أَوَلَـــــمْ نَتَّفِــــــقْ؟!♟️مَـا بَعْـدَ ڪَــسْڕِ الوعود♟️الجـزء 𝟐

♧الحلقـــــــــــــة الـثـــالــثــة بعـــد المـئـــة♧

#أَوَلَــــــــــــمْ_نَتَّفِــــــــــقْ؟!
♟️مَــــا بَعْـدَ ڪَــــــــسْڕِ الوُعُـــــــــودِ♟️
#نجــــــلاء_الجميــــــــــــلة

♧الحلقـــــــــــــة الثــــــــــالثـة بعـــد المـئـــة♧
ميرا كانت واقفة تستنى ديڤ يرتب الأهداف على بعد عدة أمتار بعدها تقدم منها و سلمها سلا..ح و هي ركزت نظرها و ثبتت يديها مستعدة باه تطلق النار
سيرجيو "راح نبدا نعد و نتي لازم تصوبي عليهم كامل فأسرع وقت تقدري عليه ..  3...  2... 1"  بعد الرقم الأخير اطلقت ميرا الرصاص بشكل متواصل أصابتهم كامل. 8 أهداف فغضون 10  ثواني  ابتسم سيرجيو و هو يشوف للمؤقت " أحسنتي.. 10 ثواني لابأس بيها.. حاولي تسرعي أكثر درك " راح سيرجيو و رتب زجاجات ثانية وقت سمع إطلاق رصاص.  حالة ميرا النفسية خلاتو يفكر أنها عملت شي فنفسها تلفت جافل من الصوت ناحيتها و لكنو لقاها مصوبة فالجو.  سارت ميرا ناحيت المكان و لحق بيها هو يشوف واش عملت لقاها واقفة و تحتها واقع طير كبير عقد حواجبه و حنا يشوف ليه.
سيرجيو " ماراهش وقت الصيد..  باه تصوبي على طير..  إذا اصطدنا بتهور راح ينقرضو حيوانات الأرض "
تحني ميرا و تتكا براسها على ركابيها مركزة على الطير
ميرا " مليت من الزجاجات..  الحيوانات تتحرك لكن الزجاجات ثابتة "
سيرجيو " لكن مااش فوقت التكاثر ميرا " ترفع ميرا نظراتها لسيرجيو بعدها تمسح على شعره و هي تقول " قلبك حنون سيرجيو..  ما يناسبش هاد المكان " يستغرب كلامها و حتى حركتها. و هي توقف و ترجع لمكانها و تجهز سلاحها باه تطلق  مرة ثانية.
آدم لي كان يراقب من بعيد تبسم بإعجاب و تقدم بهدوء ناحيتهم
آدم بالعامية "ميرا.. رجعتي قناصة محترفة"  تلتفت تنظر ليه بصمت من بعد قالت " الوقت يعلم كلش" يتقدم سيرجيو منهم و يوقف مقابل جاد بثبات " أهلا سي آدم "
آدم " راك تصنع قناصة مافيا محترفة..  كان أحسن شي عملتو أنك دربتها"
سيرجيو " ماهاش عضوة مافيا.. برك علمتها باه دافع على نفسها وقت الضرورة "
آدم " ماش نتا لي تقرر هاد الشي "
ميرا " إذا سمحتلي نروح لزنزانات الرهائن..  راح ننضم كعضوة ليكم "
سيرجيو نقزها من كتفها باه تسكت و هي قالت " ما تنقزنيش..  راني نحكي بجدية..  حابة نشوف وجه الحقير هاداك لي بسبابو راني فهاد الوضع..  وجهو الوحيد لي راه يضل ملازم كوابيسي و لو أني ما نذكرش مين هو"
سيرجيو " حالتك الصحية ما تسمحش باه تواجهيه فهاد الفترة"
ميرا و هي تنظر ليه بغضب " خمس سنين راهم "
آدم " ما تستعجليش ميرا.. مازالك صغيرة"
ميرا " عمري 30 سنة.. مارانيش صغيرة "
آدم " ديڤ رهينة و ورقة رابحة عندي..  ما نسمحلكش تأذيه لأني نحتاجو"
ميرا " كاين أنواع تعذيب ما تقتلش " سيرجيو يفتح عينيه مستغرب كلامها و آدم ابتسم باعجاب
آدم بالعامية " حسبت إسراء هي القوية..  و لكن راني نشوف شي غريب يولد داخلك..  كائن شيطاني "
ميرا " ماكان حتى شي نولد بداخلي..  كل ما في الأمر أني حابة ناخد حقي " سيرجيو يشوف ليهم ما فاهم من كلامهم غير القليل لي تعلمو من ميرا و آدم هز راسو مجاري لكلامها و رد
آدم " راح نشوفو مين فينا الصح.. راح نسمحلك تعاقبي ديڤ بالأسلوب لي حاباه بشرطين..  الأول أنو تنفدي وعدك و تنضمي لينا ، أما الثاني فأنو تنفدي عقابك علنا قدامنا كامل " ابتسمت ميرا و قالت " الشرط الثاني نعتبرو هدية " حط آدم يدو على راسها و قال " نظرتي عمرها ما تخيب ميرا.." راح بعدها مخلي ميرا في بلاصها تشوف فجاد لي قاعد يبعد عليها
ميرا " سيرجيو.. هاد الإنسان كيفاه باه أمنت على عمرك و رجعت ليه"
سيرجيو " ما أمنتش عليه..  لكن كان المنفذ الوحيد باه نحميكي و نحمي روحي ..  لأنو ديڤ ماهوش ساهل..  النطاق لي رانا محصورين فيه هو أءمن مكان فالعالم ليك "
ميرا " لهاد الدرجة عندو نفوذ "
سيرجيو " إذا أنا كنت إبن يمين آدم..  فهو إبن عدوه..  من أخطر رؤوس المافيا عنا فروسيا.. و لو كان هارب منهم لكن فالنهاية يبقى ولده "
ميرا " ورقة رابحة.. رهينة " التفتت ليه و كملت " خلينا نرجعو نكملو "
سيرجيو " واش كنتو تحكو بلغتكم"
ميرا " أني ننضم ليكم..  و نعذب الحق. ير هاداك علنا قدام الرجال هنا كامل " يركز مع ملامحها يحاول يشوف اي تعبير يدل على أنها تمزح
سيرجيو " راكي تحكي منيتك و لا تضحكي "
ميرا " أبدا..  مانيش نضحك "
سيرجيو " عمبالك الموضوع مزحة "
ميرا " و لأنو ماشي مزحة..  راح ننضم ليكم "
سيرجيو " الظاهر فقدانك لذاكرتك ما غيرش تهورك "
ميرا " علاه؟..  كنت متهورة أنا"
سيرجيو " وااه و متهورة بزاف.. لولا تهورك ماراكي هنا و لا وصلتي لبريطانيا أصلا"
تبسمت ميرا ابتسامة بسيطة و تلفتت ليه و قالت " وقتها ماكنتش راح نلقاك "
رجعت تركز مع الأهداف تحت نظرات سيرجيو لي رجعت ميرا لغز ماقادرش يفهمو..  مرات ترجع طفلة صغيرة فبراءة تعاملها و مرات يلقاها سف.احة فتفكيرها