رواية #ذئاب_الحنين
الفصل الرابع والعشرون
بقلمي : Jawhara
***************
حبايبي 🌹 شي بسيط هدية متواضعه تصبيرة هاي لأن قصيرة ،،،،، تصبحون على ما تتمنون
**************
صعدت ام علي لغرفة شهلة بعدما حجت وياها العنود
دنكت عليها وهي تحط أيدها على كصة شهلة..
_ شهلة شبيج شنهو اليوجعج
ردت بصوت ضعيف ..
_ دايخه احس ضغطي هبط مابية حيل
_اسم الله شجاج العصر مابيج شي. وينو موبايلج خل اخابر ابو علي خوما تظلين منسدحة هيج ،، ياخذج للمستشفى
أشرتلها على موبايلها عالميز ،، راحت أخذته وكلبت اطلع اسم ابو علي
وية نفسها تسولف ..( خية مسميتو گليبي يمكن هو )
وفعلا جان ابو علي أول ماتصلت رد عليها
بصوت ناصي لأن كاعدين بالمضيف الولد وصفوان واجى اسحاق اخر شي
_ هلة
_ هلة بيك اذا ماعندك شي تعال بسرعه
ابو علي عرفها رأسا واستغرب ليش زهرة تتصل من موبايل شهلة
_ خير ان شاء الله دقيقة وجاي
سدته ورجعته بمكانه وعينها افترت بالغرفه تشوف ترتيب شهلة لغرفتها استحسنت اهتمامها تعرفها مرتبة هذا شي ما تنكرة
انفتحت الباب ودخل شيخ يعقوب..
سال مرتو ..
_ خير شنهو صاير العنود تكول شهلة مريضة
_ اي شوفها خطية وجهها اصفر ومابيها حيل يمكن ضغطها مصفر اكول اخذها للمستشفى
بهالاثناء دخلت بيداء بيدها كلاص عصير
_ يمه خل تشرب هذا بلكن تصحصح شوي
أخذته ام علي وكعدتها تا تشرب اخذت رشفه ودفعته
_ دخيلج راح اذب من راسي
_ كوميها زهرة وساعديها تلبس عباتها هاي مابيها حيل خاف تتازم حالتها
ساعدتها ام علي وبيداء و اخذها الشيخ من أيديهن تا ينزلها جوا
_ يابة خل قهار لو قتادة يسوقون
_ لا يبوي أنا اخذها خلهم وية ضيفهم
_ بدوة يمه انطيني عباتي اروح وياها
سكت الشيخ من سمع ام علي حجت وطلع هو وشهلة برا وام علي وراهم
بالمستشفى ..
سوولها تحاليل وقاسو الضغط الي طلع هابط
وبعدها طلع تحليلها .. شهلة حامل شهر ونص
شيخ يعقوب ابتسم تك خد من سمع المحلل يحجي بنتيجه التحليل
شهلة ..
بعدما رجعنا من المستشفى صعدت لغرفتي وبداخلي فرحه يربي احمدك واشكرك مافشلتني. الف الحمدلله جنت منتظرة وروحي مفرفحه على ضنى
ام علي باركتلي الية وللشيخ وصتني ادير بالي على روحي. صراحه مجنت متوقعه ردها واهتمامها يمكن لخاطر ابو علي لأن اعرفها راس يابس ومو هلكثر وياي
يعقوب وصلنا وراح للمضيف ماحجى وياي بس باركلي انا كلت وجود ام علي خلاه هيج يتصرف يلة ملحوك عليه وين طايرين اهم شي الله بشرني بهالحمل هذا لازم اطلع صدقه أتصدق بيها لمحتاج شكر لرب العالمين
************
رحمه ..
مثلما توقعت صعد فاتك يريد يحجي وياي ومافتحتلو الباب خل يروح لسحاب أنا مو محطه استراحه شوكت يريدني يجيني
اخ والله مقهورة من راح وبقى عدها الفجر
