🍂هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸
بارت21
تمات حسناء هابطة للتحت بعد مابدلات حوايجها و صلات صلاتها ، وهي لابسة بيجامة كيطمة وسروالها مع بينوارها هابط للأسفل ، بيجامة عادية ساتراها فاللون الأزرق مع فولار أبيض ، جات معاها البيجامة زوينة خصوصا وتات لون بشرتها البيضاء ، تقدمات للصالة فاش كانو مجموعين حاطين الغداء لي كان عبارة على دجاج محمر مع فريت و سلطات فالأنواع ، گالسين كيتسناو فالبقية إيجيو .
كانو (ليلى،الحاج،ميلود،نزهة) گالسين عاطيينها للضحك والتقشاب ، حتى بانت ليهوم داخلة مع الصالة حشمانة ، تبسمو ليها كاملين .
ليلى(بإبتسامة): أجي أبنتي حدايا هنا ( قدات ليها كورسي حداها) أجي متحشميش أشنو گلت قبيلة.
تقدمات عندها حسناء وهي مي،تة بالحشمة صراحة مزال مزعمات بزاف، گلسات فداك الكرسي وبان ليها واحد أخر حداها معرفاتش ديالمن ولا غي بقا تماك ، معطاتوش باقي أهمية فور ماسولها الحاج عبد الرحمن.
الحاج عبد الرحمن (بإبتسامة): بنتي حسناء مگلتيش لينا كيفاش جا بيتك ياك عجبك بعدا أمممم ، إلى معجباتكش فيه شي حاجة گوليها ليا نبدلها صافي.
حسناء (بإبتسامة مخلطة مع الحشمة و الفرحة): ربي إحفضك وشكرا ليكوم والله .(تلفات الزغبية ههه).
الحاج (بضحكة): ههههههه بقاي تگولي ليا با الحاج صافي(حركات حسناء راسها بالإيجاب) مزيان دبا تفاهمنا إلى گولي ليا كيجاك البيت.
حسناء: زوين تبارك الله ، شكرا ليكوم .
الحاج: متشكريناش أبنتي حنا دبا عائلة، الله إرضي عليك.
ليلى: عندو الحق ابنتي مكاين لاش ديك شكرا ، داركوم هادي.
ميلود ( بمزاح وهو كيشوف فالدجاج): واش أعيباد الله مزال مغانتغداو.
ليلى والحاج ضربوها بضحكة على طريقة باش گالها ، ونزهة جاوباتو بعصبية مصطنعة
نزهة: واش نتا أهاد الراجل ديما مشوه بينا ، تگول عمرك كليتي، وكون غي إبان فيك ،( قلبات عينيها ) داير كي الستيلو .
ميلود ( بطنز): ستيلو وبيخير على الأقل رجلي هازيني ، ماشي بحالك نتي متقلاك الشحمة ( شاف فحسناء وكمل) نعنداك أبنتي ندير معاها سباق الله لا طفراتو فيه ، مقادة على منفوخة على الخوا .
ميلود و نزهة مقشبين والبقية شبعو ضحك ، حتى سمعو خطوات جايين من جهة الدروج.
ميلود( رفعو صوتو باش إسمعو): و أخييييييرا ولدك المصووووون أبنت خالتي شرفنا ، ماجا حتى برد الدجاج وشرفت أنا ههههههههه.
ليلى( غتموت بالضحك): ههههههه واهانتا كتشوف على زريعتي شرفنا وحنا كنتسناو ههههههههه.
الحاج(بإبتسامة): أهيا أهاد الشيطان كملتي من مرتك و دزتي لولدي ههههههههههه (شاف جهة الباب لقاه واقف كيشوف فيهوم) ســلــيــمـــان ولدي دخل مالك واقف تما ، هادو راك عارفهوم متديهاش فيهوم.
واحد حسناء ملي سمعات ميلود دوا عاد تفكرات الكرسي لي حداها ديالمن ، حشمات وتخلعات ، معرفاتش كيفاش تفسر احساسها فديك اللحضة ، جميع الأحاسيس تجمعوا عليها ولي زاد الطين بلة هو ملي وقف فباب الصالة و وصلاتها ريحتو ، كانت بحال ريحة الخشب هادية ورايقة كدخل مع العضام، بلى ماتحس سدات عينيها وهي كتشمها بحال شي وحدة مضروگية. مفيقها من سهوتها وقفزها غي صوتو الجوهري الغليض المبحوح وهو كيدوي بهداوة ورقي فكلاموا.
سليمان: السلام عليكم ( باس راس واليديه وسلم مع ميلود أما نزهة هز ليها غي إيدو، ضار لجهة حسناء وشاف فليلى هي لي فهماتو ودوات).
ليلى( بإبتسامة ): بنتي حسناء كنقدم ليك ولدي سليمان ، ولدي كنقدم ليك حسناء لي دويت ليك عليها.
سليمان( واقف فبلاصتو وشاف فحسناء لي مهبطة راسها باين للعمى بلي حشمانة): متشرفين .( وگلس بلاسطو لي جات حداها طبعا ).
حسناء كتافات غي بتحريك راسها دليل على الإيجاب ، وحتى هو تفهمها ، ولكن لي ماخلاهومش فراحتهوم هو ميلود لي نقز ثاني وهو كيقول.
ميلود: ومالكوم نتوما مزرقينها علينا واش تقاداو ليكوم الألوان .
حسناء هزات فيه راسها حيث عارفة هي لي لابسة الزرق ولكن معرفاتش بلي سي سليمان بحالها ، هو لي كان لابس سروال فصالة أنيق فالأسود وقميجة فالأزرق مزيرة على جسمو الرياضي ولي زاد الأمر جادبية زوج صدايف القداميين خلاهوم محلولين ، شافت فميلود ولقاتو كايشوف فيهوم وماشي غي هو بل كاملين ومن الفوق حابسين الضحكة بزز، ضارت لعندو بحركة لا إيرادية وهنا فاش تلاقاو عيونهوم ، عيونو السوداء مع عيونها البنية .
#يتبع
أنت تقرأ
هناك أمل
ChickLitقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
