هناك أمل

بارت22

🍂 هناك أمل 🍂
🍸 مصادفتك هي الحلم لواقعي وحقيقة لنبض قلبي 🍸

بارت22

عندو هو لي خرج من بيتو وشاف لجهة بيتها، للحضة تفكر گاع الكلام لي سمع ، نفض راسو من التفكير وكمل طريقو.

هابط عندهوم بمشيتو الروجولية ، بليباسو الكلاص الرسمي ، جسمو باين فيه رياضي وبلي كيهتم بصحتو، كان شاب فعمر 27 سنة، طويل القامة ، بشرة بيضاء، عيونو سوداء كسواد الليل، رموش سوداء كثيفة ملاميحو سوداء ، ولحية خفيفة مزينة وجهوا .

هابط فالدروج بشوية عليه مشيتو مرزنة وغي بشوية عليه مزربان فين ، ضحكهوم كيسمعو من تماك ، هادشي عندو عادي مولفهوم هكاك ديما ناشطين.

وصل باب الصالة ، الهزة لي غايهز راسو مجاو عينيه غي فيها هي لي عاطياه بالضهر، دقائق وهو ساهي فيها ، كتبان ليه فتاة شابة ، ذات جسد نحيل نوعا ما ، لابسة بيجامة بيتية فالأزرق، مع فولارها ، گالسة متبتة كتبين أنها إنسانة محتارمة وحشومية وماشي صوڤاجية، مفاق على راسو غي ملي سمع عبد الرحمن كيدوي معاه .

تعجب من راسو علاش حتى سها فيها وهو لي معمرو هز العين على بنت المرا ، ولا حتى كايلفتوا إنتباهو ، ولكن هادي تولد عندو فضول إعرفها شكون هي وكيدايرا وهو ديما كيسمع ليلى كتدوي عليها، فسر فضولو على هاد النحو.

من بعد ماسلم وگلس فبلاسطو حداها ، وعلى إثر هضرة ميلود هز فيه راسو حتى هو فنفس الوقت مع حسناء ، گاع منتابه بلي لابسين نفس اللون حتى گالها ميلود ، وملي بغا إتأكد دار لعندها فنفس الوقت لي دارت هي ، وتماك توقفات عليهوم الكاميرا ، نضرة منها ونضرة منو ، عيونو السوداء وعيونها البنية
سها فيها ثاني وفملامحها الهادية ولي باين فيها الحشمة والخجل بسباب حبات الكرز لي توردو وجنتيها دغيا تلونو بالأحمر .

هو كان كيشوف بنضرة عادية وشبه باردة ، أما هي غي تلاقاو عينيها مع عينيه حسات بالدنيا دارت بها دغيا حنات راسها من الحشمة ، و هو قلب وجهوا لجهة عبد الرحمن بحال إلى ماوقع والو ، ولكن إكذب إلى گال معجباتوش ومجدباتوش من أول لقاء، استغفرالله فسرو ، ودار لجهة باه داوي معاه.

سليمان (ببحة رجولية هادية):الحاج بان ليا ميلود اليوم ناشط كثر من القياس أو لا، (شاف فميلود وكمل) فرحنا معاك أسي ميلود.

ميلود ( بضحكة): نتا كتعرفني ديما راشقة ليا ولكن اليوم ( شاف فحسناء بإبتسامة) فرحان ببنتي حسناء .

نزهة: لقيتي البنت حشومية ولقيتي راحتك ديما شاد فيها ( شافت فحسناء) متديش عليه أبنتي هو هكا داير.

ليلى( بضحكة ): وصافي بعدو ليا من ولد خالتي ،هههههه شفتكوم تحاميتو عليه .

ميلود نفخ صدرو عاجبو الحال والحاج جاوبها.

عبد الرحمن: ألالة نتي وياه دايرين حزب ، ولكن رخفو على البنت شوية راه مزال مغاتولف على طنزكوم .

ميلود (بطنز): إوا راه هما لي مزرقينها معندي مندير ليهوم ههههههههههه.

سليمان: وخا أبا ميلود نرضها ليك فساعة الخير.

ضحكو كاملين على أخر هضرة من غير حسناء لي ساكتة وحانية راسها كتسمع ليهوم ومكاين لي سالا معاها قد ديك الريحة الهادية وداك الصوت المبحوح الرجولي ، معرفاتش علاش هجموا عليها دوك الأحاسيس وعلاش ولات على ديك الحالة، مفيقها غي صوت ليلى.

ليلى(بقلق): بنتي حسناء مالكي كندوي معاك مكاتجاوبيش ،(حطات إيدها على يد حسناء) ياك لاباس أبنتي بك شي حاجة.

حسناء ملي سمعات هضرتها هزات راسها لقاتهوم كيشوفو فيها ، السيدة راه عياو ميدويو معاها وهي مكايناش هنا.

حسناء (بخجل وبصوت خافت): نعام أخالتو ، أحم دويتي معايا.

واحد سي سليمان غي سمع داك الصويت الخافت الرقيق دار لعندها كيسقي فضولو لي جاليه عليها، مزال مدازت حتى نص ساعة باش عرفها ، وتولد عندو فضول من جيهتها.

#يتبع