قصة بالدارجة المغربية، تحمل من كل فن طرب :
اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي.
قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
حسناء ( بإبتسامة جابة لجهتها بمشية أميرات ديزني وهي شادة فطرف من كسوتها ودارت ليها تحية من العهد الفيكتوري): شكرا لكي يا بسومة على هاذا الترحيب الأكثر من رائع .
بسمة: واجب أختشي يالاه زيدي قدامي ، دوزي تركبي.
حسناء: ولكن غي بشوية عليا راه عمرني ركبت فوق الموطور.
بسمة: كوني هانية أنا معاك غازيدي.
من بعد ماعاوناتها بسمة وفهماتها الطريقة ركبو فوق الموطور وشدو طريق البحر ، وصلو وهبطو لعند الماء بقاو كيلعبو تماك حتى عياو وطلعو للفوق قصدو قهوة نقية وگلسو فيها كل وحدة شدات عصير على ذوقها ، وعطاوها للضحك والنشاط .
حسناء ( بتفكر): عرفتي أبسمة نسيت ماقلت ليك واحد الحاجة.
بسمة: أدهيشيني أشنو هي هاد الحاجة.
حسناء: دبا أنا فاش كنت خارجة عندك ، وقفاتني خالتو ليلى وعطاتني الفلوس گالت ليا إلى عجباتك شي حاجة وبغيتي تشريها .
بسمة: وراه عادي السيدة فكرات فيك باس تعرفي معزتك عندها ،انا بان ليا عادي ، حتى أنا خويا وقفني وعطاني الفلوس واخا عارفني خدامة ولكن كيفكر ليا فين عندك المشكل فهادشي.
حسناء ( بخجل): وراه ماشي هي لي خلاتهوم ليا أحم ( دارت فيها بسمة واحد شوفة ) أحم راه سليمان لي خلاهوم ليا فهمتي.
بسمة: أراي أراي أوكان نشوف ( جبدات الساك لعندها وحسباتهم فداخلو باش ميشوفهوم حد ملي كملات دارت واحد شوفة فحسناء جابت ليها الضحك): ناااااري على الزغبي أشنو درتي ليه الشيطانة( شافت فيها حسناء بإستفهام) واش عارفة شحال هنا ولا لا ، تبارك الله واش غي خرجو لجهة البحر إعطيك عليها هادشي كامل ومزال مكاينة حتى حاجة بيناتكم والله الى ڤراڤو ليه أطربني فهادي ياختي.
حسناء: واخلاص گولي ليا شحال أصاحبتي أوف.
بسمة: إوا يالالة كاين هنا 1500 درهم شهرية ديالي حطها ليك هنا تبارك الله عليه أخلاص، هي صافي غنديرو شوبينغ اليوم أممممم..
حسناء: ناري ياختي هادشي كثير بزاف والله غادي نرجعهوم ليه .
بسمة: من نيتك ترجيعهوم ليه واش نتي تصطيتي ولا أشنو، واش السيد فكر فيك وهاز ليك الهم ومصيفت ليك باس تخرجي تفوجي بحال جميع الناس وديري ليه هكا راه هكا ماحل ماتاوزة .
بسمة: وعلاه هو گال بلي نتي إستغلالية هو فكر فيك وهاز ليك الهم وبغاك تفرحي أما راه گاع مايتسوق ليك خرجي ولا گلسي ، شري ولا لهلا تشري مغايديهاش فيك ولكن هو العكس كيفكر فيك الزمر ، عرفتي أشنو ديري عندي ليك الحل.
حسناء: أشنو هو أتيني به عفاك .
بسمة: سيري دبا شري لي عجباتك وحباتها خاطرك ومن بعد شري ليه شي حاجة رمزية على ذوقك وملي ترجعي للدار سيري عندو شكريه وقدميها ليه صافي.
حسناء( بتفكير): زعمة ديرها ولكن أنا كنحشم قدامو أصاحبتي والله غنتلف .
بسمة: مغاتلفي ماوالو بالعكس تصرفي على طبيعتك وديريها ، والله حتى إعجبو الحال تيقي فيا وديري بهضرتي.
حسناء: صافي واخا غانديرها فيد الله ، تايقة فيك.
من بعد مشاو دارو شوبينغ ديالهم وحسناء شرات أي حاجة عجباتها وهي فرحانة وكتدعي لسليمان فالسر بالخير والتيسير وماقداها فرحة على هاد التصرف لي صدر منو وأكيد منساتش بسمة شرات ليها لبسة كاملة مكمولة واخا إمتانعات ليها بسمة ومابغاتش وبزز باش قبلاتها ، خرجو وهما معانقين وفرحانين ، دازو جنب واحد البوتيك خاص بالرجال فجرات بسمة حسناء ليه ، ودخلو كيتساو فيه حتى طاحت عينيها على واحد القلم مزوق بطريقة زوينة وفيه كتابة بالخط العربي الأصيل كان القلم فالأسود والكتابة فالذهبي عجبها ومعرفاتش علاش ملي شافتو تفكرات سليمان داكشي علاش قررات تاخذو ليه ، قادوه ليها وخداتو من بعد ماخلصاتو وتمو خارجين فرحانات .
وصلو قدام الدار هبطات حسناء وشدات عندها صيكانها.
حسناء: زيدي دخلي تعرفي عليهوم.
بسمة: غي خليه مرة أخرى إن شاءالله دبا خصني نمشي تعطلت وخويا غايخاصم أما واحد أشرف إيكون كيصوني وانا دايرة صيلونص لتيلي ،مرة أخرى ونتعرف عليهوم أزين .
حسناء: يالاه بسلامة عليك وسمحي ليا الزين .
بسمة: مابيناتناش أصاحبتي يالاه بيزو.
توادعو مع بعضياتهم وبسمة مشات لدارها وحسناء تمات داخلة للدار وهي فرحانة بهاد الخرجة ومفاجئات هاد النهار.
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
