صاح شيخ يعقوب بحركة و عصر موبايله بيده ..
_ لاحول ولا قوة الا بالله يارب اجرنا بمصيبتنا يارب
بلع ريك والدمع أصبح واضح بمحاجر عيونه
_ برع استشهد يولو اخييكم راح اويلي يا حرة گلبي استشهد وليدنا ادعوله بالرحمه
الكل فزو عايطين مصعوقين بالخبر استشهاد أخيهم وابن عمتهم ورجل اختهم
بعد مايتحمل حيلة انهد كعد وسحب أطراف شماغو تلثم بي مايريد يشوفونه يبجي دنج راسو والعبرة شكت صدرو دموعه نزلت على عزيز وحزام ظهر وابنه كبل ما يكون ابن أخته
،، يسمعهم يتصارخون والصوت بدأ يبعد رفع راسو شافهم برا المضيف رجع قتادة عليه وعيونو حمرا
_ يابة وينو الحين
بصوت واضح لقتادة أن أبوه كاتم بجيته..
_ جماعتو جايبنو بالطريق وياهم سلطان آل ياسين. هو الي اتصل علية
طلع من المضيف صاح بيهم .. عمتكم لاتصدفوها بهالليل أخذ امك وياك ياقتادة
رجع قتادة للبيت تا يخبرهم ومن سمعن بدأ العياط والبجي قتادة محتار بيهم عينو على أخته بيداء الي غطت وجهها بيديها وسندت ظهرها للحايط تبجي
بخطوتين صار حدها اخذها بحظنه يواسيها وگلبه ينزف دم لحالها ولفقد ابن عمتهم
أمه بصوت مخنوك من البجي ودينا لعمتك يمة الله يعلم بحالها الله يصبرها ويبرد گليبها
عنود يمه جيبي عباة لاخيتج
ركضت عنود طلعت عباة وشال وسحبت بيداء الي بعدها تعيط وجسمها يرجف من حظن قتادة تساعدها تلبسه
نزلت شهلة مرعوبة لافة رأسها بمنشفه .. شكو شبيكم اسم الله
قتادة لمحها ونزل رأسه ماحاجاها ولا ام علي بس عنود حجت وياها
_ خطية الله يرحمو عجل انتظروا البس واجي وياكم
زمخت بيها ام علي ..
منهو ينتظر واحنا گلوبنا واجة نار نريد نوصل لأم برع
بدون ماتلتفت رجعت لغرفتها تا تلبس حجابها وعباتها لبستهن بسرعه ونزلت طلعت شافتهم برا يم باب الحوش مسافه عن البيت سدت باب المطبخ قفلته والمفتاح بيدها خافت البيت ينترك ويحجون عليها وهمة راح يلتهون بالفاتحه
_ اطلع قتادة شبيك صافن
_ يمة خل تجي المرة عيب تا تروح ويانة
سكتت ام علي ولزت بيداء لصدرها تقرا عليها أدعية
شهلة من وصلت لسيارة قتادة لمحت شيخ يعقوب واكف ويخابر على جهة متلثم بشماغه راحت تمشي منزلة رأسها استحت من ولدهم كلها ملتمة يم السيارات تا يطلعون يتلكون الجنازة
من لمحها سد موبايلة وخزرها بغضب وهو ينتر بيها .. شعندج هينا
_ اجيت اكلك اروح وياهم لبيت ام برع
_ روحي
ما التفت عليها انطاها ظهرو مايريدها تشوف عيونو المليانه دموع
،،،،،
أبيت عمتهم بعدما وصلها الخبر من دخلو عليها بعدما وصلهم قتادة الي حظن عمته وهمس بأذنها الخبر
بقت تنتفض بحضنه وجسمها يرجف وصريخها وصل الشارع تنادي باسم برع
فاتن طلعت هي وسفيان وصدمتهم وحزنهم مايقل عن صدمة امهم وحزنها
،،،،،
( سبب استشهاد برع هو انفجار مفخخة على سيارات القيادة طالعين واجب وراح ضحية شهداء اثنين واربع جرحى )
