《ဖြေဆေး》- ဘာသာပြန် 『Completed』

အခန်း - ၈၉

Chapter ● 89 ●

နေ့ရက်အနည်းငယ်ဝေးကွာပြီးလျှင် မည်သူမဆိုတိုးတက်ပြောင်းလဲသွားတတ်ပြီး ယခင်ကအမြင်အတိုင်း ကြည့်ရှုရန်မသင့်တော့ပေ။

ချန်ခေါ့နှင့်ဝေးကွာခဲ့သည်မှာ ရက်အနည်းငယ်မကတော့ဘဲ ဘယ်နှရက်တောင်ရှိပြီမှန်း ကျန်းယွီသော်မသိတော့ပေ။ သို့သော် မထင်မှတ်ထားဘဲ ချန်ခေါ့သည် အရင်ကအတိုင်း ကလေကချေကဲ့သို့ ပြုမူပြောဆိုတတ်ဆဲဖြစ်သည်။ ဘာတိုးတက်မှုတစ်စုံတစ်ရာမှကို မရှိလာပေ။

မဟုတ်ဘူး။ တိုးတက်မှုမရှိနေခြင်းလည်း မဟုတ်ပေ။ ကလေကချေရေချိန်အရ တိုင်းတာရမည်ဆိုလျှင် အများကြီးတိုးတက်လာသည်။

ထိုကဲ့သို့ဆိုသော်ငြား ကျန်းယွီသော်ကိုယ်တိုင်၏တိုးတက်မှုကလည်း မနည်းလှပေ။ အကယ်၍ ယခင်ကဆိုလျှင် ထိုကဲ့သို့သောစကားကို ချန်ခေါ့ပြောလာပါက ကျန်းယွီသော်အနေဖြင့် အနည်းနှင့်အများတော့ ကျင့်သားမရသလို ကသိကအောက်ဖြစ်မိလိမ့်မည်ဖြစ်ပြီး ထိုးနှက်မှုကလည်း အနည်းငယ်ပြင်းထန်နေမည်။

သို့သော် ယခု ချန်ခေါ့ကထိုစကားကိုပြောထုတ်ချိန်တွင် ကျန်းယွီသော်သည် ကလေကချေအိုကြီးဟူသော သုံးသပ်ချက်အပြင် အခြားမည်သည့်ခံစားချက်မှ မခံစားရပေ။ ကျင့်သားမရခြင်းမျိုး မခံစားရသလို နေရခက်သလိုလည်းမဖြစ်ပေ။

ယခုလောလောဆယ်တွင် သူသည် ချန်ခေါ့အား အလွန်တရာ နမ်းချင်စိတ်ဖြစ်နေခြင်းကြောင့်လည်း ဖြစ်ကောင်းဖြစ်နိုင်သည်။

ပတ်ဝန်းကျင်အခြေအနေက ခွင့်မပြုနေ၍သာ...။ ဘေးနားတွင် လူနာဆောင်နှင့် ဆရာဝန်ရုံးခန်းများရှိနေသည်။ ပြတင်းပေါက်အားလုံးတို့က ဤခြံဝန်းဘက်ဆီသို့ မျက်နှာမူထားကြသည်။

"ဒေါက်တာလီက နောက်ထပ်အချိန်တစ်ခုလောက် ထပ်စောင့်ကြည့်ပြီးရင် မင်းဆေးရုံအရင်ဆင်းလို့ရပြီတဲ့"

"အခုလည်း ကျွန်တော်ဆင်းလို့ရနေပြီ"

"သူတို့စကားကို နားထောင်ရဦးမယ်လေ"

ချန်ခေါ့ကပြောနေရင်း ခဏရပ်လိုက်ပြီးနောက် တုံ့ဆိုင်းဆိုင်းဖြင့် တိုးလျစွာမေးလာသည်။