أَوَلَـــــمْ نَتَّفِــــــقْ؟!♟️مَـا بَعْـدَ ڪَــسْڕِ الوعود♟️الجـزء 𝟐

♧الحلقـــــــــــــة الســـــادســــة بعـــد المـئـــة♧

#أَوَلَــــــــــــمْ_نَتَّفِــــــــــقْ؟!
♟️مَــــا بَعْـدَ ڪَــــــــسْڕِ الوُعُـــــــــودِ♟️
#نجــــــلاء_الجميــــــــــــلة

♧الحلقـــــــــــــة الســـــادســــة بعـــد المـئـــة♧
نزلت ميرا لابسة سروال اسود و قميص بنفس اللون مع معطف جلدي و حذاء شتوي عاملة يديها فجيوب الفاست من البرد و تشوف للرجال لي متلمين. تقدم منها رضا و سارت معاه تا وصلت للساحة الواسعة لي تتوسط جاد و رجالو لي مقابلينو و وقفت شافت ناحيت جاد و اسراء و قالت بهمس " هادي إسراء أكيد "
جاد " أهلين ميرا.. أكيد تفاجأتي أني عيطتلك فهاد الوقت "
ميرا " عندي توقع.. و من الإجتماع هادا أكيد توقعي فمحلو.. أكيد راح ننضم ليكم درك"
جاد " ذكية.. لكنك ما حضرتيش من قبل مراسم كيف هادي "
ميرا " لا "
جاد " ماعليش راح نعرفوك بطريقة الانضمام " أمر رضا رجال جابو شخص مقيد و وقفوه مقابل ميرا فالساحة لي تتوسطهم و تقدم رضا ليهم يفهمها القواعد " هادا الشخص لي مقابلك.. خائن كان فالمنظمة تاعنا و الخائن عنا حكمو الإعدام و نتي راح تكون مهمتك القضاء عليه " تلفتت ليه بتفاجؤ و رجعت خزرت لجاد لي كان يراقب بصمت
رضا " في حال أنك تراجعتي و ما نفدتيش الأمر خلال عشر ثواني راح نسلمو ليه فرصة قت.لك و يتم العفو عليه " كانت قاعدة جديدة ترعب كي سمعها سيرجيو و ميرا ضيقت عينيها بصدمة و هي تشوف ناحية الخائن لي تبسم كي سمع آخر كلام رضا. إسراء ابتسمت بعد ما سمعت كلام رضا و قالت
إسراء " نتوقع تعملها.. أنا عملتها من قبل لوما كنت نتا عامل إحتياطك "
جاد " هي راح تعملها زكارة ماش تهديد شوفي نظراتها للخائن". سلم رضا السلاح لميرا جهزاتو و صوبت ناحية الخائن لي حاول يستعطفها بنظراتو و هي بدون ما يرفلها جفن أطلقت عليه رصاصة لنص راسو أطاحت بجثته أرضا حتى قبل ما يبدا رضا يعد. الكل تفاجؤو من فعلتها و أولهم سيرجيو لأنهم ما توقعوش ميرا لي جات للمنظمة شبه فاقدة عقلها. ولات تق..تل بلا عقل.
طلقت إسراء تصفيرة و هي تصفق
إسراء " ما مداريش نقولها بصح عجبتني هادي " تلفتت لجاد و قالتلو " وينتا ترجع خائن باه نعمل فيك هاك "
جاد " ما تخونيش غي نتي لأنك عارفة واش ممكن نعمل "
إسراء " هه.. اعتبرني خفت " وقفت من مكانها و تقدمت من الجثة شافت ليها و ميرا خزرت ناحيتها و قالت " إسراء.. دمية جاد الأساسية " تلفتت إسراء ليها بنظرة استغراب و غضب و رجعت وقفت
إسراء " عيدي واش قلتي " تبسم جاد من الموقف و ميرا بهدوء رجعت رددت لي حكاتو " إسراء.. دمية جاد الأساسية" ضحكت إسراء باستهزاء من جرأة ميرا قبل ما تهجم عليها تزدخها على لرض و راحت تضربها بوكس لوجها ، وقتها عيط سيرجيو و هو رايح يجري ناحيتها " وقفي.. الطفلة ما تحملش الضرب " لكن مين يوقف إسراء وقت تتعصب. ضربتها بوكس لوجها حتى تورم خدها و قالت بعصبية " شكون حاسبة روحك باه تحكي بهاد الوقاحة معاي.. ماش إسراء لي تتعاير سمعتي.. نحسب أمك ما جابتكش " قام جاد من بلاصو و حكم إسراء من دراعها و قال " بعدي على الطفلة احسن ما تقتليها" بعدت يده عليها و حكمت على خناق ميرا لي كانت تخزر ليها بألم ممزوج بالغضب
إسراء " مرة ثانية كي تفوتي عليا.. حطي راسك.. عينيك ما يترفعوش ليا "
ميرا و هي تسعل بشدة " طلقيني.. راح نتخنق"
سيرجيو " سي آدم.. ما تنساش مرض ميرا "
جاد " إسراء بعدي عليها " طلقت من خناقها و لحقتلها كف قبل ما توقف و تمسح الغبرة من ملابسها
إسراء بنبرة تهديد " راني حذرتك " تلف رايحة لسيارتها و سيرجيو يجري لميرا ساعدها باه اعتدلت فجلستها وشاف الضربة لي بدات تزراق و تتوسع فخدها. أما ميرا فبقات متبعة إسراء بعينيها و ابتسمت إبتسامة خفيفة يا دوب حركة عضلة خدها
سيرجيو " لازم تاخدي حقنة فورا "
ميرا " خلاص درك رجعت عضوة معاكم رسمي؟ "
سيرجيو " ما علاباليش واش صرا لعقلك.. أما أكيد لي قرر هاد الشي ماشي ميرا القديمة " جاد كان متبع إسراء بعينيه لين ما ركبت سيارتها و قلعت بسرعة الريح، من بعد تقدم من ميرا و قال " من درك راكي عضوة فمنظمتنا .. خلي سيرجيو يعلمك القواعد "
سيرجيو " أمرك سيدي ".. أمر جاد رضا باه ينتهي الاجتماع و سيرجيو وصل ميرا لغرفتها.