《ဖြေဆေး》- ဘာသာပြန် 『Completed』

အခန်း - ၂၇

Chapter ● 27 ●

ချန်ခေါ့သည် နေ့စဉ်ဘဝတွင် အသုံးတည့်သော life hacks များ၊ နည်းလမ်းများနှင့် အိမ်မှုကိစ္စများတို့ကို ကျွမ်းကျွမ်းကျင်ကျင်နှင့်ရင်းရင်းနှီးနှီးမရှိမှန်းသိသော်လည်း၊ စောင်အစွပ်တောင် မစွပ်တတ်သည့်အဆင့်အထိကိုတော့ ကျန်းယွီသော် လုံးဝ ထင်မထားခဲ့ပေ။

အိပ်ရာကိုမူ သပ်သပ်ရပ်ရပ်ဖြစ်အောင်တော့ ပြင်ဆင်ထားသည်။ စောင်ကို ပြန့်နေအောင် ဖြန့်ခင်းထားသော်လည်း ခြေရင်းခေါင်းရင်းပြောင်းပြန် ဖြစ်နေသည်။ ထို့နောက် စောင်အောက်တွင် စောင်အစွပ်ကို သေသေချာချာမြင်နေရပြီး၊ ခေါင်းအုံးပေါ်တွင် သည်အတိုင်း ဖြန့်တင်ထားသော ခေါင်းအုံးစွပ်ကိုလည်း တွေ့ရသည်။

ကျန်းယွီသော်က ချန်ခေါ့အား ဝက်တစ်ကောင်လို ဘာမှမလုပ်တတ်သူဟု ထင်မိသော်လည်း စောင်အစွပ်ကို တကယ်တမ်းစွပ်ရလျှင် မစွပ်တတ်သူတော့ မဖြစ်နိုင်ဟု ထင်ခဲ့သည်။ အလွန်ဆုံးမှ အချိန် နည်းနည်းကြာသုံးရလိမ့်မည်ဟုသာ ယူဆနေခဲ့သည်။ သို့သော် ချန်ခေါ့က ဤကဲ့သို့ ထင်သာမြင်သာသော အချက်အလက်များဖြင့် သူသည် ဤအိမ်သို့ပြောင်းလာကတည်းက ခြုံစောင်ကို သည်လို အလွှာလိုက်ခွဲပြီး တောက်လျှောက်ခြုံအိပ်လာခဲ့သည်ဟု ကျန်းယွီသော်အား သက်သေပြနေသည်။

ကျန်းယွီသော်သည် ယခင်က မကြာခဏဆိုသလို ချန်ခေါ့၏ အချို့သော အသေးအဖွဲအပြုအမူတို့က မသင်္ကာစရာကောင်းသည်ဟု ခံစားရလေ့ရှိသည်။ ထိုမသင်္ကာစရာအချက်တို့ကို တကယ်တမ်း ရေတွက်ကြည့်မယ်ဆိုလျှင်လည်း တော်တော်များသည်။ သို့သော် သူ၏ ချန်ခေါ့အပေါ်ထင်မြင်သုံးသပ်ချက်မှာ တစ်လျှောက်လုံး မပြတ်မသားနှင့် ချီတုံချတုံဖြစ်နေသည်။ အကြောင်းမှာ အချိန်တော်တော်များများတွင် ချန်ခေါ့သည် ကြည့်လိုက်လျှင် စိတ်ကောင်းရှိသော သဘောထားကောင်းသည့် ငပိန်းတစ်ယောက်နှင့် ပိုတူနေ၍ဖြစ်သည်။

ယနေ့တွင် ကျန်းယွီသော်သည် ချန်ခေါ့အား သံသယထပ်မဝင်တော့ရန် ဆုံးဖြတ်လိုက်တော့သည်။ အကယ်၍ တကယ်တမ်း ပြဿနာရှိနေမည်ဆိုလျှင်တောင် ချန်ခေါ့သည် ခံရသူသားကောင်သာ ဖြစ်နိုင်သည်။