رواية #ذئاب_الحنين
الفصل السابع والعشرون
بقلمي: Jawhara
صباحو ياحلوين 😍 يمعودات كلت استراحه يومين ثلاث تالي وياجن هههه هذا هدية مني لحبايبي شوية قصير ٢١٧٠ كلمه التقيكم بعد يومين
******************
اذا كنا في حالة حزن . .
فان العالم يلوح كئيباً بالنسبة لنا . .
حتى ولو كنا في منتصف نهار مشرق بديع . . وعلى النقيض تماما . . .
اذا سمحنا لبذور السعادة أن تنمو بداخلنا،
فان اسوء عاصفة أمطار . . .
لا يمكنها عندئذ أن تعكر مزاجنا الرائق
*******************
_ مهرة ابقي عد حمدمد أنا رايحه انطيهم مي
_ امي ترزلني تكول ماتعينين أحد
_ يمعودة هية صوندة أمدها من البوري
يم حضيرة الحلال اخذت رحمه الصوندة وذبتها بالبرميل مقسوم نصين كل قسم على جهة تا ينملي مي وتجرع ( تشرب) منو الهوايش
مهرة عينها على العجل الي مربوط بس جان يعافر صاحت رحمه ..
_ يول رحمه لا ترحين غاد
رحمه الي ممنتبهة ..
_ مهرة ارجعي عد محمد اخاف رعودي يكعدو لو ياذي
عاطت مهرة من شافت العجل انحل حبلو واجى يرافس
_ عااا يولي أركضي لا يرفسج
رفعت راسها رحمه لمكان مربط العجل الي اختفى مالمحتو وين راح ،، ما حست الا وهي ملطوشة بالكاع رأسها افتر والم الضربة شلها شل ماكدرت تتحرك بس تحس بالألم بظهرها
،،نطحها براسو
مهرة تخبلت من شافت رحمه انشمرت بالكاع والعجل أخذ الحضيرة يرافس ويركض هينة وهينة
صرخت مفزوعه وخايفه على رحمه ومن العجل وطلعت تركض تخاف ينطحها
لحظات وفوك رأسها فاتك واسحاق
وليد ،، أشرت لداخل وبس تصيح باسم رحمه
فاتك الي بدون مايسالها ركض بسرعه مايشوف الا العجل يرافس ويلعب جولة بالحضيرة ورحمه مرمية بالكاع
فاتك ..
من سمعت صرخه مهرة طلعنا نتراكض تلكتنا الوجه مخطوف لونو وتصيح باسم رحمه بسرعه دخلت وأشوف العجل الي أمي تعاني منو واكدت أكثر من مرة نبيعو لو نودي يم الحلال الي بكاعنا
انصدمت وانا اشوف رحمه مرمية على بطنها ماتتحرك دنجت عليها كلبتها بين أيدي. صرخت بالم وعرفتها تاذت شلتها بحظني مضطر تا اطلعها وانا اسمع ونينها صحت بوليد يحضر السيارة
صارت امي وسحاب بوجهي من شافت حال رحمه لطمت وجهها ..
_ مو كلت ماريدو هالعجل راحت البنت الله يعلم بحالها وصارت بوجهي انا الي دزيتها
طلعت بدون ما احجي واسمعها صاحت على اسحاق الي كضب العجل يربطو
_ مايبقى دقيقة هالاغبر هذا عوذا منو
رد اسحاق وهو يثبت ربط الحبل تا لا يرجع ينحل ..
_ اليوم يبات يم الحلال الي بالحقل لاتعصبين خالة
بالطرمه السيارة حضرها وليد شغلها وانا كعدت ورا ورحمه ساندها لحظني
من وصلنا المستشفى وانا عيني عليها اراقبها مافتحت عينها بس صوت ونينها
انتبهت ماكو عباتها بس لابسة الحجاب عضيت شفتي وانا محتار شلون ادخلها وهي بس ثوب
نزلت اول وانا احاول اسحبها لحظني تا انزلها
عاطت وهي ترد بصوت تعبان ..
_ فاااتك احس شي نزل مني
لفيت وجهي لوليد الي نزل بسرعه ودخل المستشفى
انتبهت على العباة مصفطه باقية عالكشن عباية أبوية جانت بيدو على أساس عدنا طلعه ورجعنا المضيف من اجانا خطار
سحبتها وانا افردها وغطيت بيها رحمه
صاحني وليد هو وعامل خدمه يدفع بسدية
حجيت وية وليد يبعدون بينما انزلها
شلتها بحظني وذبيتها عالسدية ودخلناها المستشفى
،،،،،،،،،،
واكفين بالممر ننتظر طلعة الدكتورة بعدما اخذولها اشعه تا يشوفون اكو كسور أو لا. بعدها على أساس تحولها سونار من حجيت وياها كلتلها المرة حامل
