#أَوَلَــــــــــــمْ_نَتَّفِــــــــــقْ؟!
♟️مَــــا بَعْـدَ ڪَــــــــسْڕِ الوُعُـــــــــودِ♟️
#نجــــــلاء_الجميــــــــــــلة
♧الحلقـــــــــــــة الـتـــــاسـعـة و الـخـمـســـون بعـــد المـئـــة♧
قاعدة ميرا مع داڤيد على سطح المبنى الخاص بالقنص و هو يشوف لأغراضها بإبتسامة خفيفة
داڤيد " حسب الصور كنتي إنسانة لطيفة "
ميرا " و حسب المكتوب فالمذكرة كنت بنت حالمة.. و عندي طموحات.. بنت ما تشبهنيش ابدا "
داڤيد " ما يهمش ترجعيلها.. لي يهم تتذكريها "
تاخذ ميرا نفس طويل بتعب.. تعب بداخلها.. تراكمات تثقلها و ماعارفاش كيفاه تنظم افكارها المبعثرة فزوايا عقلها.
ـــــــــــــــــــــــــــــــــــــــــــــــــــــــــ
سيرجيو و كارلا كانو يمشو فوسط الساحة الحمراء.. نفس المكان لي كان من فترة فيه مع ميرا. هاديك الأحجية لي ما لقالهاش حل.. كارلا عاملة يديها فجيوب سروالها و تمشي بهدوء.
كارلا " نتا كبرت فروسيا؟ "
سيرجيو " صح.. كانت احلا الايام ديك لي قضيتها مع أمي و أولغا.. و لعلمك أمي كانت من إيطاليا "
كارلا " وااو.. يعني بينا شي مشترك.. ما نستغربش انك ما تشبهش الروس "
سيرجيو " صح.. ما نشبهمش أبدا.. الشي لي يربطني بروسيا هو جنسيتي و حبي لأرضها فقط حتى أني هربت منها.. و لكن الظاهر هي راهي متمسكة بيا و رجعتني ليها فالأخير "
كارلا " علاه هربت منها؟ "
سيرجيو " لأني كنت رافض حياة المافيا.. ما علاباليش نتوما علاه حبيتوها "
كارلا " أنا تولدت فقلب المافيا.. ما نعرفش الحياة العادية كيفاه عاملة.. زعيم المنظمة فإيطاليا شريك الزعيم آدم.. و كنت من بين عشرين عضو تم إرسالهم لروسيا و توزعنا على المناطق الخمس.. أنا الوحيدة لي جيت لهنا من العشرين هادوك بعد ما تلقيت تدريب فاليابان"
سيرجيو " واضح أنو دربوكم مليح.. مهاراتكم عالية "
كارلا " صح.. تدربنا بكل قسوة.. خلينا نحكو فمواضيع ثانية.. مثلا.. حكيلي قصة ميرا.. البارح حسيتك راح طيح من خوفك.. نوعدك ما نخبر حتى حد.. حتى هي" ساد صمت للحظات و بعدها التفت ناحيتها و قال
سيرجيو " واش نحكيلك بالذات"
كارلا " كيفاه تعرفت عليها.. علاه نحسها عندها قصة ماساوية "
سيرجيو " تعرفت على ميرا اول مرة لما كنت في بريطانيا.. " واصل سرد قصة ميرا و هوما يمشيو و كارلا تصدمت من شي لي سمعاتو. وقتها برك عرفت سبب حالة ميرا النفسية
كارلا " صعب بزاف شي لي عاشتو.. واضح سبب تعلقها بيك "
سيرجيو " راني نشوف فيها تحاول تبعد هاد الفترة.. تصرفاتها رجعت غريبة " تصمت كارلا للحظات قبل ما تقول ليه و هي ترجع تحط يديها بجيوب سروالها الخلفية.
كارلا " يمكن حبت تعطيك مساحتك باه تعيش على جال نفسك.. يعني نتا مضيع بزاف وقتك على جالها.. لازم تلتفت لحياتك.. فالنهاية الحياة تستمر "
سيرجيو " واش من حياة تقصديها.. فقلب المافيا حياتنا ترجع رهينة فايدي الزعماء"
كارلا " حتى فقلب الحرب.. تقدر تلقى الحب "
سيرجيو ابتسامة ساخرة " و نتي راكي مصدقة كلامك "
كارلا " أكيد.. ما أنا وقعت في حبك أصلا " ببساطة قالتها و على وجها إبتسامة لطيفة و سيرجيو بقا يبحلق فيها مبهوت من اعترافها المفاجئ. ضحكت من ردة فعلو و قالت
كارلا " هههههه علابالي ما تبادلنيش شعوري.. لكن مانيش من النوع لي يستسلم بسرعة.. راح نعمل كلش نقدر عليه حتى ترجع تحبني نتا "
سيرجيو بتوتر " فاجأتيني "
كارلا " طبيعي تتفاجأ.. ما تحاولش تتهرب مني.. حاول تعطينا فرصة نتعرفو على بعض " بإبتسامتها قابلت عيونه و هو ماش عارف واش يرد.. صح هو كرس حياته لخدمة المنظمة و حماية ميرا.. كأنو نسي جانب اساسي و لي هو حياتو الشخصية.
أنت تقرأ
أَوَلَـــــمْ نَتَّفِــــــقْ؟!♟️مَـا بَعْـدَ ڪَــسْڕِ الوعود♟️الجـزء 𝟐
General Fiction♟️نتم في هذا الجزء أحداث الجزء الأول من رواية« أولـــم نـتـفـــــق؟!» تحت عنوان «أَوَلَــــــــــــمْ نَتَّفِــــــــــقْ؟! ♟️مَـا بَعْـدَ ڪَـــسْڕِ الوعود♟️» .. ما الذي حدث بعد هروب بطلتنا رفقة سيرجيو لقلب عصابة مافيا؟ تتغير الأحداث هنا حيث ستجد...
