قصة بالدارجة المغربية، تحمل من كل فن طرب :
اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي.
قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
🍂 هناك أمل 🍂 🍸 مصادفتك هي الحلم لواقعي وحقيقة لنبض قلبي 🍸
بارت32
نهار داز وحسناء باقي غايبة عن الواقع، ليلى كتمشي طل عليها وكترجع، سليمان مرجعش باقي للدار ، أما الحاج و ميلود و نزهة مافجهدهوم غي الدعاء ليها بالشفاء، الجو مغير وداك الضحك والنشاط لي مولفين به مكاينش عقولهم غي مع حسناء.
وصلات 12 ديال ليل عاد داخل هو للدار لي كانت صاقلة باين كولشي ناعس، داخل وهو كيحك فعنقو عيان بسباب الخدمة لابس شوميز كحلة مطلع ليها إيديها وصدايف لولين محلولين مع سروال جينز فالأزرق ، طالع لبيتو وهو كيطرطق فعنقو ، حدو وصلو باب بيتها وقف بلاصتو و عينيه عليه و تساؤلات كثيرة كتراودو، ياترى فاقت ؟ كلات شي حاجة ؟؟ كيولات دبا؟؟ ....بزاف ديال الأسئلة لي كيراودوه عليها ، يالاه بغا إكمل طريقو لبيتو وهو إسمع صوتها ، زاد قرب جهة الباب وحط عليه أودنيه ، وهو إسمع شهقاتها.
هي لي كانت فوق الفراش نهار كامل وهي مغيبة بسباب الدوا كيرخيها وكيدير ليها النعاس، فاقت ولقات غي الضلام ، حاولات تفكر شنو طاري ، وشوية بشوية بدا داكشي كيرجع ليها ، تفكرات ملي كانت كتغوت ، ملي شداتها ليلى، ملي شدها سليمان، هنا وقف بها الزمن كيفاش هو دبا شافها فديك الحالة لا ميمكنش ، صافي غايگول لليلى تخرجها ولا تگول ليها تمشي فحالها ، أصلا دبا صافي كاملين غيبغيوها تمشي فحالها ، هادو كاملين أفكار إستحوذو على عقلها وهذا باين سبابو أشنو هو ، علامات الاضطرابات لي كتعاني منهم ، بداو تاني عويناتها كيدمعو وشدات فراسها حاسة براسها فاشلة ومعندها حتى دور فهاد الدنيا و حتى واحد مغايبغي وحدة مريضة فحياتو ، بدات كتبكي و شقاتها كيتعالاو فأرجاء الغرفة ، وملي بدات كتفكر شكون سبابها فهادشي ناضت بداك الجهد لي عندها لجهة الدوا خداتو بسرعة بحال شي مدمنة كلها كترعد وشرباتو بغات تحبس دوك الأفكار حيث كيقتلوها شوية بشوية وخافت لاتجيها كريز ثاني ، شربات دواها ورجعات لبلاصتها وهي مرخية بحال عجينة السفنج غي مليوحة فوق الفراش و عينيها على الباب و هي كتبكي وشهقاتها مسموعين شوية .
فديك لحضة حط هو وذنو على الباب وسمع صوت شهقاتها ، معرفش إمتى حتى حل عليها الباب وتم داخل عندها، خاف لاتجيها كريز ثاني ولا طرا ليها شي حاجة ومحسش براسو إمتى دخل ، لقاها فوق الفراش بنفس العباية و زيفها على راسها شوية من شعرها لي كيبان ، وجهها حمر و عينيها منفوخين بالبكا و مدمعين ، وحتى هي عينيها على الباب تگول كتسنى فيه إمتى إجي.
وتم خارج معرفاتوش فين مشا ، گالت مع راسها صافي غيرجع ويگول ليا سيري بحالك، عندو هو لي خرج من عندها وهبط ديريكت للكوزينة ، قصد الثلاجة ولقا سلطة الخضرة مع عصير هزهوم وقادهوم فبلاطو وقصد طنجرة لقا فيها اللحم بالبرقوق سخنو وقادو فالطبسيل ، مع قرعة الماء ، و ديسير شدو قطعو قطع صغار وخلطهوم مع دانيت وقادهوم ليها فطبسيل، قاد كولشي فالبلاطو وثم طالع لعندها، هي لي كانت خاشية راسها فالمخدة وعاطياها للبكاء، حتى تم داخل خرجات راسها وشافت فيه ، صراحة تصدمات مضناتوش غيدير هكا صدمها و بقات غي مبرقة فيه عويناتها مسكينة وحتى داك البكا تحبس ههه ، هو لي كان عاقد غباشتو ملي لقاها كتبكي ولكن ملي شافها مصدومة فيه جابت ليه الضحك .
سليمان: يالاه نوضي تعشاي ، سيري غسلي واجي .
تحنى كيستف على الطبلة وكيقاد ، كيتسناها تنوض ولكن هي باقة مسمرة فبلاصتها، دار لعندها طلع حاجب وهبط لاخر.
سليمان: واش مبغاش تعشاي ولا أشنو ( شافها باقي حالة فمها) هييييييه واش نتي معانا ولا مع غانا معاك داوي.
حسناء بحال إلى طرشتيها يالاه فاقت على راسها بلي سهات فيه ، حشمات ومرگات ملقات مادير من غير تهبط راسها ، وتمات نايضة من بلاصتها بشوية حيث صحتها كلها مدگدگة ومرخية بسباب الدوا ، قصدات الحمام بخطوات صغار وتقال وهو عارف شكون سبابها ، خلاها حتى رجعات وهي مقادة زيفها وغاسلة وجهها ويديها، دار ليها بلاصة فين تگلس وهو جاب كرسي گلس قدامها .
#يتبع
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
