رواية #ذئاب_الحنين
الفصل الخامس والاربعون
بقلمي: Jawhara
*********************
شيلة (ياخذني حنين الشوك ) تمثل حال رحمه وفاتك 👇
***********
** رائحة رحيلك ايقضت ذئاب الحنين . . ووحده لقائك من يقضي عليها 👌
************
رحمه ..
اليوم محمد كلش متنحس بس يبجي مايسكت صاحت خالتي علية تا اسكتو خاف مريض كلتلها متنحس مدري شبي بقى يصرخ وانا اكلب بي بحظني لو احطو على جتفي اوف يمة زرف گلبي من كام يصيح بابا فقدت وربي تربعت بالكاع وذبيتو بشليلي ( حظنها) وكمت ابجي بحركة وكل الي صار بية يمر جدام عيني يا ويل حالج يرحمه صفيتي وحيدة وهذا اقرب انسان الي وسندي بالدنيا طلكني يول ليش طلكتني ليش ما واجهتني وكلت رحمه انتي كذا وكذا انت مو تكول احبج واعشكج يالجذاب يالغدار حسبي الله عليكم بكل وكت اكولها الله عالظلمني هو ياخذ حقي منكم ،،
اختلط صوت البجي مالتي وية صوت محمد الي زاد صريخو وهو يشوفني فقدت وكمت اضرب وجهي وصدري شسوي هذا الي اكدر عليه بعدما عافني ابوك ،، ورغم السواه بية بس ماجاي اكدر اكرهو گلبي يحن عليه
،،،،
ابو حمزة ..
اجيت متأخر للبيت رحت توضيت بالحمام الخارجي ودخلت الاستقبال عاينت الساعه اهدعش ونص صليت العشا وأخذت القران كعدت اقرا مثل كل يوم قريت جم صفحه وصدقت وحطيته عالطبلة بصفي من سمعت صوت صريخ جاهل حسيته شلع گلبي وكدر خاطري هذا محمد يبجي هالوليد هذا نابت بنص گلبي من اول مرة شفته بيها ،،، استمر الصريح وياه صوت بجي وصياح عكدت حاجبي وكمت كفيت سجادتي ورحت يم باب الاستقبال الداخلي امي بدوة قافلته لأن ما ادخل البيت نهائي عالبرا اطلع وإذا كلش ماموجودة البنت مرات بغرفتها امي تصيحني اكعد بالمطبخ تحطلي اكل
دكيت الباب بقوة ..
_ يمممه ،، يمممممه بدوة
اعرفها سمعتني لأن نومها خفيف هاي إذا جانت نايمه مرات تبقى مددة بفراشها وتسبح بسبحتها وإذا سمعتني تتأخر بينما تنهض من سريرها
_ يمممه ؟؟!!!!!
_ عيون امك اجيت ،، يول رحمه شبخلكم انتي وهالوليد تتعايطون
صاحت عالبنت تسكتها واسمعها دكت بعوجيتها على باب الاستقبال ..
_ هلة يمه اجيت متعشي لا كول يمه اسلم
_ هلة يمه بس اسال عالوليد خاف مريض ويصرخ شوفي شبي وطمنيني
_ اوف يمه اسلم انت التهي بروحك وهمك شسويلهم هاي سالفتهم تكدر الخاطر وانت ماناقصك هم وتكدير خاطر
_ يمه بدوة عوفج مني وشوفيهم خطية
دخلت حجية بدوة لغرفه رحمه وهي ساندة ايديها على عوجيتها..
_ وليدج طك راسو من الصريخ وانتي مجابلتو وتبجين خبلتي للوليد
صاحت رحمه بروح شايغه ..
_ يدور أبوه ومتنحس شسويلو
_ صلي عالنبي وجيبي الوليد تعال جدة تعال نروح يم عمو يصيحك
كام يناشغ وخف صريخو وكف وراح يخطي على الحجية ولزم العوجية بيدو ورفع راسو عليها وهو يشهك ويرجف كثر ما بجى
راحت تتمشى بخطوات بطيئة وحمدمد وياها طلعت من المطبخ عالطرمه باب الاستقبال مفتوح طلع اسلم سلم عالحجية وباس رأسها
_ شلونج يمه
_ هلة يبعد امك هلة ابو حمزة هاك هالصبي من كلتلو نروح على عمو سكت
دنك اسلم شالو بحظنو وهو يمسح خديداته الرطبة بالدموع وباس خده ..
_ هلة احميد هلة بالذيب يلة تعال هينة نكعد وباجر اخذك بالبيييب شوفها يلة تصعد بيها
اشرله على سيارته سيارة كيا حمل لون ابيض
فتح بابها وصعد وخلاه بحظنة ومحمد بدأ يفك خلكو المتكدر وهو ماسك بيديه ستيرن السيارة ويفر بي
حجية بدوة سحبت كرسي وكعدت عليه وعينها عليهم
اسلم حس نفسيتو تغيرت شوي من شاف محمد ولاعبه دنك باس رأسه وشمه وهو يغمض عيونه من مرت ذكرى حمزة وليدو الي انكتل على ايد المليشيات ،،
ماجاي ينسى لو لحظه المر عليه سنين عدت لو باقي ابنه عايش جان هسة بعمر العشر سنوات تقريبا
_ يلة ننزل لو بعد
دردم محمد معترض بمعني بعد يريد يبقى خلاه على راحته إلى أن بدأ ينعس وسند رأسه على جتف اسلم الي ظمه لحظنه ونزل من السيارة
_ يمه الولد نعس يريد ينام
أخذته الحجية بحظنها وفاتت للبيت وهي تدعي لأسلم الي بقى يدحك عليها لما دخلت
_ الله يرضى عليك يمه الله يحميك ويبعد عنك شر بني ادم ويجبر بخاطرك مثلما جبرت بخاطر هالصبي. تراه بحسبة اليتيم ييمه ماعندو ابو
دخل اسلم وقفل الباب وراح مدد بفراشه وهو يردد الاذكار الي متعود يرددها كل ليلة تا يحس براحه نفسية
