رواية #ذئاب_الحنين
الفصل الثلاثون
بقلمي : Jawhara
*****************
عندما تبتهج الوجوه . .
بلقاء من لهم الوجدان يَسُر . .
تكفي الابتسامة في التعبير . .
عن ما يذخر القلب من غلا وحب لهم . .
وفي بعض الأوقات . .
تسبق الابتسامات دمعة الفرح . . .
لترقص على خد . . . .
كاد أن يجف ويذبل من طول الفراق . . وتصدم الأجساد ببعضها لبعض . . .
لتولد حرارة الشوق . . . .
وتلتمس الكفوف بالأيدي . . . . .
لتنقل أحاسيس الجوف ومشاعر الروح
***************
سالي ..
رجعنا من الحنة وكت المغربية تيمور وصلنا ورجع أخذنا لأن اسحاق طالع عنده شغل ،، غيرت فستاني وشطفت جسمي ولبست كلبية إذن المغرب صليت نزلت جوا عمتي صاحتني
اسوي العشا لأن تيمور يريدها مدري شعنده وياها من رجعنا يحجون بالالغاز وانا ووردة اطرش بالزفة نفر باذانة مافهمنا شي
طلعوا برا بالحديقة وانا رحت طلعت بتيتة وطماطة اسوي اصابع بتيتة وتحميس طماطه وعدنا من الغدا باقي يحبونه همين احمي واصبه بالعشا
************
رحمه ...
من حجيت وية تيمور ورزلني فشلت أنا شلون حطيت روحي بهذا الموقف انوب بقيت اهوجس لا يحجي شيخلصني من فاتك تندمت وتصرفت بتهور لأن جنت مقهورة انتظرت اسمع شي بس ماكو سكته يعني ماحجى مرت الايام ورحنا لحنة بيداء زين الامور تمام تطمنت بس داخلي احس شي خطأ يمكن لأن تصرفي جان ممقبول هسة أنا شعندي ركضت وحجيت عليه الولد تخبل ما عجبه كلامي واكدلي مو هو
اليوم على أساس عدنا عزيمه عمي الشيخ عازم جماعة والتهينا نطبخ والخبز قبل بيوم تعاونة أنا وسحاب عليه
بالمطبخ ..
_ مهرة فدوة شوفي محمد لا يبجي
_ نايم توني شفته ،، خالتي كلثوم تكول هذا اللحم مايكفي طلعي من المجمدة ،، هو اكو لو خلص
_ عيني لحم ذبيحتين شنو ماتكفي وياه دجاج
_ معلية شو عصبية جانت
_ اسالي عمتي ورى البيت تا تطبخ التمن
راحت مهرة وانا بقيت اكمل طبخ البانيا واراقب جدر شعرية وكشمش وضفتلها بزاليا
التفتت من سمعته يسالني ..
_ محتاجات شي راح اطلع
_ مدري بس شوف عمتي حمدة ،، ها صدك خالتي كلثوم تكول اللحم مايكفي
_ ليش يمعودة كبشين كبار شلون ميكفي بعدين همة عشر زلم وضيفي ولدنا
_ عجل بكيفك
_ خالتي ام اسحاق تبالغ مرات تريد شي زايد
اجت علينا ومن شافت فاتك ..
_ هلة ابو رعد
_ هلة خالتي خير تكولين اللحم مايكفي
_ عجل ضايفينا شيوخ من غير ديرة لزوم تبيضون وجوه
_ وجوهنا بيضا أن شاء الله خل اجي اشوف الجدورة واحكم
طلع فاتك وخالتي خزرتني ..
_ من تخلصين تعاي رايدة احجي وياج
نغزني گلبي من نظرتها وحجايتها بقيت اهوجس وافكر اول مرة خالتي هيج تخزرني
ورى شوية رجع فاتك
_ يابة هي من الله اللحم ،،خل اروح اشوف امي
ورى ما طلع فاتك وكملت طفيت جوة الجدورة رحت لبيت ام اسحاق جانت بالمطبخ هية وسالي سلمت عليها جانت ملتهية تثرم زلاطة وعاكدة الحاجب هاي هم مدري شبيهة ضايجه
_ خالة رايدة مني شي !!؟
_ اي تعاي بغرفتي
رحت وراها دخلت وسدت الباب وسحبتني من ايدي لنهاية الغرفه كعدتني عالجرباية وبصوت ناصي متريد أحد يسمع ..
_ شبيج وية تيمور من هسة احجي طك بطك لا تظمين علية يولي أنا حاسبتج بنيتي اخاف عليج ولاتكولين ماعندي ام أنا امج
بلعت ريك من سمعتها وحجيتلها كل الصار
_ أنا ما اكلج ابني نبي بس يشهد الله وليدي ماعندو هالفواين هاي منهو يترصدلج الله اعلم
_ خالة تدرين بية ماعندي أحد حتى طلعاتي كل فترة يلة اطلع
_ رجلج يدري !؟؟؟
فزيت بخوف ..
_ لا لا اندار عليج خالة فاتك مايدري لاتحجين ولا تسمعينو
_ لزوم يعرف يمه خوفج يصير شي وتاليها يذب الصوج عليج
_ أنا الرقم حضرتو فدوة لاتحجين خل تولي السالفة
_ عجيب هسة غير اعرف من شنهو تخافين انتي ممسوية غلط هو يراسلج ويحجي عليج
عاد خل رجلج يعرف
لزمت أيدها اتوسلها .. فاتك عصبي من يسمع يلومني والله ويكبر السالفة واصير حجاية بنص البيت وانا ماريد سحاب تشمت بية هية واختها
_ اوف وليش تشمت انتي شنهو ذنبج
_ خالة أنا لو حتى عايشة بيناتكم وادري تعزوني بس ابقى وحيدة ماعندي أهل أسند ظهري بيهم خالة اندار عليج افهميني أنا غير شكل لا اب لا ام لا اخ اعذري تصرفي من اكلج لا تسمعين فاتك
_ هاي هية براحتج أنا همبن ماريدلج الاذية
الله ينتقم من كلمن يكيدلج
مسحت وجهي وطلعت للبيت وانا گلبي مليان قهر اوف محد يحس بحالي
