رواية #ذئاب_الحنين
الفصل الثاني والخمسون
بقلمي: Jawhara
********************
مساؤؤ فل حبايبي 🌹 هذا بارت وعكب باجر انزل البارت لأن تعبانه اعذروني
******************
في وقت اشتياقي لك . . .
تتركّز كلّ أفكاري، وتهرب منّي إليك . . يشدّني الشوق
********************
ملك..
حظنت بنيتي لصدري وأبوس بيها وابجي وهية دفنت رأسها بصدري انتبهت على قتيبة من وصلني بقى جامد بمكانه يبعد عني خطوتين حاظنه لولو بيد ومديت ايد اريد المو لحظني وبصوت يرجف متأثرة بيهم وبوجودهم ..
_ تعال يمة اندار عليك
رفع رأسه يدحك على أبوه الي وكف بسدي وبعدين اجى بخطوة بطيئه ما انتظرت يوصلني بسرعه مديت ايدي وسحبتو لحظني ابوس بي افيششش يمه قتيبة عمت عيني عليك شلون عفتك سودة بوجهي ،، بعدت لولو واخذتو بين ايدية وزعت بوساتي على وجهو ورأسو وأيدي
حظنت وجهو بين ايديه وهمست بحرگة ..
_ أنا امك يول فدوة اروح للوجه هذا
بوست كصتو وكمت على طولي وأيدي على متونو لزيتو ماخليتو يتحرك وهو باقي حاظن خصري بس مايحجي
فزيت من سمعت صفوان قريب حيل علية حجى وية قتيبة
_ أخذ امك للبيت
عافنا وطلع وانا مشيت وية وليدي الي ايدو بيدي وبنيتي لميتها بذراعي حاظنتها وتمشي وياي
عمتي صارت بوجهي من دخلنا سلمت عليها هي بسرعه حظنتني تبوس بية وتهلي واجى عمي مايقل عنها بترحيبو ،، سلمت عليه وبست ايدو هو رأسا حظني جوة ذراعو ..
_ هلة بنيتي نور البيت هلة بام قتيبة
_ منور بأهله عمي الله يحفظك وينطيك صحه وعافية
دخلنا بالهول كعدت ونزعت نظارتي وانا امسح عيوني الي مليانه دموع عمتي شهكت من شافتني ..
_ يمه على بختج شمسوية بروحج جفونج مورمه من البجي ؟!!!
_ الحمدلله على كل حال
دخلت شابات اثنين سلمن علية بدون مايرحبن بية مجرد سلام عليكم وشلونج وكعدن كبالي
عمتي بقت تعرف بيهن علية وكالت اساميهن حنين زوجه ازور ومنتهى زوجه عادل
من عرفن أنا منهو تعذرن ورجعن يهلن ويرحبن بية
ما اهتميت كثر اهتمامي بجهالي الي كاعدين بسدي أنا بنصهم صرت ولولو لازه جسمها بجسمي
عمي كال ..
_ بنيتي هذا بيتج وشتردين يجرالج أخذي راحتج واي واحد يضايكج أنا موجود كبل ما تشكين لرجلج أنا عمج سندج
_ مشكور عمي ماتقصر الله يديمك خيمة فوك روسنا
_ جدة قتيبة وينو ابوك !؟؟
_ طلع للمضيف
_ عجل كومي تا تصعدين لغرفتج خل البنوات يرحن وياج كومي يمه حنين أخذي خيتج اصعدن فوك
كامت حنين وهي تبتسم بوجهي وصعدت وانا حجيت وية عمتي
_ جنطة ملابسي وملابس لولو بالسيارة
_ قتيبة اطلع يم ابوك وإسالو عالجنط تا ينزلهن من سيارتو
طلع قتيبة وانا ولولو صعدنا فوك ورى حنين
البيت جبير ماشاء الله وبناء حديث كلشي بي حلو ومرتب اباب الغرفه اشرتلي حنين ..
_ هاي غرفتكم ،، بعد مدري اذا اكو ترتيبات للجهال لأن قتيبة غرفتو موجودة هذيج بس ينام هينة عند أبوه متعود
_ شكرا تعبتج
_ تدللي ماكو تعب ،، احنا غرفنا جوة يعني تكدرين تكولين الفوك كلو لابو قتيبة
_ اها اي فهمت
_ محتاجه شي كبل ما انزل !؟؟
_ تسلمي
نزلت حنين وانا ولولو دخلنا الغرفه لون كريمي الاثاث ،، يعرف يختار ذوق حلو والله
افتريت بالغرفه جبيرة وبيها ملحق حمام دحكت على لولو تفتر وياي وحجيت وياها ..
_ واضح على ابوج الأمور طاكه وياه
كهرب جسمي من سمعتو هذا شوكت اجى ..
_ اذكري الله لا اطكيني عين
غمضت عيوني والتفتت على الشباك الي جنا واكفين بسدو أنا ولولو
اسمعو صاح لولو لفيت راسي دحكت عليهم كاعدين عالجرباية هو وقتيبة ولولو اخذها خلاها بحظنو وهو يبوس بخدودها ويحجي على أساس يسمعني ..
_ هاي الجنط رتبوها بالكنتور ومن تكملون نزلو جوا
عافنا وطلع وقتيبة وراه يمشي التفت عليه دنج يحجي وياه ..
_ ابقى هينة إذا امك تحتاج شي تا توصيك
عينو بعيني بقى مركز نظراتو بس ماحجى شي وياي
رجع قتيبة تقربت علية اخذتو لحظني وكعدنا تربعنا عالارضية تاسولف وياه
حظنتو وبوستو وانا اريد ادخلوا بين ضلوعي
_ يروحي انت سجلت مدرسة !؟؟؟
_ صف اول
_ وتحب المدرسة لا ؟!!!
_ اي ابوي يكول تتعلم كلشي
_ اها عجل تعال ساعدني نرتب الملابس ولولو ويانة
التهيت أرتب ملابسي بالكنتور بعدما فرغت خانه وطلعت ملابس صفوان حطيتهم وية بقية ملابس احساس قديم رجعلي وانا اشم عطرو بالملابس سديت بابه وكملت ترتيب ملابسي وباقي شغلاتي عطورات ومكياج ماجنت استعملوا الا قليل صفيتهم على ميز تسريحه ،، وياي لولو تموت على هالسوالف وبقو ملابسها حرت وين احطهم ،، سالت قتيبة الي جان يفتح بعلب العطور ويشمها
_ ماما خل اشوف غرفتك تا اخلي ملابس اخيتك
_ مانام بيها انام هينة عند ابوي يلة تعالي اشوفج
