🍂 هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸
بارت90
وصل اليوم الموعود ، الدار عامرة بالضياف الحباب والصحاب جاو باش إحضرو لخطوبة سليمان صلاح الدين .
مع الدخلة ديال الدار كتلقى الدنيا كولها مقادة ، والجردة كانت بحال قاعة حفلات بدوك الاكسيسوارات الفانوسات والورد لي مقاد بطريقة متيولة ولم لا وأكبر مصمم ديكور لي واقف على شغلو بيدو .
الحضور لقاو راحتهوم فالخطوبة كاين لعاطيها للشطيح مع الديدجي وكاين لي شاد الحتيت ، شي خارج شي داخل ،الجردة والدار عامرين.
كولشي لابس لباس طاغي عليه اللون الازرق حيت هو اللون الرئيسي للحفل حتى من الديكور والأثاث كان فالأزرق نتوما عارفين و أنا عارفة علاش .
الحاج عبد الرحمن بجلابتو الهماوية فاللون الأزرق وحداه ميلود حتى هو جلابة زرقة ، واقفين كيرحبو بالناس والإبتسامة مالية ملامحهوم، فرحانين مقاداهوم فرحة.
نزهة لي لابسة قفطان فالأزرق ملكي خارجة من الكوزينة وهي كتوصي السرباية واقفة على الشغل ومعاونة مع ليلى.
نزهة( كتوصي سرباي): شوف أولدي الله إرضي عليك اتاي والحلوة والعصير متحبسوهومش على الناس مفهوم عطا الله الخير بلى تقشف ، وراه مولات الدار لي گالت ليكوم هاد الهضرة تهلاو الله إرضي عليك، أه وهدوك الكراسى إتحيدو من تم ، وحتى الدراري الصغار عطيوهوم الخاطر .
السرباي( بموافقة): كوني هانية ألالة.
نزهة( دارت لجهة الباب بانت ليها أخت ليلى الصغيرة وهي ترسم إبتسامة على وجهها): هايهااااااي وشكون زارنا اليوم ، نهار كبير هذا ملي لالة سهام زارتنا.
سهام( بفرحة قاصدها): وانزيهو وشحال توحشتك أوضنغكمين أتاسة (توحشت أكبيدة) .
نزهة( عنقاتها بفرحة كتسلم وتعاود): حتى أنا ازين توحشتك فين هاد الغبور أهياتا مابقيتي تسولي .
سهام( ضاحكة):غي الدونيت والدار ياختي ( كدور عينيها) هايهاي على الدنيا كي مقادة تبارك الله عليكوم ياختي محگلني گلتو ليا ضروري الزرق .
نزهة( بإبتسامة): إوا الالة الفكرة ديال مولاي السلطان هادي ( غمزاتها) حتى لمنبعد ونعاود ليك بلان الزرق.
سهام: إوا فين هي العروسة نشوفوها ( بضحكة) نشوفو شكون هاد الفنة لي طيحات لينا سي سليمان ، وختي فين هي مبانتش ليا.
نزهة( جراتها من يدها فناحية الدروج): زيدي معايا راه كاينين الفوق كايقادو لالة حسناء.
سهام( غادية معاها): هايهاي على لالة حسناء هي البنت لي جابت ختي ياك .
نزهة: أه يالالة واحد الفنة أنا متأكدة غتعجبك وجات موالمة مع سليمان.
وصلو قدام بيت حسناء حلو الباب ودخلو ، لقاو الزيانة كدير اللمسات الأخيرة على حسناء لي جات كتحمق بقفطان فالأزرق مستور وأنيق فنفس الوقت جاها كيهبل مع فولارها مقاد بطريقة عصرية وتاج فوق الراس ،دايرة ماكياج خفيف ولأول مرة حسناء دارت المكياج جات واعرة غزالة وفنة ومع الحشمة زادت وطاح عليها السر .
سهام( موجهة هضرتها لليلى لي ساهية مع ): هواحد السلام عليكم لالة متوحشتنيش.
تتمة بارت90🔥🔥🔥
ليلى( دارت عندها بفرحة ): أهلا أهلا شكون تفكرني اليوم ، ( عنقاتها سهام) ياوشحال توحشتك ياختي تگولي كازا مخاصمة معاك.
سهام: إوا شنو ديري الأشغال والدنيا ( بإبتسامة ) مبروك مدار سي سليمان يالالة ملي علمتيني جاني الحال بحال إلى كنحلم ، واه سليمان إتزوج أمبوسي .
ليلى: هيا حگرتي ليا ولدي ، الله إرضي عليه دارها ليكوم على قد فمكوم .
سهام: إوا ألالة عرفينا على عروستك نشوفوها ونتعرفو عليها.
ليلى( جراتها لجهة حسناء لي كانت الزيانة و نزهة كيدويو معاها): بنتي حسناء كنقدم ليك سهام ختي الصغيرة لي عاوت ليك عليها ( شافت فسهام) إوا يالالة كنقدم ليك بنتي وعروستي حسناء الغزالة.
حسناء ( بخجل و إبتسامة): متشرفين .
سهام ( بضحكة): ليا الشرف الزينة( سلمات عليها) أمممم محگل سليمان بغا إتزوج گولي التوت عندكوم فالدار، زوينة مشاء الله عليك ربي إحجبك.
هكاك بقاو مكاين غي الضحك والنشاط والفرحة فكل مكان ، بقاو مع حسناء حتى سالات ليها الزيانة ، وهي تم ليلى لي كانت بطكشيطة حتى هي فالأزرق مناسبة عمرها مع فولارها ومكياج خفيف قاصدة بيت سليمان دقات عليه ، وهو إتفتح الباب من طرف جمال لي كان حتى هو حاضر وجاب معاه واليديه ، ضروري إحضر راه صاحبو هذا وهو فرحان ليه.
جمال( طانز): أهلا زين متبرعيش ليا بالنميرة يالفنة.
ليلى( ضرباتو بيدها وهي ضاحكة): الله إمسخك الماسخ ، حيد فين ولدي الغزال واش واجد.
سليمان ( خارج من الدريسنغ كيعقد الصدايف كان بلباس رسمي فالأزرق جاه كيهبل): هاني الحنينة واجد.
ليلى( بعيون دامعة قاصداه): ولدي العزيز وشحال جيتي فن ربي إحفضك ليا .
سليمان ( باس ليها راسها): نتي احلى أميمتي.
ليلى: إوا يالاه راه الناس جاو كاملين وحتى حسناء كملات يالاه تهبطو أولدي.
سليمان: على بركة الله.
#يتبع
أنت تقرأ
هناك أمل
ChickLitقصة بالدارجة المغربية، تحمل من كل فن طرب : اليتم،الحب،الرومانسية،العائلة،الكراهية،الحسد،الحقد،معنى الصداقة،محبة الدين،الجانب الديني،الواقع المغربي. قصة يتيمة كبرات فداخل الميتم وملي وصل وقت خروجها منو غاتواجهوم بزاف ديال المصاعب فياترى غاتقدر تج...
