#أَوَلَــــــــــــمْ_نَتَّفِــــــــــقْ؟!
♟️مَــــا بَعْـدَ ڪَــــــــسْڕِ الوُعُـــــــــودِ♟️
#نجــــــلاء_الجميــــــــــــلة
♧الحلقـــــــــــــة الــواحـدة و الـثـلاثـــون بعـــد المـئـــة♧
الساعة الرابعة صباحا. تفضات الحالة من فترة و سيرجيو قاعد فالطابق الأرضي بنظرة شاردة. نزلت ميرا بعد ما غيرت ملابسها و تقدمت ناحيته بهدوء خلاه ما يحسش بوجودها
ميرا " علاه هاد النظرة فعيونك؟ " يلتفت سيرجيو متفاجأ بيها و يرد بإبتسامة مزيفة " والو.. عقلي كان فجهة ثانية.. علاه ما نعستيش"
ميرا " كيفاه يجيني النعاس بعد لي صرا.. أول مرة نحضر مهمة فاشلة.. واش راح يعمل السيد آدم درك؟ "
سيرجيو " هو يبدع فعقوباتو.. نتمنى يعفو هاد المرة علينا.. كافي لي خسرناهم من الرجال " تحدق فيه بنظرات عميقة و تمرر يديها على شعرو الغير منتظم التصفيف و تقول بهمس
"قلبك واجعك على لي ما. تو؟ .. يعني كيش تتوقع راح يكون شعوري وكان كنت واحد منهم.. لازم تخمم فيا برك باه ما تتوجعش و أنا راح نحمي نفسي باه ما نوجعكش و فالمقابل عمل نفس شي ليا" تلفت ليها بنظرة حزينة و هي وقفت و قالت " فالمسلسلات لي نتابعهم فموقف كيف هادا يبوس البطل البطلة لي جنبه.. نروح قبل ما تعملها.. و نتا ثاني روح تنعس " ابتسم لكلامها رغم القهر لي كان فقلبو و رد بهدوء " روحي تنعسي.. التعب أثر فدماغك.. ليلة طيبة" تلوح بيدها بإبتسامة خفيفة و ترجع أدراجها لغرفتها.
ــــــــــــــــــــــــــــــــــــــــــــــــــــــــــــــــ
صباح جديد ميرا مجهزة نفسها وحاملة قناصتها واقفة مع الرجال برا و رضا مقابلهم يعطيهم التعليمات
رضا " من حظكم أنو السيد آدم كان مزاجو جيد البارح بفضل المهمة لي حققتها ميرا و لي كانت تعني ليه بزاف.. و ما قدملي أي أمر بمعاقبتكم.. لكن هادا ابدا ماهوش شي يفرح.. لأنو أي غلط ثاني راح يخليه يمحيكم من الوجود و بيده. بعد أسبوع راح يكون كاين مهمة ثانية الهدف منها نردو إعتبارنا.. ما خصني أي غلطة.. و غدا راح نعطيكم الخطة.. تقدرو تروحو درك.. ميرا و سيرجيو ابقاو عندي مهمة ليكم " يغادرو رجال المنظمة و سيرجيو يشوف ناحية ميرا لي ما تحركت ولا شعرة فيها. رضا بعد ما شاف كامل الرجال غادرو تقدم منهم و قال
" أكيد بعد كامل لي صرا البارح تتوقعو أنو يكون كاين خاين وسطنا.. مهمتكم تجيبوه من تحت سابع أرض "
ميرا " تمام سيدي "
سيرجيو " أمرك سيدي.. بصح علاه حنا بالذات"
رضا " ماهاش أوامري.. السيد آدم طلب هاد شي.. و شي ثاني.. رهينتكم وليد.. أمر السيد آدم بعدم الإقتراب منو بأي شكل كان " تفاجأ سيرجيو و التفت لميرا لي عقدت حواجبها بصدمة و ردت بتساؤل " واش قصدك سيدي "
رضا " بمعنى ما عندك أي سلطة تسمحلك تأذيه و لا حتى تحاولي داك شي بدون أمر من السيد آدم " ترتعش جفون ميرا بصدمة و غضب و تقول بنوع من الغضب
ميرا " و علااه؟ " يحكم سيرجيو ميرا من كتافها باه تهدا و يسقسي بلكنة أكثر أدبا " علاه سيدي واش من سلطة يملكها وليد.. حتى أنو ما عندو أي علاقة بالمنظمة"
رضا يخزر لميرا بإنزعاج و يرد على سيرجيو " أوامر السيد آدم حد ما يعارضها "
ميرا بغضب " و إذا عارضت.. واش راح يعمل.. يقت.لني.. عادي طالما نكون ديت حقي ما يهمنيش "
سيرجيو بنبرة غضب ناهية " ميرا خلاص.. ضبطي نفسك" اعتذر من رضا و برر تصرفها قائلا" نعتذر سيدي.. حالتها النفسية مؤخرا تعبت شوي"
تلتفت ميرا لسيرجيو و تقول باستغراب "واش.. ما اثرش الامر فيك.. نتا اكثر واحد لازم ينت..قم من وليد نسيت لي عملو فأولغا"
رضا " وقت يخلص جاد حاجتو بيه راح يكون ليكي حق تعملي لي تحبي" تنظر ميرا ليه بأنفاس متسارعة من بعد تحني راسها احتراما و تغادر. اِلتفت ناحيتها سيرجيو و رجع يشوف لرضا و سأله " واش السبب لي مخليه يحميه "
رضا " وليد هاداك محامي شاطر بزاف.. و هادا شي كان بمثابة ورقة رابحة بالنسبة ليه"
سيرجيو " لكنو إنسان غدار و قادر يعمل أي شي.. هو حتى زوجتو و ماكانش قادر يحميها"
رضا " لي يخدعنا.. نهايتو الهلاك.. و أكيد ماراهش حاب ينهي حياتو " غادر رضا و سيرجيو عصر على قبضة يده بغضب كبير و قال بين سنانو " و تتوقع أنك نجيت مني.. راح يجي يوم نردلك فيه الصاع صاعين" راح لحق ميرا لي راحت تكسر لرض تحت رجليها.
أنت تقرأ
أَوَلَـــــمْ نَتَّفِــــــقْ؟!♟️مَـا بَعْـدَ ڪَــسْڕِ الوعود♟️الجـزء 𝟐
Genel Kurgu♟️نتم في هذا الجزء أحداث الجزء الأول من رواية« أولـــم نـتـفـــــق؟!» تحت عنوان «أَوَلَــــــــــــمْ نَتَّفِــــــــــقْ؟! ♟️مَـا بَعْـدَ ڪَـــسْڕِ الوعود♟️» .. ما الذي حدث بعد هروب بطلتنا رفقة سيرجيو لقلب عصابة مافيا؟ تتغير الأحداث هنا حيث ستجد...
