#أَوَلَــــــــــــمْ_نَتَّفِــــــــــقْ؟!
♟️مَــــا بَعْـدَ ڪَــــــــسْڕِ الوُعُـــــــــودِ♟️
#نجــــــلاء_الجميــــــــــــلة
♧الحلقـــــــــــــة الـســـادسـة و الـثـمـــانــون بعـــد المـئـــة♧
ميرا رجعت بعدها للمنطقة الخاصة . وين كان وليد ينتظر فيها على أحر من الجمر.. و لي ما إن لمحها حتى تقدم منها و على وجهو ابتسامة كبيرة.
ميرا بإستغراب " علاه الإبتسامة هادي "
وليد " راح نرجعو للبلاد ميرا.. جات الفرصة أخيرا "
ميرا " واش قصدك.. نتا لي راح تروح معاي.. مستحيل "
وليد " أنا راح نرجع معك.. و راح يكون داڤيد الوصي عليك "
ميرا تخلطت عليها ما فهمت حتى شي من كلامه.
ميرا " أحبس.. واش من داڤيد تاني.. واش هاد التعقيد "
رضا " الموضوع كان راح يتوضح أكثر لو أنو بدا القصة من الأول بدل ما يبدى يخبرك أنكم راح تكونو شريكين فالمهمة "
ميرا " سيدي.. مستحيل تكونو واثقين منو لدرجة ترسلوه فمهمة معي"
رضا " هادي اوامر السيد آدم.. و نظرتو عمرو ما تخيب"
ميرا " واش قصة داڤيد.. علاه هو؟؟ "
رضا " على مهل و راح تفهمي كلش بالتفصيل
ضغطت ميرا على جبينها و رضا استرسل " داڤيد راح يروح معكم باه يخبر عايلتك انو كان لقاك واقعة فمكان و هو لي انقذك و عالجك.. و أنو هو لي حوس على عايلتك و قدر يلقا وليد لي هو زوجك "
ميرا " لكنو ماهوش زوجي "
رضا " قانونا راكي زوجتو "
وليد " شي هذا حتى حد ما يقدر ينكره ميرا.. القانون يثبت أنك زوجتي"
ميرا " أسكت أنت.. سيدي لما نكون مع هاد الشخص مستحيل نكون مرتاحة "
رضا " ماناش باعتينك ترتاحي.. هادي مهمة راح تعمليها.. باقي التفاصيل نحكيهالك من بعد.. كاين مهمة صغيرة قبل ما تروحي لازم تعمليها "
ميرا " واش من مهمة "
رضا " شي ليه علاقة بديڤ.. راح تكون ممتعة بالنسبة ليك طالما ليها علاقة بعدوك و راح تكون مهمتك الأخيرة هنا"
ميرا بإبتسامة " طالما تخص الحيوان هذاك.. فيا مرحبا بيها"
راح نرسلك تفاصيلها.. و احرصي تبقى سرية لأنو جواسيس ديڤ كثيرين "
ميرا " أمرك سيدي " يغادر رضا بعدها و وليد يبقى مقابل ليها بإبتسامة.
وليد " صدقيني العودة هي لي راح ترجعلك ذاكرتك "
ميرا ببرود " على أساس بينا ذكريات سعيدة باه راك متشوق ترجعلي " تغادر مكانها مخلياتو وراها و قلبها مقبوض. حاسة انو شي لي كان بعيد راه يقرب بشكل أسرع مما توقعت.
ــــــــــــــــــــــــــــــــــــــــــــــــــــــــــ
سيرجيو قاعد فسيارتو بعد ما رجع من الخارج و يتفكر في كلام جاد.
༺༽Flashback༼༻
واقف سيرجيو بجوار جاد و هو يراقب من بعيد إسراء لي كانت تدرب مع مدربها على القتال. شي لي كان اول ما تدربت عليه عند جمال قبل ما تعشق الملاكمة و تدخل عالمها.
جاد يشوف ليها و جامع يديه ورا ظهره كأنو يشوف لإنجاز عظيم من إنجازاته.
جاد " شايف إسراء هاديك.. تعبتني بزاف باه قدرت نسيطر عليها و نخليها تحت جناحي بإرادتها.. باسلوبين.. التهديد و بتقديم فرصة للإنتقام على طبق من ذهب "
سيرجيو " ماكانش لي يصعب عليك سيدي "
جاد " صح.. علابالك بلي راح نرسل ميرا للجزائر " يرفع سيرجيو نظراته لسيده بصدمة ما مصدقش واش سمع.
سيرجيو " كيفاه.. قصدي عندها مهمة تما؟ "
جاد " الظاهر ما خبراتكش.. رغم لي هي تعرف من اكثر من شهرين بالأمر.. واضح انها تنفذ الأوامر بحذافيرها "
سيرجيو " واش من مهمة راح تعملها سيدي "
جاد " مهمة ترجع بيها شي نأخذ مني بالقوة.. لكن كاين سببين لاني ارسلتها هي بالذات .. اولهم انها شاطرة فتنفيذ مهماتها.. و الثاني... أني ماحابش نحطها فراسي أكثر.. و مادامها قدام عينيا راح نحطها اكثر.. و أكيد تعرف نهاية لي نحطهم فراسي" رجع اِلتفت لإسراء. وقتها سيرجيو عرف أنو مخاوف ميرا كانت فمكانها.. ماكانتش مجرد أوهام.
༺༽Back༼༻
مسح سيرجيو على وجهه بضيق، و يا ريت الضيق هذا يروح عليه.. هو درك حاس روحه هرب ميرا من المو..ت و حطها فالجحيم.
أنت تقرأ
أَوَلَـــــمْ نَتَّفِــــــقْ؟!♟️مَـا بَعْـدَ ڪَــسْڕِ الوعود♟️الجـزء 𝟐
General Fiction♟️نتم في هذا الجزء أحداث الجزء الأول من رواية« أولـــم نـتـفـــــق؟!» تحت عنوان «أَوَلَــــــــــــمْ نَتَّفِــــــــــقْ؟! ♟️مَـا بَعْـدَ ڪَـــسْڕِ الوعود♟️» .. ما الذي حدث بعد هروب بطلتنا رفقة سيرجيو لقلب عصابة مافيا؟ تتغير الأحداث هنا حيث ستجد...
