🍂هناك أمل🍂
🍸 مصادفتك هي الحلم لواقعي وحقيقة لنبض قلبي🍸بارت14
في منزل متكون من طابقين منزل مقاد ومفرش فراش عصري باين بلي ناسوا دواقة ، كيتسمع صوت القرأن من بعيد على طول الشارع وريحة سكسو فايحة .
باب الدار محلول وشي داخل وشي خارج ، من بعيد غتعرف بلي شي گنازة قايمة تماك ، غي من الناس لي كانوا كيعزيو لرجل متوسط الطول بلباس تقليدي عبارة على جلابة بيضة ، ملاميحوا كملامح أب حسناء ، واقف فباب الدار وكيتلقا التعازي من الناس .
شخص(بحزن): السلام عليكم سي علال البركة فراسك أسيدي من جهة خوك و مراتوا الله ارحمهم .
علال(بدون ملامح): وعليكم السلام ، مامشا معاك باس الحاج .
شخص: أشنوا طرا ليه مسكين حتى ماتوا ، أنا يالاه وصلوني الخبار.
علال: ماتوا بكسيدة الحاج إوا هادشي لي عطا الله ديما كنگول ليه مزربش فالطريق مالك كطير هاهو جابها فراسوا.
شخص: إوا الله ارحمهم هادشي كان مقدر معندك مادير ، أما البنية فيناهيا .
علال(بصبر قرب انفد): راها هنا فدار باها جبتها اليوم فالصباح من الكنينيك.
شخص: إوا الله اجيب الشيفة تهلا فيها أسي علال هاديك دبا أمانة من عند خوك تهلا فيها .
علال: إكون خير إن شاءالله.دخل مرحبا بيك.
دخل السيد للداخل وخلا علال كيسبوا غي بينوا وبين راسوا.
علال(بعصبية): إلى كان فيها الأجر ديها نتا نيت وربيها ، أممم گلاك راها أمانة خطية هادي وبلاني بها الله ، إخزييييت.
داخل الدار كانت صالة عامرة بالرجال بلباس التقليدي ومقرئين كيجودوا ، و الكل كان فإصغاء للذكر الحكيم .
وفالصالة الثانية كانوا العيالات بالجلالب و الفولار ، شي كيعاود لشي ، وشي كيسول على سباب الوفاة ، وشي كيسول أشنوا غيطرا بخصوص الدار و الأملاك.
كلا كيلغي بلغاه والفضول و النميمة حتى فالعزو .
الله إهدي ماخلق و لكن حتى واحد مسول على ديك البنت الصغيرة لي خلاوها واليديها .
أصلا حتى حد ممسوق ليها واقلة گاع نساوها.
الدار عامرة والسرباية خدامين، إمرأة متوسطة الطول لابسة جلابة كلاص فالگرونة و لايحة فولار على راسها بإهمال نص شعرها باين مكياج خفيف فوجها .تگول ماشى گنازة طالعة فالدروج للطبقة الثانية غادة فإتجاه غرفة بابها كان فاللون الوردي ومكتوب عليه حسناء .حلات الباب وتمات داخلة لقاتها ناعسة على فراشها بجسمها الصغير على الفراش غاطسة فنومها بسباب الدواء لي عطاوها فالمشفى ، گالت مرأة العم.
نجية(بفحيح كالأفعى): كون غمشيتي معاهوم ، لاش بقيتي لاش، أووووف گاع مقادة على ولادي تزيديني نتي بهمك تفووو، مك رتاحت ونا وحلت تفوووو إخزيييت..
وهي تم خارجة راجعة عند العيالات ، سكون على سكون فالغرفة شوية بشوية حتى كيكسرو صوت شهقات ديك الطفلة الصغيرة لي مكورة فوق الفراش .
مسكينة كانت فايقة و سمعات كولشي ، بقات كتشقهق و عينيها ويديان المسكينة كتقطع فالقلب.
بكات حتى شبعات وناضت من بلاصتها وهي هازة صورة واليديها .
أنت تقرأ
هناك أمل
ChickLitقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...