روايه #ذئاب_الحنين
الفصل السابع والاربعون
بقلمي: Jawhara
*******************
حبايبي 🌹 من نزلت احداث لاحقه حبيت تعرفون بعض الخفايا بالاحداث لأن الأغلب يسألون عن الراح يصير وليش هيج صار هسة مافوك منزلة تغشيشة وماعاجبجن وللعلم أنا هاي كاتبتها من اول ماكتبت الرواية وهسة اجى وكتها حبيت انزلها ،، المهم ماطول عليجن توني كتبت هذا البارت انزله قصير طويل والله هذا الي اكدر عليه لأن ماعندي مجال والي تسال التنزيل بين يوم ويوم المفروض هذا البارت ينزل باجر لكن حبيت لخاطر متابعاتي يستاهلن نزلته
تصبحون على اجمل ماتتمنون موعدنا السبت أن شاء الله
***********"*******
العنود ..
_ ما اكدر مالي نفس والله
_ يگليبي مايصير تبقين من غير اكل دوخين وضغطج يهبط ليش تنسين انتي حامل !
_ الاكل احسو رماد بحلكي ،، خلي أنا من أشتهي اكل
_ لاتجذبين امي تكول ماتاكلين يلة هاي لفات جبتلج من المطعم واشربي عصير
صفنت بوجهو وعيوني نزل دمعهن ،،ابوية على بالي طول الوكت الله يرحمك يابة هديت حيلنا بفراكك
علي بحزن واضح ..
_ الله يرحمو برحمته الواسعة ،، عنود لاتعترضين على أمر الله يلة حبيتي اكلي شوية لاتبقين مقاطعه الاكل ،، تا نروح لبيت عمي نكعد نسهر يم عمتي ام فاتك
_ اي لزوم نروح
_ عجل اكلي بينما اتوضى اصلي العشا
طلع علي وانا قسمت من اللفه اكلت شوية وشربت عصير وشلتها للصينية بالمطبخ ورحت توضيت صليت وتحضرت انتظر علي مدري وين راح ،، شوية واجى هو وعمي يعقوب
_ عنود يابة كلنا رايحين لبيت اهلج
_ أن شاء الله عمي
طلعنا نتمشى الجو بالليل حلو ،، بيت اهلي قريب وصلنا الباب جانت مفتوحه وليد بالطرمه يغسل بالسيارة وياه رعد ابن فاتك من شافنا اجى علية حظنتو ابوسو
_ هلة حبيبي شلونك
_ زين الحمدالله
_ انداريت عليك ،، يلة تعال ندخل جوة
سلمت على وليد الي اجى من شافنا سلم على عمي والولد وراحو داخل لغرفه الاستقبال وانا وعمتي ام علي وام نمر دخلنا من المطبخ
سلمنا على سالي والبنوات خواتي مهرة ووردة
وفتنا لغرفه امي الي كاعدة هي وخالتي ام اسحاق
من ابقى يمهم شوي احس روحي احسن ردت ابات وامي ماقبلت كالت رجالج جاي إجازة جم يوم عيب تعوفينو بوحدو
رجعنا متأخرين كلمن دخل لغرفتو أنا أول ما وصلت ذبيت عباتي وغيرت بدشداشة سودة ناعمة ارتاح من ألبسها لأن بطني كبرانه واتضايق من الكصيف
علي من شافني غافية سحبني لحظنو بدون اي كلام اكتفينا بالهدوء واحنا تحت تأثير النعاس
،،،،،،،،،
شهلة ..
رضعت نمر ورجع نام رغم كضاها نايم من جنا أبيت الشيخ حطيتو بسريرو واجيت انام ،، ابو علي مدد بالفراش وعينه علينا دنجت بست خده وحطيت راسي بسد راسو عالمخدة وعيني عليه سالتو ..
_ ليش صافن يگليبي ؟!!!
_ تا افكر بيكم انتي ونمر
_ وشنهو جان تفكيرك !
_ شهلة إذا الله أخذ امانتو ومتت مالج طلعه من البيت نمر اخوتو يربونه
