🍂 هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸
بارت57
من بعد مالبسهوم ليها شاف فيها لقاها فرحانة بيهوم إبتاسم ليها وقال .
سليمان ( بإبتسامة): بالصحة.
حسناء ( حشمانة منو): شكرا ، علاش عذبتي راسك.
سليمان ( بدوك العينين السود كيشوف فديك الضحيكة): معذبت راسي بوالو تستاهلي، عجبوك.
حسناء (بدقات قلب عالية وفرحة عارمة متحكمة فيها غي بزز و صوت خافت): زوينين بزاف والله شكرا ليك بزاف .
سليمان ( بإبتسامة ودوك الغمازات): مزيان داكشي لي بغيت( ناض من حداها وگال ليها) يالاه نوضي دبا تغداي .
حسناء ( ناضت هي الأخرى بإبتسامة): واخا يالاه.
سليمان ( غاديين حتى وصلو للدخلة وقال ليها): نبغيك تهلاي فيهوم صافي .
حسناء ( بإبتسامة): حتى نتا تهلا فالقلم .
سليمان: أممم كوني هانية.
إبتاسمات ليه وتمو داخلين باش إتغداو، گاسين فالصالة كيتغداو ومجمعين مع بعضياتهم شحال كتكون گلستهوم حلوة وزوينة ولكن شكون خلاك، ضارت ليلى لجهة نزهة گالت ليها.
ليلى: نزهة واش نتي موجودة باش غي يوصل المغرب نمشيو.
نزهة: أنا مجودة المغرب هاني معاك( شافت فحسناء) نتي مباغاش تمشي ( حركات ليها حسناء راسها بلا) وعلاش أبنتي كاين لي ميبغيش إمشي للعرس النشاط والفرح وتبدلي حتى الجو.
ليلى( كتشوف فحسناء هي فاهماها وعارفة بلي باقي مكتزعم على بنادم بزاف لكونها منغالقة على راسها من الصغر ) : غي خليها أنزهة على راحتها بلى متبززي عليها.
نزهة: أنا بغيتها غي تنشط ونخليوك الالة على خاطرك.
سليمان ( مع ليلى): فين غاديين ، أنا مفخباري والو.
ليلى: المشرفة لي كتخدم معايا عندها عرس بنتها اليوم وعرضات علينا ( شافت فحسناء) ولكن لالة حسناء مبغاتش ههههه.
سليمان ( شاف فالحاج): حتى نتا الحاج غادي .
عبد الرحمن ( بإبتسامة): واشنو نخصرو لخاطر لمولات الدار مجاتش أولا أميلود.
ميلود: عندك الحق حنا غي مجرورين لي گالوها كنديروها.
نزهة( بطنز): مسكين مجرور ، مجرور على كرشك باغي الزرود أوكان أما حتى واحد ممبزز عليك.
ميلود( حاط إيدو على كرشو): بصحتي ألالة بصحتي.
حسناء غي كتشوف وكتضحك ولكن معرفاتش علاش حاسة بلي إقدر إكون أخر مرة تشوفهوم هاد الإحساس خربقها داشي علاش بقات غي ساكتة وكتسقي عويناتها بيهوم كاملين ، مرة عينيها على ليلى ونزهة لي مجمعين على العرس ، الحاج وميلود لي شادين موضوع السياسة والأخبار ، سليمان لي كيتغدى بالتباتة ومهدن معندوش مع الهضرة وسط الماكلة ، كتشوف فيهوم بحال إلى كترسم ملاميحهوم وبحال إلى كتودعهوم .
عند كاميليا لي صهرات حتى مبقاتش قادرة توقف بالسكرة ومشات مع ولد برادة لدارو ، كل ماهو محرم داروه مكاين غي الخطايا والذنوب ، فاقت فالصباح لقات راسها غيتقسم عليها بفعل السكرة والسهير والصداع ديال البار طبعا ، ضارت لجهة تانية لقاتو باقي ناعس عريانين بزوج ملابسين والو ، شافت فيه وتخايلات فيه سليمان وإبتاسمات بإستهزاء.
كاميليا ( بخفوت): تمنيت تكون نتا فهاد البلاصة تمنيتك نتا ندير معاك كولشي ولكن نتا مبغيتينيش أسليمان علاش علاش مبغيتينيش .
من بعد مفاق عشيقها كملو على لي بداوه البارح ودوشو بزوج ، هبطو حتى فطرو وهبطو للبحر كملو فيه البقية وتغداو تماك حتى للعشية عاد تفارقو وتوادعو مع بعضياتهم على طول هاد الخرجة حاسة بحال إلى تابعها شي حد ولا مراقبها .
رجعات للدار ملقات حد كان وقت المغرب، قصدات بيتها ودوشات من الجنابة مرة أخرى ، لبسات لبسة ديال السبور باللون الوردي وكرشها كاملة كتبان وقصدات بيت سليمان حاولات تحلو ولكن لقاتو مسدود تفقسات وعرفاتو دارها بلعاني ، يالاه بغات ترجع وهي إبان ليها بيت حسناء وقصداتو بخطوات خفاف وكضور لايكون سي حد شافها حاولات تحلو فإذا به تحل الهبيلة ديال حسناء مسداتوش بالسروت.
كاميليا( بإستهزاء): مكلخة وغتبقاي ديما مكلخة( دخلات للبيت بخطوات قصار وكضور هنا وهنا مرتاحت حتى سمعات صوت الماء فالدوش عاد بدات كتقلب بالزربة فالبيت) قالت لي ماما ضروري نلقا شي حاجة ضروري شي حاجة تنفعني .
بقات كتقلب كتقلب حتى عيات يالاه بغات تخرج وهي تبان ليها صاشية فوق الكوافوز قصداتها بخطوات سراع وحلاتها لقات فيها غلاف الأدوية ديال حسناء.
كاميليا (بتفكير) ديالمن هاد الدوا زعمة ديالها هي لي كتشرب. أممممم خصني نعرف ديالاش ( جبدات تيليفونها وصورات جميع الأدوية) صافي ساليت( شافت جهة الدوش) نهايتك قربات.
وتمت خارجة من الغرفة كأنها لم تكن بها .
#يتبع
أنت تقرأ
هناك أمل
ChickLitقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
