راجس بلل شفايفه وهو يغمض عيونه ويحس بالهوا يضرب وجهه
يمكن افضل قرار اتخذه سياف هو انهم يطلعوا البحر .. مع كل ذا الغيم والهوا .. كان راجس جالس يعيش جدة بوجهها اللطيف
ابتسم وهو يفتح عيونه ويطالع المد .. هل حياته حلوة زي جو جدة ؟ .. يمكن ..
ألتفت يطالع ناحيت سياف الا كان ينزل كراسي من السيارة وطاولة عشان يلعبوا جكارو عند البحر ( الخسران بيرمي في الموية صدقوني )
طالع بالسيارة الثانية وفتح عيونه بصدمة .. هل ذي سيارة راشد ؟!
فز وتحرك لما شاف باب الراكب ينفتح وراشد يفتح شنطة السسارة يسحب الكرسي المتحرك
راجس تحرك لباب الراكب وحضن شادي
- وحشتني !
شادي ضحك وهو يبادل راجس الحضن
- وانت وحشتني بس الفرق انك ساحب علي وبطلت تجيني !
راجس بعد عن شادي
- اسف .. بوسط كل شي .. حقيقي انشغلت
راشد حط يده على راس راجس
- انطعن بالاصح مو انشغل .. تعرف مضعين الواح الخشب ومسوي عروض للناس عشان تجرب حدة سكاكينهم في جسمه مجانا !
سياف ضحك
- صح .. ويعطيهم حضن على كل طعنه !
راجس قلب عيونه
-انقلعوا !
راشد ضحك وهو يساعد شادي يجلس على الكرسي قبل ما يدفه ناحيت الجلسة الا اختاروا يكونوا فيها قدام البحر
اخذ شادي نفس عميق وهو يبتسم
- راشد عليك اختيار في الاماكن ! .. دايما يبهرني
ضحك راشد وهو يثبت الكرسي عشان لا يتحرك
- ترى رازي الا لقط المكان من فيديو في تيك توك وجا هو ونواف وتأكد انو الارض هنا تنفع للكرسي .. فمو اختياري لحالي .. كنت بوديك مطعم السقالة بس قالوا عليه قديم !
شادي مسك يد راشد
- خلينا نروحه .. لحالنا .. ذاك شوي رومنسي وما ينفع مع اخوانك
راشد ابتسم وباس راس شادي
- بعد عمليتك ان شاء الله
راجس صفر
- اووووه طيور الحب وصلت
سياف رفع حاجبه هو يشوف سيارة نواف توقف
- يا حبيبي ذول مو طيور حب ! .. ذول متزوجين واحتمال لو اخوم يقدر يخلف كان جابوا ٤ للان !
راشد سحب علبة المنديل ورماها على سياف
- انقلع وبطل تقول ماله داعي ! .. كمان راجس صغير فلا تحط ذي الافكار بعقله !
سياف عض شفايفه وهو يمسك العلبة وطالع في راجس وابتسم وراجس قلب عيونه وهو يحس وجهه احمر
وطبعا سياف قرب من راجس وهمس
- لا يدري اني احط فيك حاجات اكثر من الافكار !
راجس دفه بعيد وتحرك لسيارة نواف وهو يمسح يدينه في بعض باحراج بس ما يبغى يبين احراجه عند سياف
أنت تقرأ
راجس
General Fictionيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
