هناك أمل

بارت79

🍂 هناك أمل 🍂
     🍸 مصادفتك هي الحلم لواقعي وحقيقة لنبض قلبي 🍸

بارت79

بدات ليلى كتقرب بطريقة بطيئة لجهتها وهي كتبكي وكتحرك راسها يمين شمال.
حسناء حتى هي بدات كتقرب منها وهي حشمانة وخايفة من ردة فعلها وفنفس الوقت كان موحشتها، محساتش براسها إمتى جبداتها ليلى لعندها وعنقاتها وهي كتگول كلمة وحدة .

ليلى( كتشهق وكتبكي ممتحكماش فراسها ومعنقاها بكل قوتها ): بنتي الحبيبة ديالي بنتي رجعتي رجعتي ليا أحبيبتي ( شداتها من وجهها) شحال توحشتك وشحال تخلعت عليك أبنتي فين مشيتي وخليتيني أمممم أبنتي دوي معايا ( رجعات عنقاتها ) أحسناء وشحال خليتي بلاصتك خاوية وشحال خوات علينا الدار .

حسناء ( الدموع والشهقة لي كتشدها ماخلاوهاش تدوي ): س سمحي ليا أخالتو عفاك س سمحي ليا ( هادشي لي قدرات أنها تخرجو.)

ليلى(معنقاها مبغاتش طلقها): نتي لي سمحي ليا ابنتي ، مارضيتش ليك البال ،معرفتش فين كان عقلي ، سمحي ليا أبنتي .

الحاج عبد الرحمن هابط فالدروج وشوفتو لحسناء صدماتو وفرحاتو تقرب لعندهوم وبدا كيدوز يدو على ضهرها بطريقة حنينة وهي معنقة ليلى.

الحاج( بفرحة وحنية): مرحبا ببنتي رجعات لينا مرحبا بيك أبنتي فدارك، طالت الغيبة وخليتي بلاصتك فالدار ( هزات فيه حسناء راسها وعنقها هو بدورو) الله إرضي عليك أبنتي ، نهار كبير هذا ملي رجعتي لينا أبنتي.

حسناء ( كتشهق وهي معنقاه حسات بالأمان عاود رجع لحياتها بشوفتهوم) : سمحو ليا ابا الحاج سمحو ليا.

الحاج( كيهدن فيها): بركة عليك أبنتي من البكاء بركة الله إرضي عليك ، نتي لي سمحي لينا كيفما قالت ليلى حنا لي فرطنا الله إرضي عليك.

ليلى( شافت فسليمان ومشات عنقاتو): نتا أولدي لي جبتيها( حرك ليها راسو بالإيجاب وزادت تشبتات فيه) الله إرضي عليك اولدي معمرني طلبت منك شي حاجة ورضيتيها فوجهي ، الله إرضي عليك .

سليمان ( معنقها وكيهدن فيها): صافي بركة عليك الحنينة من البكاء يا بغيتي بنتك هاهي حداك ، صافي بركة.

نزهة جايا داخلة من الجردة حتى لقاتهوم مجموعين فوسط الدار إستغربات مالهوم وعلاياش مجموعين حتى لقات الحاج معنق حسناء وهي تگولها بكل جهدها.

نزهة: حسناء بنتي ( مشات عندها بالزربة) رجعتي أبنتي رجعتي.

حسناء ( لي عنقاتها وهي كتبكي ولا بغات تسكت): مي نزهة توحشتك بزاف .

نزهة( كدمع حتى هي): بنتي الحنينة وفين غبتي علينا يالعزيزة يالغالية توحشتك ، توحشتك بزاف وخليتي بلاصتك فالدار أبنتي وأنا لي ربيت عليك الكبدة يالحنينة.

من بعد دقائق طويلة من الترحيب والبكاء والفرح على عودة حسناء للدار هاهما كاملين مجموعين على الغداء فصالة مونجي .
كيتغداو وهما فرحانين وناشطين حيت رجعات الفرحة والضحكة والبسمة مع حسناء اليتيمة.
سليمان مراقبها وعاجباه ديك البسمة والفرحة لي فعينيها وديك الحشمة لي شاداها حسناء هي حسناء الحشمة مكاتفارقش عليها .
عاجباه وباغيها كيفما هي بنت بسيطة عادية هايم فيها يا ناس.

            #يتبع

الحاج عبد الرحمن