ذئاب الحنين
الفصل السادس
بقلمي : Jawhara
******************
يعاندني القلم لوردت اكتب ليك
عكس ما اريد …. يكتب هو عنك!!
كَتله اكتب : كَضت عشرتنه وياك
كتب : ياروحي احبك ما املك
كَتله اكتب : ماريدك دغش بيك
… كتب : اهواك يل المزيون كلك
طلع حتى القلم …دايخ ولك بيك
يصفط اشعار من يشعر بظــــــــلك
*******
بيت اهل صفوان ..
_ تعال شوف اخييك مايقبل يروح الكلية معاند تالي وياه
رفعت راسي من المخدة وكعدت مسحت على وجهي ولحيتي وانا استغفر تالي وياك داود صار شهرين على طلعته من الحجز وما جاي يقتنع وهاي صار ايام على بداية الدوام وقافل مايروح
دحجت بساعة موبايلي خمسة ونص لصبح لفيت راسي لجهة امي بعدها واكفه متخوصرة بسد الباب
_ يمة اندار عليج ساعه خمسة ونص وين مكعدتني من ورى هالمعثور
_ عجل هم يلة يتحضر مايلحك الخط يجي من وكت
_ وينو هسة
_ رجع نام
شمرت الغطا وكمت اشوفو دنجت حبيت رأس امي .. رحتلج فدوة لاتغثين روحج من الفجر
_ يمه اخييك قاهرني
_ يمه خل ينكصون مدرسين العربي واحد ماراح يأثر عليهم إذا ما راح الكلية تا يتخرج هسة شسوويلو لداود باشا
_ انت احسن تحجي مو مثل ازور وعادل وماردت ابوك يعرف يتصركع علينا
دفعت الباب انركع بالحايط فز هو وعادل غرفتهم مشتركة
دحج بعيون مخوزرة ورجع ذب راسو عالمخدة
صاح عادل .. ياخوي خرعتني مسويلنا مداهمات من الفجر
_ انطم انت حسابك بعدين مسوي بيها تا تقرا وانت فاتح موبايلك للصبح
حرك عيونو ماعاجبوه كلام اخوه الجبير ورجع انسدح عالسرير يكمل نومتو ميكدر يرادد صفوان لأن صدك قبل ساعه ذب موبايلة عالشحن
_ داود انهض حاجيني شبيك فطيسة صاير
_ عوفني صفوان رحمة للكعبة
_ كوم تا اكلك وراك دوام هاي السنة ماتريد تتخرج
_ بطلت ماروح بعد
_ اكل خر..ا فزز كوم لا انعل ابو سرى
زمخت بي ومن سمع اسمها نزل من فراشه وتعداني وطلع من الغرفه كدامو كرسي مكتب يكعد يدرس عليه دفرو
طلعت وراه تا شوف شيسوي لكيتو برا بالحديقة متخوصر وعينو بالسما
وكفت وراه وأيدي على جتفو من شفته ساكت تقربت وحظنته بذراعي
داود شوية اكصر مني رغم طولو حلو لجن انا اطولهم ،، تمشيت وياه بالحديقة وانا اجر نفس من هوى الله بهاي ساعه المبكرة
_ يخوي احمد ربك كشفتها لاتبقى داير ظهرك للدنيا ترى ماتوكف على شخص
جر حسرة وذبها واخيرا حجى ..
_ مقهور يخوي مقهور على حالي اغلب الطلاب جماعتي يدرون بية احبها
_ وإذا عادي انت إذا تبقى طام راسك مثل النعامه راح تتضخم عقدتك ماراح تطلع سلامات من هاي التجربة ياخوي انعل ابو الحب لابو خيره والله حب ويخليني اطخي راسي ادوس عليه وامشي راسي مرفوع
ابتعدت عنو خطوة من شفت اكو قبول منو
_ اروح اكمل نومتي هاي وانا اليوم كلت ابقى بفراشي اجيت تالي الليل وماشابع نوم
ابتسم تك خد وعفته واكف يفكر اكيد خل يفكر بكلامي بلكن يصحى لروحو
