روايه #ذئاب_الحنين
الفصل التاسع والثلاثون
بقلمي: Jawhara
********************
(ارضاء الناس غاية لا تدرك ) 👌
تندل طريقها
*******************
بيت سلطان ...
نزل سلطان فتح الباب يدخل سيارته تلكوه وليداته دنج عليهم يبوسهم
_ الله حيهم ،، شلونكم
ياسين بفرحه ..
_ زينين وكملت كتابة قبل امين
سلطان يبتسم وخربط شعر ياسين ورجع مسدهم ..
_ كفو منك ومن امين
_ اكلو ماكتب بعدو عليش كفو
_ ههههه ميخالف تا يتشجع. يلة ادخلوا اريد افوت سيارتي
رجعو يتراكضون دخلو للمطبخ وكفو بالباب يدحكون على ابوهم
نزل ونزل علاليك مسواك ذبهم عالكاونتر وسلم على بيداء الي وكفت وهي تتقرب مبتسمه وردتلو السلام
_ كليلي شطابخه ترى جوعان چثير
_ يخسى الجوع ،، شنو نسيت مو شفتني اطبخ المركة بالليل يلة بينما تبدل ملابسك احضر الميز ،،مسوية مركة فاصولية على لحم وتمن وياها
_ عاشت ايدج اروح أبدل واتوضى اصلي
عافت كلشي وراحت وراه بعدما حذرت الجهال يلعبون بالمسواك من ترجع ترتبه بالثلاجه
سلطان وهو يفتح دكم بدلته العسكرية رفع تك حاجب من شافها مبتسمه ..
_ ها اكو شي !!؟ سبب هالبسمه الحلوة !؟؟؟
_ هممم ماكو سبب
_ ماصدك !!
طلعت تراك خلته عالكرسي وأخذت بدلته كليتها بيدها البارحه جانت كاويتها ومعطرتها وبعدو العطر بيها علكتها وأخذت الجواريب تغسلهم
اباب الحمام سلطان وهو يبرم بردان فانيلة التراكسود تا يتوضى ..
_ عدكم شي انتي والوليدات !؟؟
_ واجباتهم ورى الغدا يكملوها ليش !؟
_ عجل تحضروا نطلع العصر نتونس ونغير جو
_ ههههه مادام حجيت عجل اكلك ليش ابتسمت من سالتني. ،، جنت رايدة نطلع تا نونسهم خطية بس شفتك تعبان وسكتت
_ جنت حاس والله عندج شي ورى هالابتسامه
_ خل أخبرهم تا يفرحون
ورى الغدا ودت الچاي لسلطان كاعد يشاهد الاخبار والوليدات بوضع انبطاح وجنطهم وكتبهم بسدهم يكملون واجباتهم وراهم طلعه يكيفون عليها
_ ابو ياسين شخبار الوضع سمعت ماجلين امتحانات أهل الانبار !؟؟
_ الأمور اخذت وضع خطر بس الله يستر أنا حجيت وية عاهد تا يجون لبغداد اريدج تحضريلهم الغرف الفوك
_ ياه هالدرجه تازمت الأمور
_ الله اعلم بعد
_ هلة بيهم و الغرف الفوك جاهزة كل فترة اصعد انظفها ،، عجل اهلي شلون يبقون والوضع صار خطر
_ قبل جم يوم جنت متصل على الشيخ وكال باقين
_ سلطان شو گلبي كام يوجعني من الخبر يارب مايصير شي خل اخابر امي اعرف شكو ماكو
_ الكاتبه رب العالمين يصير ،، أنا ماريد اخوفج بس التوتر تا يتصاعد والأمور خرجت من مسارها
_ يارب رحمتك
اتصلت على امي وانا گلبي ناغزني من كلام سلطان هنا ابغداد الوضع طبيعي بس بالانبار لا ماكو شي طبيعي
_ هلة يمه شلونج گليبي شخباركم
_ هلة بنيتي احنا زينين انتي شلونج رجلج الوليدات أن شاء الله بخير
_ الحمدلله يمه كلنا بخير بس انا گلبي عليكم ابو ياسين يكول الوضع مايطمن انتم شلونكم الديرة شلونها
_ والله يمه الكاتبة الله يصير شو ابوج مايقبل من حجى قتادة وياه البارحه كاله مانعوف بيوتنا واملاكنا خل الناس تطلع
_ ليش اكو من ديرتنا عوائل طلعت !!!؟
_ اسمعهم يسولفون اكو عوائل تا تطلع حتى بيت عمتج ام برع وعيالها طالعين للشمال وبيت اختج سلوى البارحه خابرتني تكول طلعنا وعتبت عليها ما اجت تا شوفها هي وجهالها
_ يربي صدك تحجين هاي مراح يبقى أحد حتى المدارس والكليات عطلت مو !!
_ اي كاعدين قهار والعنود شيسون عجل الحمدلله من تخرج قتادة وخلص السنه جان صارت الكلية عليه ست سنين
_ اي الف الحمدلله هو صوجو ما يحب الدراسة مدري شلون كمل القانون
_ هاي بعد قتادة وسوالفو
_ يمه اندار عليج احجي وية أبوية لاتبقون والله خايفه عليكم ترى حتى بيت عمتي ام سلطان راح يجون هينة لبغداد
_ مايمنا شي لاتخافين الي كاتبه الله يصير
_ الله الحافظ عجل سلميلي عليهم كلهم
_ الله يسلمج وانتي همين سلمي على ابو ياسين وتعالو زورونا صارلكم أكثر من شهر ونص على اخر جية
_ الله يسلمج ،، اي من ولدت شهله صحيح
والله يمه ما اعتقد نجي لأن أهل سلطان راح يجون بعد زحمه نطلع
_ براحتكم يمه اهم شي تكونون مرتاحين
يلة بنيتي مع السلامه
_الله يسلمج يمه
التفتت على سلطان جان صافن عليها تنهدت ..
_ تسلم عليك
_ الله يسلمها شلونهم
_ الحمدلله ،، امي تكول بيت عمتي وعيالها وسلوى اختي طلعو للشمال
_ هاي بداية الله يستر
