راجس

118

رازي طالع في راشد الا كان متمدد فوق سرير الرافق .. العملية خلصت بس بحكم انها بمنطقة حساسة سهل يأثر عليها التلوث ويعطي مضاعفات كثير فشادي بغرفة ثانية ناحيت الحجر الصحي وممنوع اي احد يدخل عليه او ينام هناك

يمكن ذا الا كاسر راشد

رازي نزل عيونه وهو يقرب من السرير .. يبغى يقول لراشد انو يكفي راجس كمرافق .. هو بيرجع البيت مع نواف

اخذ نفس عميق
- راشد

راشد فتح عيونه ولف وجهه بدون ما يقوم وطالع في رازي
- صحي ؟

رازي هز راسه
- لسه .. جيت اكلمك ..

راشد عقد خواجبه ورفع جسمه شوي
- ايش في ؟

رازي بلل شفايفه وهو يعتمد ما يطالع في اخوه
- ب .. بروح مع نواف البيت .. رازي بينام هنا و الغرفة مليانة و ..

راشد تكلم بعصبية
- انقلع مع حبيبك ولا تفكر ترجع حتى لما يصحى !

رازي رفع عيونه يطالع راشد وشافه كيف كان مكشر وواضح انو معصب
- مو كذا .. راشد انا ..

بس راشد زعق عليه
- قلتلك روح ! .. مو صار هو اهتمامك الاول والشخص الا تبغى تجلس معاه طوال الوقت وطز في الحمار الا يجلس في البيت ينتظرك والا ظل ينتظرك طوال عمره عشان يتأكد انك بخير وانك نايم مو خلاص لقيت احد ثاني يشيل همك وصرت قلك كبير ما تحتاج اهتمام من احد غير الزفت الا تحبه !

رازي كشر
- بطل تسبه ! .. نواف ماله شغل وانا الا ابغى اروح لاني اكره المستشفيات

راشد ضحك بسخرية
- ايوة عشان عادي انا اوقف حياتي لما انت تتعب واظل هنا بس لما حبيبي يكون نايم بين الحياة والموت وانا هنا منهار وكل الا احتاجه هو انك تجلس جنبي بس بس برضوا ذا كثير عليك استاذ رازي ! .. مرة كثير !

رازي كشر وهو يطالع في راشد
- لا يا شيخ ! .. محد طلب منك تكون معاي فبطل تتكلم كأنك كنت ملزم بكل لحظة من لحظات حياتي !

راشد طالع في رازي .. هو مو ملزم .. صح .. هو مو اخوه .. هو من رجال ثاني .. هو المفروض يعيش مع ابوه مو مع رازي وراجس .. هو مو ملزم من احد ومحد طلب منه شي .. كل الا سواه هو الا اختاره .. وكله كان غلط

رازي ظل يطالع في راشد وهو يتنفس بالقوة .. هو يدري انو كلامه غبي .. بس هو يكره لما راشد يزعق بذي الطريقة ..

كل واحد كان يطالع الثاني .. كل واحد خايب من الثاني ..

راشد بعد وجهه وتمدد على السرير
- لما يسيبك ما بوقف بصفك .. بقولك انك تستاهل لانك كلب

رازي لف وجهه وتحرك ناحيت الباب
- ما احتاجك توقف بصفي اصلا .. وحتى لو سيبني .. بموت قبل ما افكر أجيك

قالها وخرج من الغرفة بينما راشد كشر ودفن وجهه في المخدة وهو يلعن رازي

راجس عقد حواجبه لما شاف وجه رازي مقلوب فقرب ومسك يده
- ايش صار ؟