رواية #ذئاب_الحنين
الفصل الرابع والثلاثون
بقلمي: Jawhara
*****************
نحتاجهم . . .
نشعر بضيق يخنق أرواحنا . .
نهمس في داخلنا بعمق اشتياقنا لهم . . . خشية أن تعلو صوت لهفتنا . .
فيجرحنا صدودهم
*****************
سالي ..
كاعدة صافنه لوحدي وضوجة فول ،، وردة وعمتي صاحو علية اروح وياهن لبيت عمي ابو فاتك
_ كومي ويانة وسدي الباب وراج عليش كاعدة بوحدج
_ تدرين بية استحي اروح هناك
_ عجل خوما تبقين هيج لزوم تختلطين بيهم ترى ياخذن عليج غير نظرة
_ چا هنة صارن يعرفن طبعي
_ ميخالف يلة ذبي شال على راسج وتعاي
كمت ماحبيت اعاند عمتي لأن طيبة وياي ذبيت شالي على راسي وطلعت وياهن
أبيت عمي من دخلنا سلمنا عليهن،، كلهن كاعدات بالمطبخ ويمهن خطار اخت سحاب موجودة كعدت بسد عمتي الي سالت عالعنود من فترة ماشايفتها
ردت عمتي ام فاتك ..
_ ملتهية بالبيت من عطلت بعد جياتها قليلة خابرتها الظهر ونشدت عليكم كلكم
ام اسحاق وهي تاخذ كلاص مي من ايد رحمه الي دارت عليهن بصينية وزعت مي
_ تنشدلها العافية وشلونهم عيالها أن شاء الله بخير
_ زينين الحمدلله
انتبهت على رحمه نترت بميساء ..
_ صدك وحدة متستحي لو تردين مشاكل
_ عوع وتردين اشرب من هذا وانا شفت شعراية بالكلاص شكد وصخه
رحمه وهي متحملة على ميساء..
_ ماكو وصخه غيرج احترمي روحج وانتي ضيفه
ميساء ماصدكت تا تتعارك وية رحمه بدت تعد وتصف رغم خالتها نهرتها مافاد بقت تغلط على رحمه الي ماقصرت بيها رزلتها أنا ماتحملت هاي شبيها
_ چا ماتكولين عيب شنو صوتج يلعلع
نترت بية .. وانتي شكو شدخلج اصلا والله يابة طالن وتشمخن جناين شيخ شديد
رديت بهدوء وانا متعمدة ..
_ حقنا چا إذا احنا ما نشمخ عليمن يلوك
_ لاتصدكين روحج يالمعيدية خلف الله على اسحاق سواج مرة
_ والله انتي مريضة عبالج راح اضوج من كلامج لا انا افتخر بروحي وباصلي واصححلج ترى ماني معيدية لو حتى جنت هم افتخر بهالشي
_ عشتو مصدكه روحج انتظري عجل مايفوت عليج سنتين وياخذج عليج مرة
_ من حقه وعليش اضوج إذا جنت مقصرة خلة يتزوج بس انا واثقه بحالي وبرجلي
انتبهت على سحاب ضاجت ،،شسويلها بالجذب ماردت اختها
وكفت وحجيت وية عمتي ..
_ ارجع البيت أنا مو كلتلج ياعمة بس انتي ماقبلتي
_ اكعدي لا ترحين ،، وانتي ولج احشمي روحج صايرة ماتنجرعين
_ ها عمة لأن حجيت الصدك
ردت رحمه ..
_ عوفيها عمة طاكة فيوزاتها من الغيرة الله يكون بعونها
نترت بيها ميساء ..
_ انلصمي ،، لاتفرحين يجيج يوم
طلعت رغم صياح عمتي ام فاتك ماقبلت على طلعتي و بقت تحجي على ميساء ورزلتها ،، شكثر مكروهة هالبنت
اول مافتت للبيت حسيت من دخل التفتت شبي خازرني
_ هلة اسحاق
_ هلة ،، ليش صوتكم طالع شعدجن تلعلعن ماتكولن زلم بالمضيف
_ عزا وصل الصوت عدكم لا مستحيل اكيد تتداهر ترى مسافه بين البيت والمضيف
_ والله طلعت للمغاسل وسمعت الصوت
_ والله ماصيحت مجرد رديت عليها تعاركت وياي وانا لا اعرفها لا عندي علاقه بيها
_ منهو هاي ! !؟
_اخت سحاب
_ خل تولي تروحلج فدوة ،، بعدين شعدها يومية جاية مايفوت اسبوع إذا ما تجي
_ والله من اول ما شفتها ما ارتاحيتلها حتى رحمه حذرتني منها
_ شكالت عليها !!!؟
_ بداية زواجنا اجت هي وامها وسمعتني حجي بعدها رحمه حذرتني منها
_ عوفيها خل تولي تعاي هينة
_ هممم اجيت
تلفت عالباب وبسرعه باسني بخدي
_ ياه لايشوفونا عيب والله استحي
_ مريتي وعجبني ابوسها محد عندو شي يمنا ،، اكلج عاجبني اخذج للكاع نتونس هناك ونرجع
_ هسة ،، بس شوية وتغرب الدنيا
_ عجل باجر من الصبح نطلع وأخذ وياي كناز وشامخ
شهكت بخوف ..
_ لااا دخيلك اسحاق والله يرعبني كناز صرت أكرهه
_ هههههه يولي لاتكرهينو هذا عزيز علية وياريت تصيرين تهتمين بي
_ ابد مستحيل اخاف منه والله ،، اتخيل منكاره لو مخالبه تخدش جلدي وتسممه
_ أنا دوم اقلم صوايدة ( صوايد الصقر يعني الاصابع والاظافر لديه اربع أصابع) بعدين تراه نظيف ينظف حالو كلما ياكل لو يصيد فريسة وانا مهتم بي ،، بس احذرج من شي ابد لا تحنين راسج اذا جان قريب عليج ،، يخرمش وجهج
بخوف اكبر ..
_ اسحاااق ترى خوفتني أكثر من قبل هونت هالونسة ماريدها
_ بس انا حابب ترحين
مد ايده ومسح خدي وعيونه مافاركت وجهي
_ توعدني ماتخلي يقرب علية
_ ههههه تم
عض شفته وتقرب دنك علية رفعت راسي أكثر وتنهدت لأن وصلني إحساسه كلش
_ تعاي فوك ماريد تأخير ولا نص دقيقة
عافني وطلع للغرفه وانا بسرعه رحت وراه
فدوة اروحله أعشكه اموت عليه يربي گلبي ينبض بقوة
