《ဖြေဆေး》- ဘာသာပြန် 『Completed』

အခန်း - ၆၁

Chapter ● 61 ●

ယခုလက်ရှိအခြေအနေပုံစံသည် သူ့အား ရန်ဖြစ်ခြင်းနှင့် နမ်းရှုပ်ခြင်းထဲမှ တစ်ခုခုကို ရွေးချယ်ရမလို ဖြစ်နေသည်ဟု ချန်ခေါ့က ခံစားနေရသည်။ သူကလည်း ရန်ဖြစ်ခြင်းက ပို၍သင့်တော်ပြီး အံကိုက်နေသည်ဟု ယူဆရမလိုပင်။

ကျန်းယွီသော်သည် လွန်ကဲသော မျက်နှာပူအားနာမှုကြောင့်လားမသိ၊ အလွန်တရာကို ကြမ်းတမ်းခက်ထန်လာသည်။ အနှီ "အနမ်း" မှာ အကြမ်းဖျင်းအားဖြင့် ချန်ခေါ့အား နံရံတွင်ဖိကပ်ပြီး လည်ပင်းကို ဖိညှပ်ဖမ်းကိုင်ပြီး နမ်းခြင်းသာဖြစ်သည်။

ဤသည်မှာ ရန်ဖြစ်ကြသော ရန်ပွဲသာဖြစ်တော့သည်။ ထို့ပြင် အလစ်ငိုက်တိုက်ခိုက်ခံရပြီး တရားမျှတမှုမရှိသောအခွင့်အရေးဖြင့် အနိုင်ယူသော ရန်ပွဲလည်းဖြစ်သေးသည်။

လျင်မြန်သွက်လက်ပြီး ပြတ်သားခိုင်မာသောစိတ်ဓါတ်ကိုလည်း ထည့်ပေါင်းရမည်။

လည်ပင်းကို ဖိညှစ်ခံထားရလွန်း၍ ချန်ခေါ့တစ်ယောက် အသက်ရှူရခက်သလိုဖြစ်မလာခင်တွင် ကျန်းယွီသော်က လက်လွှတ်ပေးလိုက်ပြီဖြစ်သည်။

ချန်ခေါ့က နံရံနားတွင် မှီရပ်နေရင်း လက်မောင်းကို ပွေ့သယ်ထားပြီး အချိန်အတော်ကြာသွားတော့မှ သတိပြန်လည်လာသည်။ သတိလွတ်စွာငေးငိုင်နေသောအချိန်သည် နမ်းခဲ့သောအချိန်ထက်ပင် ကြာနေတော့သည်။

"သွားလေ"

ကျန်းယွီသော်က အသံမှိုင်းမှိုင်းနှင့်ပြောလာသည်။

ချန်ခေါ့က ကျန်းယွီသော်အားကြည့်နေပြီးနောက် အိပ်ခန်းထဲသို့ဝင်သွားရင်းပြောလာသည်။

"... ... မင်းဘာလုပ်တာလဲ။ အချဉ်ပန်းကန်တို့တာလား"

ကျန်းယွီသော်က စကားမပြောဘဲ အိပ်ခန်းတံခါးဆီသို့သွားကာ တံခါးဘောင်တွင် မှီရပ်နေသည်။ တစ်အောင့်ခန့်ကြာတော့မှ ထရယ်လိုက်သည်။

"ခင်ဗျားကလေ စကားပြောရင် အပေါက်ကိုဆိုးလွန်းတယ်"

"နမ်းရင်းနဲ့ အရသာခံမိသွားတယ်ပေါ့"

ချန်ခေါ့က သိုးမွေးဆွယ်တာတစ်ထည်ကို ဆွဲထုတ်ယူလိုက်ပြီး အင်္ကျီလက်ကို တစ်ချက်ကြည့်လိုက်ပြီးနောက် အင်္ကျီကို ဗီရိုထဲသို့ပြန်ထည့်လိုက်ကာ နောက်ထပ် ရှပ်အင်္ကျီတစ်ထည်ကို ယူထုတ်လိုက်ပြန်သည်။