روايه #ذئاب_الحنين
الفصل الاربعون
بقلمي: Jawhara
*********************
** سيأخذ كل البشر نصيبه . .
سعادةً أو حزناً . . .
لن يفوتك شيء كتبه الله لك.
** لا تنو الانتقام أبداً . .
فقط ابتسم، وانتظر القدر . . .
فهو يبدع في تصفية الحسابات 👌
********************
رحمه ..
ثاني يوم نزلت متأخرة وانا صايرة اتعمد تصرفي هذا ،، فاتك بعدما توسل وتعذر مني وانا منطيتو ظهري ماحجيت وياه حرف ،،
مموجود بالطابق الثاني كله دحكت عالساعه تسعه غيرت لوليدي ولبستو تراكسود وجوا بلوزة الجو بارد اسمع صياح فاتك عكدت حاجبي وانا انزل الدرج ممهتمة ماعاد يعنيني اي شي بهذا البيت دخلت المطبخ وأشوف الوجوه مغلتمه وجه سحاب واختها ميساء الي اكلت رزالة من فاتك وبكل وقاحه تلاسنو تكلو مرتك تحجي عليك هاي قصدها علية فتت احضر ريوك الي ولوليدي وانا ساكته حتى ماسلمت عليهم تا اشوف فاتك شيسوي يرجع يصدك بيها ،، عمتي حمدة نترت بيها لأن علت صوتها على فاتك مدري شعجب حست على روحها وانلصمت ماردت خالتها
فاتك بتحذير غاضب ..
_ تحترمين نفسج والبيت الي داخلته لا اكسر راسج وحق هو الله لا عبالج ما عرفت سوالفج هاي انتي سجلتي من اول مرة ولا تنكرين لأن التسجيل الثاني فضحج احنا ماعدنا هاي السوالف ناس ماشين عدل وبما يرضي الله ،، والله لو ما خالتي جان عرفت شسوي بيج
ردت سحاب معترضة وبصوت تعبان .
_ عفية فاتك أنا جبتها تساعدني انت تدري بية تعبانه هسة راح تزعل وتروح
زمخ بيها فاتك ..
_ طوبها حريشي خل تولي تنكلع أنا هيج حية صفرة ما اريدها ابيتنا
بقت ميساء خانسة بعد الرزالة هاي وطلعت برا واختها راحت وراها مدري شنهو حجت وياها ورى عشر دقايق دخلن راحن جوة البيت
كعدت عالسجادة بالمطبخ بعدما حطيت صينية الريوك جدامي وحمدمد سويتلو بيض سلك هالايام يحب يأكلو ،، مدنجه اكل وأحط كل شوية لكمه بحلكو وهو يهز راسو يضحك رفعت راسي فاتك كاعد كبالنا عالميز ويسوي حركات بوجهو ومحمد. يضحك ،، ولا يعنيلي الكاعد يسوي صرت اتصرف كانو ماكو احد بالبيت بس اني لأن كطعت علاقتي وياهم بس إذا حجو وياي ارد بكلمتين باردات
اسمع عمتي حمدة تحجي وياه ..
_ شبيك عليها خلها خادمة اختها ووليدك
_ خل تولي طلعت كل المصايب من جوة رأسها
_ أنا ما ادافعلها بس شنهو دليلك عليها
_ يمه رحمه لاهلج ترى مبينه من مسجلة الصوت ومتلاعبة بي حاذفه ومخلية الي تريدني اسمعو صار عندي شك بيها سدي الموضوع أنا بعد عرفت الحقيقة الله يلعن الشيطان
ولا رفعت راسي بس اسمعهم ،،من كملت اخذت الصينية اغسلها وبعدها شلت محمد غسلتلو اجى ورانا فاتك جنت انشف وجه وليدي ،، حط ايدو على ظهري وبصوت ناصي
_ تعاي گليبي رايد احجي وياج ،، خل نصعد للغرفه
عدلت ظهري وخزرتو وانا التفت عليه ..
_ مالك حجي وياي خلصت اعذارك يفاتك والنفس طابت منك
فك عيونو مصدوم من كلامي ومبين يريد يحجي بس سكت من صحت على عمي شديد الي دخل وصاح محمد الي راح يركض عليه
شالو يبوسو ..
_ هلة وليدنا هلة حمدمد ها يروح جدك تريد السبحه هاك العب بيها
انطاه سبحتو وأخذها بعدما نزلو وكعد عالزولية يلعب بيها
_ عمي شديد شلونك
رحت عليه وكفت بسدو سحبني باس راسي
_ هلة يبوي هلة بنيتي ،، شلونج !؟
سألني وهو يدحك بوجهي ،، ابتسمت بوجهه ورفعت ايدو بستها ..
_ الحمدلله إذا انت بخير أنا بخير
_ الله يرضى عليج يبوي ،، يلة اروح للمضيف محتاجه شي !
_ سلامتك عمي
_ يسلمج الله
طلع وعاف سبحتو عند محمد شلتو ورحنا بغرفه مهرة دخلت وسديت الباب بوجه فاتك الي بعدو واكف وعيونو علية ،،خلة يضوك الإهمال والبرود
