انس تحرك لمواقف المستشفى .. لازم يجي يتطمن على الشخص الا طعنه .. لو اختفى بيثير الشكوك حوله انو ليش ما جيت تشوف ولد خالك ( هنا بنتكلم بناء على انو ولد عبير اخت عادل فعامر واخوه المطعون يصيروا عيال خاله بدل عمه )
نزل من السيارة وتحرك للمدخل .. سيارة راشد مو بمكانها .. عقد حواجبه .. ما يتذكر انو قرأ شي بخصوص خروج ادي فليش سيارة راشد مو هنا ؟
هز راسه وتحرك لجوة المستشفى وشاف نواف واقف ياخذ كوب القهوة من مندوب توصيل ..
اذا نواف هنا يعني رازي هنا .. اجل راشد اكيد راح يجيب لنفسه شي من البيت او يريح شوي .. رغم انو يشك في انو راشد بيروح يرتاح بعيد عن حبيبه بحكم الفترة الا قضاها بالمستشفى
رفع انس الهودي على راسه .. نواف شافه بالمكتب فلو شافه هنا بيخبر رازي وهو مو فايق يتعامل مع رازي دحين
حط يدينه في جيبه وتحرك للمصعد وهو يتعمد يمشي في الاتجاه المعاكس لنواف عشان لا يتقابلوا
كان يأجل دخوله للمستشفى لأي زيارة لذا السبب .. هو ما يبغى يقابل احد منهم بالغلط .. مو وحبيب راشد مسنتر بالمستشفى إلين يخلص علاجه
تنهد لما وصل الدور الا فيه الغرفة وتحرك ناحيتها .. خاله موجود هنا ولازم يشوفه .. لو عرف يقنعه بخصوص القضية فكل شي بيصير زي ما هو مخطط
دخل باب الاجنحة الا فيها الغرفة ووقف للحظة لما شاف عامر خارج من غرفة اخوه
اول ما طاحت عيون عامر على انس ملامحه تغيرت للتفاجئ قبل ما يبتسم ويتحرك بسرعة ناحيت انس الا كتم انفاسه وهو يغمض عيونه .. لازم يغير خطته الان !
عامر وصل عند انس وطالع حولهم قبل ما يسحبه ناحيت الحمامات .. حط لافته مغلق للصيانة برة الحمام وقفل الباب من جوة ورجع يطالع في انس الهادئ
عامر حط يده على خد انس وتكلم بهدوء
- يعني تجي ولا تعطيني خبر ؟ .. خلاص معد صرت اهمك ؟
انس بعد وجهه الناحية الثانية
- انت اللي قررت ترجع وتنهي كل شي .. ولا نسيت ؟
عامر عض شفايفه وهو يقرب من انس
- ما نسيت .. بس .. ما قدرت افكر في احد غيرك
انس دف عامر بشكل بسيط بدون ما يطلع من يده
- لأ .. انت بتفكر ومقرر .. فبطل تحاول تسحبني لك
عامر رفع حاجبه
- بس قلبي ما بيدق الا لك
انس طالع بعيون عامر
- وانا مو حق مشاعر .. وانت اكثر من يعرف ذا الشي
عامر ضحك
- مو ذا الا مخليك ماخذ عقلي ! ..
انس ما رد ونزل عيونه بشويش فعامر رجع يمسح على خد انس
- صاحبك مسويلنا مشاكل
انس هز راسه
- قلت لعمي .. تنازل عن القضية وانا بتصرف معاه
عامر كمل يمسح على خد انس
- ما ينفع نتنازل .. بتصير سالفة .. و .. في احد مد يده على اخوي منهم
أنت تقرأ
راجس
قصص عامةيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
