رواية #ذئاب_الحنين
الفصل السادس والثلاثون
بقلمي : Jawhara
Neren alobeidy
*********************
** عندما ننطق بكلام عن الالم . .
يكون بداخلنا حزن وانكسار عميق . .
** في ذلك الوقت . . .
كنت أظن أني أتمكن من العودة إلى حياتي . . مرة أخرى ولكني نسيت . .
كيفية الحياة بطريقة طبيعية دون الحزن . . وكنت أعتقد أنه يمكنني كتابة كلمات . .
عن الفرح والسعادة . .
ولكن عندما فعلتها . .
أدرك أن شيءٍ داخل قلبي انكسر . . .
*******************
طلعت ملك من غرفة امها وسألها عاهد الي جان كاعد عالدرج وبيده موبايله كل شوية يتصل يتطمن على سلطان يريد يعرف وين مكانه بالضبط تا يروح عليه محد يقبل يحجي
_ شلونها امي هسة !؟
_ تبين غفت وقست ضغطها توني نازل درجتين
_ ما اكدر احصل شي كلمن يكول ماعندي علم
_ جرب اتصل على حاتم صديقو اكيد يعرف
_ عبالج ما اتصلت اول واحد حجيت وياه وهو نطاني ارقام جماعته نازل زمنية جان ومن سمع رجع التحق كال أنا اجيبلك الاخبار وهاي انتظر وما اتصل
_ يارب تحفظ سلطان فدوة ربي احمي واحفظه
اجت فادية وعيونها مدمعه ..
_ تعالو شوفو حل الوليدات شبعو بجي وهذا ياسين فت گلبي ما يقتنع يكول تجذبون ابوي استشهد وجدتي تخربطت عليه
شهكت ملك ..
_ يمه اسم الله على اخوية الله يحفظو هذا منين يجيب السوالف هاي
راحت عليهم بغرفه عاهد كاعدين جرتهم لحظتها تبوس بيهم على أساس اطمنهم من شافت وضعهم كاعد يبجون بجت وياهم ماتحملت
دخل عاهد وصاح بيهم وهو حيل ضايج ومقهور ..
_ كافي يولو تفاولون عالرجال كومي ملك اطلعي من الغرفه انتي وياهم يلة عيني وانتم ياسين وأمين تعالو نطلع بالسيارة يلة بابا
أخذتهم ملك كل واحد بيد وطلعت وهي تسال عاهد ..
_ وين تأخذهم !؟؟
_ شسوي افرهم بالسيارة اشتريلهم وارجعهم
يلة عزوز تعال وياهم
طلعو هم وعمهم بس مغلتمة وجوهم صعدهم بالسيارة
_ وليداتي من اروح على ابوكم اخذكم وياي بس ماريدكم تبجون بعد اتفقنا
هزة روسهم بدون ميحجون بقوا ساكتين طول الطريق ،،، نزلو يم الأسواق اشترالهم حلويات ومرطبات وطلعوا تا يرجعون ومن وصل البيت دك موبايله حاتم يتصل وكاله على اسم المستشفى الي بيها سلطان وقبل شوية طلع من العملية بعده مافاكه البنج
شكره عاهد ودخل البيت بسرعه يطمنهم
جانت أمه توها كاعدة ولازمة رأسها بيدها ..
_ يمه شلون صرتي !!!؟؟
_ يمه طمني على اخيك تا اصير زينه
_ الحمدلله طالع من العملية وان شاء الله يكون بخير أنا طالع لبغداد اتطمن عليه
_ أخذني وياك ماظل دقيقة هينة خلني اشوفو تا اتطمن
_ يمه انتي مريضة ضغطج علك ارتاحي وباجر اخذج والله
_ ابد والله رجلي على رجلك
ردت ملك وهي تبجي متأثرة من سمعت سلطان توه طالع من العملية ..
_ أنا همين اروح فدوة عاهد
احتار بيهن اخر شي كال ..
_ فادية خوما تبقين وحدج واحنا ظالين هناك احتمال نمر لبيت سلطان امي ترتاح ماخليها بالمستشفى هي وملك تحضري اوصلج لبيت اهلج يلة استعجلي
راحت فادية لملمت ملابس جهالها بجنطه وأخذت ملابس الها ولبست عباتها وطلعت
