🍂 هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸
بارت82
♠فلاش باك ♠
قبل سنتين
كان سليمان يالاه داخل من الخدمة لي تعطل فيها بسباب كثرة الاشغال ، قصد بيتو ديريكت ودخل للدوش دوش ونقا حالتو ، دار فوطة على نصو وهز وحدة كيمسح بيها راسو.
خرج من الدوش قاصد دريسينغ إلبس حوايجو ، وهو إتصدم ملي لقا كاميليا بنت عمو ناعسة فوق فراشو وهي عريانة مغطيها غي ليزار والفراش كولو مخربق.
بقا مشوكي فبلاصتو عاد قصدها بعصبية وضربها بديك الفوطة لي بين إيديه وهو كيغلي بالأعصاب ،شوفة هي اللخرة مكايشوفها فيها بل هو مشمأز منها.
سليمان (بعصبية و هو كيغوت): نوضي تحركي خرجي عليا ، أش جاي طواصلك لبيتي، نوضي خرجي عليا .
كاميليا ( دارت راسها صمكة): حبيبي دوشتي ندخل نودش أنا نوبتي.
سليمان ( متعجب منها): أشنو كتگولي نتي ( بصراخ) نوضي خرجي عليا من بيتي.
كاميليا ( وقفات وهي كتجمع فليزار ليمغطيها): ويلي حبيبي نسيتي كولشي ولا مالك، نسيتي لي طرا بيناتنا.
سليمان ( بنفاذ صبر و صوتو بح بالغوات): غاتخرجي عليا من بيتي ، ولا غانقبر والديك هنا ، دوزي جمعي وسخك والباب مانبقاش نشوف وجهك هنا.
كاميليا ( بدات كدمع): حرام عليك أسليمان قضيتي فيا غراضك وبغيتي تلوحني ( كتبكي) علاش علاش درتي هادشي حرام عليك ، غايجي عمي غانگولها ليه .
سليمان ( تقرب لعندها وبعصبية شد فيدها): أشنو غاتگولي ليه ؟
كاميليا ( بتحدي): تعديتي عليا و نكرتيني.
سليمان: متأكدة غايتيقك.
كاميليا: متأكدة حيت جميع الأدلة ضدك ، واقرب دليل هو إلى سمعو غواتنا وجاو دبا، غايشوفو كولشي بعينيهوم.
وفديك اللحضة تحل الباب ودخلو عليهوم كل من ليلى و ميلود ونزهة لي كانو مصدومين من هادشي لي كايشوفو .
كاميليا لي كانت عريانة أيزار خفيف لي ساترها وسليمان لي كانت ساتراه ديك الفوطة.
أي واحد شاف هاد المنضر غايفهم غلاط مني أنا وجبد حيت باين الأمر كيف داير.
ولكن حتى واحد مغايضن بلي هذا مجرد فخ بغات كاميليا طيح فيه سليمان.
ليلى( قربات لعندهوم وهي كضرب فوجها): أويلي أويلي ، استغفر الله العظيم أش هاد الشوهة أش هادشي( شافت فسليمان) أشنو طاري أشنو واقع دوي أسليمان فهمني.
كاميليا ( نقزات قبل مايدوي سليمان وبدات كتبوحط وكتبكي تگول حقيقة هادي): خالتي شوفي ولدك أشنو دار ليا ، تعدا عليا وتكرفص عليا ، وفالاخر نكري وبغا إضربني.
نزهة( من لور): ماتيقيهاش أختي ليلى ، كلامها غي كذوب خويا سليمان مايديرهاش.
ميلود( لي قالب عليها وجهو):عندها الحق أختي ماتيقيش فهضرتها ،سليمان ولدي كنعرفوه أش كايسوى.
كاميليا ( بعصبية ودموع التماسيح): هي هادشي كامل غي كذوب( بينات ليهوم عنقها لي كولو علامات وباينين ديالمن وصدرها حتى هوا تگولي داز عليها وحش ماشي بنادم) وهادشي شكون دارو ليا شكون سبابو ولا حيت عمي مكاينش وضلمتوني حتى نتوما بحالو.
نزهة( بتحدي): واخا نلقاو مغطك قدامي مانتيق فهضرتك ونتيق فيه هو حيت عارفاه أش كايسوى( حركات ليلى لي واقفة مصدومة) ختي ماتيقيش هضرتها هادشي كولو كذوب ومكاينش لي كيعرف سليمان قدك نتي ماشي ديالو هادشي أختي.
ليلى( هزات عينيها فسليمان وقالت ): عندك الحق أختي ولدي وأنا عارفاه مايديرهاش ( شافت فكاميليا) علاش درتي هكا أشنو بغيتي منو؟
كاميليا ( واخا صدموها حيت ماوصلاتش لداكشي لي باغية ولكن حلفات فيه): حشومة عليك ، كادافعي عليه حيت ولدك وأنا غي بنت لوسك، عمي لي غايجي من جيهتي مكاينش ولكن إلى رجع غانعاود ليه كولشي( ببكاء) ولدك تعدى عليا وتكرفص عليا وحقي غاناخدو بزز منكوم.
سليمان ( لي كان ساكت كيتفرج فهاد المسرحية): صافي ساليتي؟
كاميليا ( بغرابة): كيفاش؟
سليمان ( بهدوء ماقبل العاصفة): صافي ساليتي هاد المسرحية؟( شاف فيهوم كاملين) تسناوني هنا هاني جاي .
ومشا قصد دريسينغ بدل حوايجو بلباس منزلي عادي ، خرج من دريسنغ وهما باقي فبلايصهوم كيتسناو إشوفو أش غايدير، قصد الكوافوز وجبد منو بيسي ديالو ، خدمو وجبد فيه داكشي لي باغي وقصدهوم ، عطا لليلى البيسي وبدا كيدوز ليها الفيديوات ديال الكاميرات لي دار .
الكاميرا لولة بينات ليهوم كاميليا ملي طلات من بيتها بقات عاسة عليه حتى دخل لبيتو عاد خرجات وهي لابسة سوميج دونوي فالاسود مشبكة كولها عريانة بقات واقفة فباب البيت حتى سمعاتو دخل للدوش، وهي تحل لباب غي بشوية غي تحل ليها وهي تنقز بالفرحة ودخلات وسدات الباب من وراها.
الكاميرا الثانية كانت فالبيت بان فيها سليمان ملي دخل عيان وقصد دوش ديريكت عاد تبعاتو هي مشات حتى سمعات صوت الرشاشة فالدوش عاد رجعات لجهة الفراش، حيدات حوايجها كاملين وخربقات الفراش ودخلات نعسات حتى خرج هو وتصدم ملي لقاها.
الحوار لي دار بيناتهوم كاملين سمعوه ، وبهذا بانت حقيقتها وكذوبها وفسادها وقلة تربيتها وإنعدام عفتها.
#يتبع
أنت تقرأ
هناك أمل
ChickLitقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
