هناك أمل

بارت99

🍂 هناك أمل 🍂
    🍸 مصادفتك هي الحلم لواقعي وحقيقة لنبض قلبي 🍸

بارت99

داز أسبوع على سفر سليمان ، هاد الأسبوع دوزاتو حسناء غي فالدار مكاتخرج مكادرج، بسمة لي كاتجي عندها مرة مرة ، عائلة ليلى مشاو فاليوم التالي وكل واحد رجع لحياتو العادية.
جميع لي فالدار عند بالهوم سليمان شداتو الخدمة فتركيا فقط ولكن بوحدها لي عارفة شنو واقع وسليمان فين مخشي ، كل نهار كتمنى إصوني عليها ويگول تفك المشكل هاني راجع ولكن والو ، المشكل مزال متفك المجرم مزال ماتشد وسليمان وحل فيها .
گالسة فالبالكو ديال بيتها بليباسها البيتي ، وهي كتدوي معاه بحال كل نهار.

حسناء ( بحزن): ودبا مزال مالوقاوه مزال مغاتجيش.

سليمان (بضيق نفس): مزال مالقاوه(خرج نفس وكمل) والباقي كيحققو معاهوم باقي لونكيط خدامة .

حسناء (بخوف): وإمتى غاتجي دبا (بخفوت) سمح ليا ديما مصدعاك بهاد السؤال ولكن أنا خايفة والله.

سليمان ( بحنان): معندك مناش تخافي المشكل غادي إتحل وغانرجع صافي متهزيش الهم الله إرضي عليك ردي البال لراسك هو لي كايهمني صافي دبا نخليك جمال كيعيط عليا.

حسناء: إكون خير إن شاءالله تهلا فراسك .

من بعد ماقطع عليها كمل طريقو وهو خارج من مغفر الشرطة بمدينة أنقرة التركية ، كان لابس لباس شتوي مع كاشكول وطاقية سخونة بسباب البرد والثلج لي طاح، غادي جهة السيارة لي كان جمال كيتسناه فيها حتى هو بلباس شتوي .
سليمان لي كانو ملاميحو باهتين باين فيه العياء وقلة النوم ، وصل وركب حدا جمال لي كان ناعس مفاق حتى سمعو كيعطس.

جمال( بصوت ناعس): على سلامتك يالاه طلقوك أصاحبي 3 سوايع وأنا كنتسنى هنا.

سليمان ( بضيق نفس): أش غانگول أنا لي دوزتها فالتحقيق وفأسئلة مستفزة ، أش غانگول أنا لي خدمتي غادي ضيع من بين إيدي أسنو بغيتيني نگول.

جمال : صافي أصاحبي تهدن ، ماشي وقت العصبية دبا .

سليمان ( بعياء): عييت أصاحبي من هادشي إمتى غادي إتحل هاد المشكل ديال الزفت ولكن كولشي منو هو لي جاب ليا وحدة هاربة مخدمها بلى وراق وغادي إخرج عليا .

جمال: دبا ياك هو إعتارف بلي خدمها بلى مايعلمك ياك والكاميرات فيهوم كولشي وحتى هادوك لي مخبي على الخدامة بانت فيها الحقيقة وبان لي قتل نتا مالك دبا بقا معاهوم حتى إتشد وترجع لبلادك أصاحبي .

سليمان ( بفقسة): گالو ليك خصك تعاون معانا نسدوه وكل نهار خصك تجي عندنا تقدم الأقوال وتوقع عليهوم واش أنا مسالي( شاف فجمال) أشنو درتي مع هادوك .

جمال: راه خدامين كيقلبو كون هاني غادي إلقاوه داك البوليسي حافض هاد الغابات كاملين مايفلتوش.

سليمان: كنتمنى كنتمنى.

جمال: واليديك عارفين لي واقع ولا لا.

سليمان ( بنفي): لا مبغيتش نصدعهوم حسناء بوحدها لي عارفة.

جمال( بتفكير): أجي گول ليا ديك الموصيبة فين مشات باقي ماعندك عليها حتى خبار.

سليمان: أصاحبي أش بغيتها أنا بحرى ماتهنيت منها.

جمال: أنا غاگلت بحال هاديك مايعياوش عنداك تلقى الفرصة انك مكاينش ودير شي حاجة.

سليمان: زعمة ، شنو فجهدها دير .

جمال: صوني على مراتك گول ليها ترد البال وصافي مغاتخسر والو.

سليمان ( جبد تيليفونو): داكشي لي غاندير( يالاه بغا إصوني هو إدق عليه واحد البوليسي زاج السيارة خبرو بلي خصو إرجع عندهوم) أوف أوف على حالة حتى نرجع ونصوني عليها.

            #يتبع