🍂 هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸
بارت35
مع دخلات لدريسينغ لقات ليلى كتسناها بكسيوة حجابية فالأزرق مخططة بالأبيض مع فولارها وسبادري فالأبيض، تقربات لعندها وقالت ليها ليلى.
ليلى( بإبتسامة): بنتي حسناء هاكي شوفي هادي ، واش عجباتك.
حسناء ( شداتها من عندها ): زوينة أخالتو ( شافت فيه) ديالمن ؟.
ليلى( بطنز) شريتها للحاج نعطيها ليه كادو ( شفت فيها حسناء بصدمة وكملات ليلى) منيتك كتسولي أهاد البنت واش تسوطيتي ولا أشنو ، راني جبتها ليك نتي أويلي على ديالمن .
حسناء ( شداتها الضحكة): هههه وا أخالتو غي سولت ، متعرفي ، علاه أنا دخلت لعقلك باش نعرف لمن( غي شافت ليلى كشرات ملامحها وهي ضحك وعنقاتها) ههههههه مال خالتو ديالي شكون قلقها أمممممم.
ليلى( بقلق مصطنع): أممممم خالتو ديالك ، يالاه بعدي لهيه ( زادت حسناء عنقاتها مخلاتهاش تحرك ) وصافي أهاد البنت طلقي.
حسناء ( ضاحكة): ولاااااااا ومطااااااااالقاااااااش ههههههههههه حتى تحيدي تغوبيشة.
ليلى( شدات فيها الضحكة): ههههه وصافي أهاد البنت راه كيتسناونا للفطور ، صااافي ههههههه.
حسناء ( بإبتسامة باستها فحنكها): إوا هكاك أخالتو ديالي ههههههه.
ليلى: أحياااااااني عليك أشنيولة ( ضحكات حسناء وهي شادة الكسوة) يالاه گولي ليا كي جات دوزي لبسيها غانتسناك على برا.
خرجات ليلى وخلاتها تلبسها، بعد دقائق خرجات حسناء وهي لابسة اللبسة لي جاتها كتهبل واتاها الأزرق والفولار مقاداه بطريقة عصرية ، جات فنة خلات ليلى كتمضر فيها .
ليلى(بسعادة): تبارك الله عليك أبنتي ماشاء الله ، كتهبلي وكتصطي ، جيتي فنة كيجي معاك هاد اللون أشنيولة .
حسناء (بإبتسامة و هي كتشوف راسها فالمراية): بصح أخالتو جات معايا .
ليلى: راك نتي لي جيتي معاها ، تبارك الله عليك ، راه أنا ملي شفتها فالبوتيك گلت هادي ديال بنتي حسناء وفعلا جات كتهبل ماشاء الله أخلاص .
دارت حسناء لعندها وهي فرحانة علاه شكون فينا لي مغايفرحش إلى شاف الإهتمام ، صراحة عجباتها الكسيوة وجات معاها الهبيلة فرحانة بها وبقات كضور بها فالبيت وليلى كضحك على هبالها ، حمدات الله حيث منكفساتش حالتها أكثر، قربات لعندها حسناء وشداتها من حناكها باستها فيهوم.
حسناء (فرحانة وهي كتبوس): ربي إحفضك ليا أخالتو الزوينة و البگوصة ديالنا ، نتي راكي الفن راكي التيتيز أتوتة التفاحة موااااح عليك.
ليلى(قتلاتها بالضحك): هههههههههه هايهاي على الزوفري منين جبتي هاد الهضرة أممممم دوي
حسناء: البنات لي علموني أتوتة مواااااح يالاه هههههههه.
شبعو ضحك مع بعضياتهم وليلى بانت ليها حسناء فرحانة ليوم كثر من اللازم معرفاتش سباب ديك الفرحة ومبغاتش تعرف الأهم أن حسناء فرحانة وناشطة بركة عليها ، جبداتها لفوق الفراش گلسلت حداها.
ليلى: بنتي سمحي ليا على داك النهار أنا نسيت ويصحابني حسيتي بيا ملي دخلت سمحي ليا أبنيتي صافي.
حسناء (باست ليها إيديها): لا أخالتو نتي لي غاتسمحي ليا ، حيث خلعتكوم عليا نتي معليك والو، و أصلا داكشي كتبو الله ، الحمد لله على كل حال ، (سكتات شوية وكملات) خالتو داكشي لي تافقنا عليه أشنو درنا فيه باقي.؟
ليلى ( بتساؤل): علاش تافقنا أبنتي معقلتش؟؟
حسناء: الشرط أخالتو نسيتيه.
ليلى: أمممممم الشرط واش جابو الهضرة دبا.
حسناء: أحم مگلتيش ليا على حساب الكراء.
ناضت ليلى من بلاصتها وعطاتها بالضهر غادية خارجة حتى حبساتها حسناء بهضرتها.
حسناء ( وقفات من بلاسطها): خالتو فين غادة ؟ مجاوبتنيش؟
#يتبع
أنت تقرأ
هناك أمل
Chick-Litقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
