اخر تصبيرة لما قبل بارت العيد ( بعض الاحداث جدا مختصرة عشان العيد يوم العيد )
نواف فتح القارورة ومدها ناحيت شادي
- تفضل
شادي ابتسم ومسك القارورة
- شكرا
نواف ابتسم
- تعرفني ولا اذكرك انا مين ؟
شادي ضحك
- خلاص ياخي مو عشان سألتك ٨ مرات تمسكها علي !
نواف جلس جنب السرير
- عادي انا فاضي اشرحلك قصة حياتي ألفين مرة مو بس ٨
شادي حط الحبوب في فمه بعدها بلعها بالموية
- واضح انك صبور
نواف حط يده تحت خده
- يقولو كانو بيسموني صبور بدل نواف بس الحمد الله جدتي تدخلت وقالت ما اصير جدة لواحد صبور !
شادي ضحك وهو ينزل القارورة
- جدتك ذي ياخي .. تحمست اقبلها والله من كثر ما تتكلم عنها
نواف هز راسه وهو يتنهد
- هيا اساس في حياتنا كلنا .. بس الله يهديها .. لو تهدأ شوي
شادي هز راسه بشويش ونزل عيونه
- تمنيت لو اني شفت جدتي .. بس .. هيا ماتت وابوي مراهق .. محد من الاحفاد لحقها .. متوقع اكون مدللها لو ظلت عايشة !
نواف رفع راسه ورجع ظهره على الكرسي
- انت اصغر الاحفاد ؟
شادي ضحك
- للاسف لا .. كنت الاصغر لفترة طويلة بعدين الكبار تزوجوا فكرتي انحرق خلاص
نواف
- راحت عليك اجل .. الجدة بتظل تدلع اصغر الاحفاد إلين يموت هو وعياله
شادي تحمس
- يعني اصغر حفيد عندكم للان يتدلع ؟
نواف ابتسم بشكل جانبي لانو اصغر حفيد عندهم هو ثامر
- تقدر تقول ان كل طلباته مجابة .. تقريبا
شادي عقد حواجبه
- ايش قصدك بتقريبا ؟!
نواف كشر وهو يفكر
- هو شبه مختل .. ما كان مختل .. كان انسان طبيعي بعدين حب شخص وبوف عقله طار
شادي عض شفايفه
- حبيبه تركه ؟
نواف اخذ نفس عميق
- الموضوع معقد حبتين
شادي ميل راسه
- انا فاضي .. لو تبغى تحكي يعني .. تعرف ما ورانا شي إلين يرجعوا الاخوان
نواف طالع في شادي وهو يفكر قبل ما يعدل جلسته
- اوك .. اعتبر اني باخذ رأيك كشخص خارج الموضوع ..
شادي عقد حواجبه
- ثواني متى غيرنا السالفة !
نواف تجاهله وهو يتكلم
- ثامر قابل سليمان بسبب سند .. سند لما سافر وتغرب هو كون شلة .. كانت اول مجموعة اصحاب يكونوا من برة العيلة بحكم انو جدتي دايما تحميه ومرة دقيقة في انتقاء اصحابه فنادرا ما كان يقدر يصاحب احد بدون ما جدتي تدق على ام الولد وتقولها تبعده عن سند
أنت تقرأ
راجس
قصص عامةيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
