رواية #ذئاب_الحنين
الفصل الخامس والعشرون
بقلمي : Jawhara
مساؤ فل حبايبي 🌹 اولا اشكركم لتعليقاتكم الحلوة مثلكم ربي يحفظكم ويسعدكم أن شاء الله ،، فعلا متابعات وقارئات راقيات اتشرف بيكم ،، ثانيا حبيت اوضح مايخص سرد الأحداث ،، البعض يكولون ليش احداث بطيئة استعجلي والبعض يسأل على عدد البارتات واكو الي يريد انزل بارتين باليوم حبايبي 🌹 أنا أكتب الأحداث والسرد بأسلوب يجعل القارىء يعيش اللحظه مع الابطال لدرجه يتخيلهم أمامه ماحب استعجل بهاي الرواية بالذات لأن بيها كثير سرد ومراح انطيها حقها إذا استعجلت بسردها. ،، احب انطي لكل بطل وكل شخصية حقها بالكلام وإبراز انفعالاتهم ومشاعرهم ،، أما ماتبقى من كلام بخصوص التنزيل ترى الكتابة مو شي بسيط لأن متعبة من تكتبين وانتي تتخيلين كمية إحساسهم واسلوبهم كل شخصية وطقوسها واحساسها
ماعدا ترتيب الأحداث وتسلسلها حتى توصلكم بهذه النكهة الحلوة الي تحسون بيها
وختامها مسك أن شاء الله تحياتي للجميع 🌹
********************
أنت لا تحتاج إلى البحث عن السعادة . . .
فهي ستأتيك . . . .
حينما تكون قد هيأت لها موقعاً في قلبك . .
********************
سالي ..
طول الليل لامني بحظنه اجيت انهض من السرير حس علية ورجعني وأيده حاوطتني من بطني الدم يجي حار بعروكي ونبضات گلبي بتسارع رهيب عضيت شفتي بهداوة وانا أتحسس اثر عضة أسنانه بطرفها تلمستها باصبعي ورم خفيف
تنهدت ورجعت راسي لصدره ،،يربي شكثر حنين وياي ليلة البارحه عاملني بحب واضح رغم ما صرح بس أفعاله تثبتلي هالشي
جفلت من همس بأذني ..
_ سالي
_ گليبي
باس ركبتي وبصوت خشن مليان شغف..
_ انداريت عالگلب الطيب هذا
غمضت عيوني وابتسامتي تشع بوجهي ..
_ فكني اريد أسبح
_ مستحيل ،، ماكو طلعه من الغرفه اليوم
بعدت جسمي اريد اعاين بوجهه رجع لمني أكثر وذراعه طوقني بقوة اختنكت بحظنه
_ خل اتنفس كتمتني ترى
_ صار فوك مني وجر ذراعي عضه ورجع باسه
_ ترفه جسم وترفه روح
رمشت فرحانه بي وبسوالفه وأيدي حاوطت صدره وتلمست قوة عضلاته مسحت عليه وانا اعاين شعر صدره رفعت راسي وحبيته فجأة ثبت راسي بيده وضغطه على صدره
_ يولي شسويتي بية دنك باس راسي وابتعد
كعد وسحب الغطا على جسمه ورجع غطاني
_ليش ساكته بيج شي
رديت بهزة من راسي بدون ما احجي
_ يعني الأمور طيبة ماكو خساير
تقربت وحظنت ذراعه وعيني عليه ..
_ ارباح موش خساير أن شاء الله
ابتسم ورجع أخذني لحظنه ..
_ عجل اريد اتطمن على الأرباح تا شوفها واتلمسها وأخذها بعد ههههه
**************
شهلة ..
رغم فرحتي بحملي هذا بس وضعي كلش مضوجني صرت اتعب مابية حيل كلش ونفسيتي أحسها مو تمام
_ شلونج اليوم !؟
رفعت راسي جنت مددة بفراشي من دخل علية يتطمن لأن البارحه عد زهرة ام علي بايت
_ هلة گليبي ،، مالي خلك ولا حيل
دنج باس راسي وكعد بسدي وعيونه تفتر بوجهي ..
_ همي حالج أخذي المقويات الي وصفتها الدكتورة واكلي ترى مو وحدج هاي روح مسؤلة عنها مايصير مكاطعه الاكل
_ يعقوب اكل اذبه من راسي لعبان نفس موتني
_ ميخالف حبيبة ردي من راسج اقلها يدخل معدتج اكل ،، يلة تعاي ننزل جوة نتغدى
