول روحي وجسمي يوجعني كعدت بسدها والتفتت عيني بعينها قريب كلش عليها
_ رحمه أنا دواج ومرهمج وثفي بالله انتي عندي مثل نفسي اليصعد وينزل انتي موجوعه وحقج مو هينة فقد ابوج الله يرحمو بس لاتنسين أنا سندج وبظهرج ومااخليج تحتاجين لأحد انتي بس فكي هالخلك الضيج هذا وبطلتي توتر وانتي ترتاحين
بقت ساكته ماحجت كمت من يمها ورحت للحمام وراية روحه لبيت عمي يعكوب
